راعوا فرق السرعات مع الأبناء
طريق السعادة
د. هالة منصور.. أستاذ علم الاجتماع
أولادنا. حبايبنا. أغلي حاجة في عمرنا. تحويشة العمر من المحبة والمودة والأمان والسند مع الزمن والأمل في كل جديد. ثمرة تعبنا وشقانا طول السنين. هي دي أحاسيسنا جميعا تجاه أولادنا. عاوزينهم لينا طول العمر مع اختلاف نسبية وضرورة ونوعية الاحتياج. لكن سنة الحياة بتقول هما الرصيد الأساسي في مواجهة تقلب الايام. وهنا بقي عاوزة أقول كلمتين بصراحة لكل أب أو أم علاقته فيها مشاكل مع اولاده أو مش قادر يلبي معاهم قائمة توقعاته ومش عارف يرضي عن علاقاتهم معاه. عاوز حاجات مش لاقيها. عنده رغبات مش بتتحقق. حاسس إنهم مش زي ماكان بيحلم. وتبدأ الاحباطات تزيد لأن قائمة التوقعات لا تُلبي.
لازم نقف ونحاسب ونسأل نفسنا في حوار ودي مع النفس: هما أولادنا ممتلكات ولا بشر؟.. هو إحنا وبس اللي لينا رغبات لابد أن تلبي ولا هما كمان عندهم احتياجات ورغبات وطلبات مختلفة في درجة إلحاحها ونسبيتها من جيل لجيل ومن طبيعة مرحلة وضغط طموح وتنوع علاقات؟.
لازم نشوف نفسنا وإحنا قدهم مع اختلاف الزمن والظروف والحياة ونخلي ميزان قياسنا عادل وخليها عليك شوية علشان تقدر تفرح بيهم وتسعد مع سعادتهم وقول لنفسك إنت اللي ربيت وزي ما زرعت هتحصد. علمتهم المودة ولا الأنانية وحب الذات؟ عرفتهم يعني ايه زي ما نأخد ندي في المشاعر والاهتمام والتفاعل ولا كنت بتطبطب وتدي وإنت فرحان ومستمتع بحبهم وحبك ليهم من غير ما تهذب نفسك شوية وتقرص عليهم وتفوقهم وقت اللزوم وتفهمهم أن لك طلبات و احتياجات زيهم وإن الدنيا خد وهات وعمرها ما هتكون هات وبس أو خد وبس؟.
لو كنت من الأول عملت توازن وربيت وعلمت بمودتك وحبك للكبار والإيثار للابوين والاخوات والأسرة بعرفان ورضا هيمشوا علي دربك ولو شوية. واوعي تفتكر إنك وبس اللي ربيت وتعبت. دي سنة الحياة. لازم نقرب لأولادنا بمحبة. لازم نراعي فرق السرعات في الطموح والحياة والاهتمامات من جيل لجيل.
