احمد سعد يفجر مفاجاة بشأن اغنية " طب ليه" لـ راغب علامة

تحدث الفنان أحمد سعد، عن بدايته في تلحين الأغاني، والتي بدأت مع الفنان اللبناني راغب علامة، بـ أغنية طب ليه كده، مؤكدًا إن راغب علامة كان السبب الرئيسي وراء نجاح الأغنية.

وقال سعد، خلال حواره مع الفنانة إسعاد يونس، في برنامجها صاحبة السعادة : أنا دايمًا ببقى عارف إن أي أغنية لو نجحت مينفعش ركن فيها يبقى مش موجود، ولو غيرنا أي حاجة فيها مش هتنجح، أغنية طب ليه كده نجحت عشان راغب علامة وبصوته، أنا كنت فلحوس أوي وسط صحابي، كنت عايش في عين شمس، وبسمع ألوان مختلفة وكانوا بيخلوني أعملهم شخصيات، وجيت في أغنية راغب علامة عملت شخصية جزائرية في أغنية معاه في الألبوم.

وتابع المطرب احمد سعد، حديثه عن كواليس تلحينه أغنية طب ليه كده: قولت الألبوم ده ناقصه أغنية هيت، طبعًا هما عايزين يعرفوا مين العيل الصغير ده اللي قال الألبوم ناقصه أغنية، وقالي أنت تعرف منين الأغنية الهيت، أنت بتلحن؟ قولت لأ بس لو عايز ألحن هلحن، أنا هلحن لك أغنية في 24 ساعة.

وأوضح أحمد سعد، إنه اكتشف فيما بعد، إنه اقتبس لحن أغنية طب ليه كده، للفنان راغب علامة، من أغنية للفنانة السورية أصالة، قائلًا: الأغنية نزلت وكسرت الدنيا، واكتشفت إني سارق نصها ومكنتش أعرف، وطلعت متاخدة من أغنية لأصالة، وكلمت أصالة وقولت لها أنا الأغنية عندي أحلى.

وأضاف مازحًا: أنا مكنتش أحلم ألحن لـ راغب علامة، أنا كان نفسي أمشي معاه بس في الشارع، ومكنتش متخيل إن الأغنية هتعجبه بالطريقة دي، أنا أه كان عندي ثقة ولكن مش لدرجة إن ميتغريش فيها حاجة.