إزاي أقدر أحب نفسي ؟

أصول الإتيكيت

د.مني داوود خبيرة الإتيكيت

كتير بنسأل نفسنا ازاي اقدر احب نفسي؟ واتقبل عيوبي؟ وازاي اقدر ادخل في علاقة مع الآخر تحسسني اني مرغوبة ومحبوبة؟ بتكون الإجابة الأكيدة انك لازم تحب نفسك أولاً كالآتي:

1- تغيير الأفكار: نصف تعاسة الإنسان في أفكاره. لان كل المشاعر اللي بنشعر بيها في الدنيا عبارة عن وهم كبير انعكاس لافكارنا زي المثلث علي قمته الفكرة وبعدين الفكرة تتحول لمشاعر وبعدها تتحول لحركات واكشن بنقوم به فدايما نتكلم عن نفسنا بمشاعر ايجابية.
2- الثبات علي عادات يومية ايجابية: لازم طول مااحنا عايشين نشتغل علي تطوير نفسنا وروحنا وعقلنا لكن الاهم تثبيت العادات اليومية اللي بتجلب لينا السعادة في يومنا حتي ولو بخطوات بطيئة وعلي رأي المثل "سلحفاة عارجة ولا أرنب ميت".

3- حمايه صحتك النفسية: ممنوع الاقتراب من اي شخص هيبعدك عن سلامك النفسي علي قدر الامكان. قلل من العلاقات المزعجه في الحياة وقرب من ناس عندها شغف في الحياة.

4- ممارسة فن التجاهل: تجاهل اشخاصاً وتجاهل احداثاً واختار المعارك اللي تدخلي فيها. وأي معركه تشدك وتنهكك نفسيا وعصبيا لازم تبعدي فورا.

5- الاهتمام بالدايت وصحة الجسم: مهم جدا الاهتمام بصحة الجسم والعادات الغذائية الصحية فهي مفيدة جدا لزياده الثقه بالنفس وبالتالي حب وتقدير الذات زي التعرض للشمس. وممارسة الرياضة زي المشي ودي رياضه غير مكلفه لكنها بتفرق جدا نفسيا.

6- ازرع حنية ووزع حب: ازرع حنيه لكل الموجودين بحياتك. كلمة حلوة. ابتسامة طيبة. هتحصد أضعاف مما زرعته. كن مصدر حب وحنية.

7- بلاش تكون قاضي وتصدر أحكام: بلاش نحكم علي شخص لمجرد أننا شوفنا منه تصرف أو موقف أو سمعنا عنه من ناس دي "ام" كويسة. لا دي فاشلة. دي متجوزة. دي مطلقة. بلاش احكام مالهاش قيمة. كل شخص حر في حياته. كل شخص يركز في كتابه وكراسته ولا آراء حد السياسية ولا الدينية دي مثلث رعب اجتنبيه قدر المستطاع.

8- الرزق بيد الله: ما تنتظرش موسم الحصاد. ازرع زرعتك وارويها وتوكل علي الله. الرزق بيد الله يبسطه لمن يشاء. كل اللي عليك هو السعي في المال. الزواج. الأولاد. الشغل كل اللي عليك السعي باخلاص.

9- جبر الخواطر: إن جبر الخواطر عادة عظيمة بتكون ليها اثر علي نفسنا قبل الآخرين. دايما نترك اثراً طيباً مطمئناً في قلوب الناس. كلنا محتاجين السند والدعم والدنيا دايرة وقانون الدوران لم يرحم احداً.

10- اضحك للدنيا: ابتسم علي أي شيء وكل شيء. اختلق اسباب عشان تضحك. الضحك بيفرز هرمون الاندروفين وده هرمون هيسبب لك السعادة. فزود الجرعة واستمر في طاقة الضحك علي قد ما تقدر.