اسندوا بعض بدون ما تضغطوا علي بعض

طريق السعادة

د. هاله منصور أستاذ علم الاجتماع
الناس في بلدنا قلقانة. متوترة. تعبانة. خايفة من بكرة. خايفة من كل حاجة. وقلقانة علي كل حاجة. وفيه ناس كتير حاسة إنها مش فاهمة حاجة. وناس تانيه بتقول أنا عارفة كل حاجة. وبين دول ودول ناس بتتعارك وناس بتتفاهم وناس مش عارفة تبقي ناس. كل ده نتيجة ضغوط وتجارب. ومشاكل وخوف ممكن نقول أزمة اقتصادية والكل بيدور علي الحلول يمكن يحل أو حتي الضغوط تقل. بس تفتكروا العلة في الفلوس وبس؟ سيبوني كدة أقولكم حاجة.

هو إحنا كنا شعب غني قوي ومرفه طول عمرنا ولا كانت الفلوس دايما كتيرة والحزام كان مرحرح زمان وفجأة حسينا بالازمة؟ واقتصادنا هو السبب وبس في وجع القلوب؟ هو أهلنا كانوا عايشين عيشة أحلي منا في الفلوس وكانت الدنيا جاية والرفاهية للأغلبية؟ الإجابة لأ طبعا .بس كان في حاجة إسمها قناعة. رضا. كان كل واحد بيحلم علي قده. كل طبقة ليها سقف. كان كل واحد شايف إنه راض وانه يسعي في حدود طبقته واسلوب حياته شبه القريب منه في حاجات كتير كانت الناس بتدور علي المحبة قبل التملك. بتدور علي اللمة الحلوة قبل المظاهر الكدابة. البيوت كانت للسكن والضيف مش المنظرة والتقليد. الناس كانت بتحب اللقمة الهنية علي السفرة أو الطبلية حتي لو صنف واحد بس لمة ومحبة مش إحنا إللي قلنا بصلة المحب خروف؟

كانت الناس مستورة في عيشتها وكله غاضض بصره وقناعة بيعرف يقول وهو ماله جبت أو كلفت كام أو كلت ايه. المهم الستر وكل واحد في حاله وعلي قد حاله والرضا والمحبة والمودة والشهامة والجدعنة كانت حالة عامة مش عملة نادرة علشان كده كانت كل حاجة واقل حاجة ممكن تفرح وتسعد عرفتوا ليه الناس كانت أقل في الرفاهية بس كانت مشمولة بالقناعة بالستر بعزة النفس. بالإنسانية وماكانش كل حاجة في السوق بتتباع بالفلوس علشان كده كانت الناس بتقدر تساعد وتعدي مع بعض الصعاب.

إوعوا تفتكروا إن الأزمة بس في الفلوس. نركز شوية. نقرب شوية. نحب كتير نرضي كتير. نقف جنب بعض. نواجه مع بعض. ونحاول نقرب من غير ما نفقد الخصوصية أو الايمان. من غير مانرخص. حبوا الحياة عيشوا. الحياة. ارضوا وربنا هيرزق ويبارك ويساعد. وافتكروا دايما إن الله في عون العبد مادام العبد في عون أخيه . قربوا من غير ماتفتشوا. اسندوا من غير ماتضغطوا. حبوا من غير ما تبخلوا. ولا تستغلوا. حتي لما تخافوا أو تزعلوا أو تقلقوا قووا نفسكم ببعض. واوعوا تقووا علي بعض. هو ده المدخل الأساسي والرئيسي للسعادة رغم الصعاب وإن شاء الله هنعدي مع بعض كل صعب طول ما إيدينا ويا بعض. وقلبنا علي بعض. و للحديث بقية إن شاء الله.