دراما رمضان.. فى عيون أهل الفن

شارك النجوم بآرائهم في دراما رمضان وعلقوا علي صفحاتهم الشخصية بمواقع التواصل الاجتماعي المختلفة
وتحدثوا كما يلي:

ياسمين صبري:

آيتن عامر في "مكتوب عليا" وشخصية رقية قدرت تخطفني من أول حلقة عندها رياكشنات هتموتني قادرة تخليك تضحك وتزعل وتفرح تصعب عليك وفي نفس الوقت تبقي متغاظ منها..
مشهد واحد أو حتي دور بمساحة قادرة تخليك تتابعها وتستني تشوف اكتر منها.. عندنا ممثلة شاطرة جدا متمكنة من أدواتها.. تقدر تقول تمتلك كل المقومات الفنية للبطولة المطلقة..
Ayten Amer برافووووووو كما هنأت الموهبة الجديدة رحمة احمد في مسلسل (الكبير6) وقالت عنها: مربوحه دي طلعت فظيعة جدا.

مايا دياب:

علقت الفنانة مايا دياب في تغريدة علي مسلسل (فاتن أمل حربي ) قائلة: مش مجرد مسلسل. هو مجموعة قضايا المرأة العربية والمصرية تعاني منها من سنين كتير وحتي اليوم“ نظرة المجتمع للمطلقة. حقوق مهدورة وذكورية مهيمنة قوانين مجحفة بحقها واذا حكيت بأدني هالحقوق تُهاجَم.. نيللي كريم تحية لإبداعك وإحساسك اللي قدر يوصلنا العمل بأرقي صورة.

سارة نخلة:

عن مسلسل "المشوار" الحلقة 22 دقيقة منها 5 دقايق ما حصل في الحلقات السابقة والحلقة عبارة عن 3 مشاهد بالظبط مع تطويل وحشو وملي علي مافيش مخرج مهم اوي اوي ونجم و نجمة مهمين اوي مش كنتو عملتوه 51 حلقة و اختصرتوا تعب المشوار علينا و عليكو و علي المخرج المحترم الي هايعتبر المسلسل دا سقطة في تاريخه الفني دا غير الكاست وحديقة الحيوانات الي قعدنا نتفرج عليها 3 حلقات إفلاس فني.

عارفة عبدالرسول:

عارفين انها ممثلة مبدعة وأدوارها تشهد لها.. لكن في مسلسل توبة جبارة بمعني الكلمة.. عامية وبتحرك عينيها اللي مابتشوفش بطريقة تخليك تنبهر.. في حب الست.. والفنانة انتصار.

عبيرصبري:

احنا عاملين مسلسل "يوتيرن" حلو جدا وبه الاحداث تعلو وتتطور جدا والشخصيات الطيبه بتتحول واري ريهام حجاج فنانة محترمة جدا وانسانة نضيفة وراقية ولذيذة ومجتهدة في شغلها وكل الممثلين عاملين ادوار حلوة.

السيناريست محمد سيد بشير:

اتفرجت علي 7 حلقات من مسلسل المشوار والحقيقة مش فاهم اي حاجة ولا عارف هو في ايه في حاجة غلط صح ولا انا غلطان
مسلسل المشوار بطولة : محمد رمضان. دينا الشربيني. احمدكمال. احمد مجدي.

في أسئلة كتير جداا متأخر الرد عليها ده غير اني مش فاهم فين الصراع واحد سارق شنطة وبيهرب ايه بقي؟!

طبيعي ان حبكة المسلسل تظهر بدري يعني هو سرقها من مين وازاي وليه عشان اكمل معاه الرحلة ده غير ان مفيش ولا شخصية ليها تاريخ واضح تقدر تفهم منها الاحداث واكبر مثال اخت دينا الشربيني؟ دي مخاوية ولا ايه قصتها انا مضايق جدا منه والله.

أحمد عزمي:

كل الشكر والتحية لصناع مسلسل "الاختيار3" تحية للمخرج بيتر ميمي والمؤلف هاني سرحان ولكل الفنانين العظماء علي هذا الاداءو التجسيدالرائع شكرا لكل عامل وفني خلف الكاميرا احنا شايفين مجهودكم وبنحييكم واخير شكرا للشركه المنتجه التي قدمت كل مايلزم ليخرج بهذه الدقة الاختيار عمل سيظل للتاريخ.

كريم سامي مغاوري:

محمد علي رزق شهادتي فيه مش مجروحة لأن موهبته بتتكلم عنه نجح محمدعلي رزق في الوصول لهذه المرحلة من التلقائية امرمش سهل خالص وتكنيك اداء صعب قوي ميعملوش غير موهوب ودارس وفاهم وعنده تجربه انسانية واضحة في تفاصيله وممثل جايب الشغلانة من تحت رائع في المشوار ومش هحرق المفاجأة التانية.

إسلام إبراهيم:

المخرج الموهوب بجد هو اللي بيغير جلد الممثل ويطللع منه حاجة عمره ما عملها قبل كده.
استاذ محمد سلامة شكرا انك شفتني وقدمتني بشكل مختلف “انا اول مره في حياتي اتكره كده ومحدش كان متوقع مني ده الفضل لربنا ثم لحضرتك وقدرة العبقري اسامه انور عكاشة في نسج الشخصيات والمعالجة العصرية الرائعة اللي عملها استاذ محمد سليمان عبد المللك راجعين يا هوا تحفة فنية دقيقة الصنع شكرا لكل صناع العمل.

السيناريست محمد صلاح العزب "مؤلف مسلسل رانيا وسكينة"

بسبب زنقة الوقت المسلسل الوحيد اللي عرفت اتفرج عليه "المشوار" وبرشحه بقوة للمشاهدة المشوار مسلسل كل عنصر فيه حلو لوحده وكل عنصر فيه تقدر تستمع بيه بشكل مستقل في مايسترو كبير ورا كل التفاصيل وضمها لبعض ومحمد رمضان ودينا الشربيني وكل الممثلين في أحسن حالاتهم ألف مبروك للزملاء الأعزاء ومجهود وتعب وشغل وإبداع واضحين ومقدرين.