رئيس انبي: عرض ويجان لضم محمود جاد "مجرد كلام" ولم أتلق طلب رسمي من النادي

أكد أيمن الشريعي، رئيس نادي إنبى، أنه لم يتلق عرضًا من ويجان الإنجليزي للتعاقد مع محمود جاد حارس مرمى الفريق.

وأضاف فى تصريحات تلفزيونية: "أنا مش بحتفظ بأرقام أولياء أمور اللاعبين، ووكيل الحارس بعتلي بيقولى فلان الفلاني كلمني عن عرض ويجان وبيقولي عايزين يدفعوا كذا، والشروط مش منطقية وهما عايزين يعملوا اتفاق الولد يفضل في إنبي، ورديت عليه قلت له عايزهم يبعتولي عرض بكل الكلام اللي بتقوله وكل اللي بتقوله ده مجرد مكالمة تليفونية، ومجرد ما تقفل هنساه وأنا مؤسسة ولازم أتعامل بورق".

وتابع: "محمود جاد لاعب إنبي، ولو ويجان عايزه يخاطب نادي إنبي بشكل رسمي، واحنا عايزين جاد يتعاقد مع ويجان".

واستطرد: "احنا عاملين الاتفاق ده كله عشان محمود جاد يلعب في ويجان وهو مش هيلعب في ويجان وفقا للاشتراطات في الدوري الإنجليزي، وكل الاشتراطات الموجودة في البريميرليج والشامبيونشيب تمنع جاد من اللعب في إنجلترا، وهتشوف محاولات معنديش مانع ولكن لحد الآن مجاليش عرض رسمي بتفاصيل العرض سواء القيمة قد إيه، والوكيل قالي القيمة اللي عارضينها ولكنه مجرد كلام".

واختتم: "اتكلمنا إنه 3 أو 4 لاعبين يخرجوا من عندنا يروحوا يعمله معايشات في إنجلترا، واشتغلنا على قطاع الناشئين من سن 14 سنة وبهيأهم إنهم يعيشوا 5 أيام في أوروبا يشوفوا النظام والحياة عاملة إزاي، وجاد بالنسبة لي قيمته كبيرة بالنسبة لنادي مصرى، ولو فيه حاجة جادة من مصر هندرسها ومش عايز أقول رقم لأن الأرقام مش متحددة دلوقتي".