شيرين عبد الوهاب عن حسام حبيب: " انا وبناتى بقينا عايشين والموضوع بوخ"
أكدت الفنانة شيرين عبدالوهاب أنها لن تنسى سؤال العديد من الأشخاص عنها في أزمتها، ومنهم الإعلامية لميس الحديدي والفنانة ياسمين عبدالعزيز ومنة شلبي، متابعةً أنها تعلم جيدًا بوجود مشاكل أهم من مشاكلها الشخصية لدى المواطنين وبدأت تشعر أن موضوعها بوخ.
واضافت شيرين خلال مداخلة هاتفية إلى برنامج «كلمة أخيرة» مع الإعلامية لميس الحديدي :«أنا ست قاعدة في أمان الله مع بناتي بقالنا 4 سنين شايفين الويل، سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتي، مكناش بنخرج ومكناش عايشين تقريبًا، والبنات مكنوش بيعرفوا يقعدوا معايا، لأني كنت عايشة مع زوج مش بيشتغل تقريبًا، وكنت محبوسة 24 ساعة في أوضة نومي مش بعمل حاجة، قاعدة بس، وأنا غلطت في حق نفسي، وكنت فاكرة إني بحافظ على بيتي، لكني اكتشفت إنه مكانش بيت، كنت في عشة فئران أو مصيدة، أنا كنت زي الفار اللي بيدخل المصيدة ياكل حتة جبنة».
وتابعت: «كنت عايشة مع راجل مش بيشتغل ولا بيخرج ولا بيشوف أهله ولا أصحابه، كل همه حب الامتلاك، ومع ذلك فضلت جنبه وهو لا يعرف إلا فكرة حب الامتلاك، وصبرت لأني كنت بحاول أنجّح الحب ده، ومكنتش بحب أتهزم، وأنا بطبعي بكون خدامة الراجل اللي بعيش معاه».
