الأربعاء
05 صفر 1440
17 أكتوبر 2018
03:08 ص

الكيتودايت.. أمل جديد لتكيسات المبيضين

د. مؤمن زكريا - مدرس مساعد امراض النساء والتوليد.جامعة بنى سويف
بقلم: د. مؤمن زكريا الجمعة، 12 أكتوبر 2018 11:36 م

كلمة بتتقال كتير فى عيادات تاخر الحمل ومنتشر بنسبة على الاقل 5‰ من البنات والستات وبتختلف من مجتمع لاخر .

وتعتبر من اهم اسباب تاخر الحمل الاولى لحديثى الزواج ومشاكل كتير لو حصل حمل زى الاجهاض المتكرر وسكر الحمل وتسمم الحمل  ومن اهم اسباب اضطراب الدورة الشهرية عند البنات ومرتبط على المدى البعيد  بالسكر من النوع التانى وارتفاع ضغط الدم وامراض القلب عند الستات.

ومرتبط ارتباط وثيق بمقاومة الانسولين وزيادة هرمونات الذكورة واضطراب العلاقة بين الهرمونات المنظمة لعملية التبويض وفشلها  واضطراب البريود وقلتها وظهور شعر كثيف بالجسم وحب الشباب والبشرة الدهنية  .

ومن اهم العلاجات اللى استخدمت لعقود الادوية اللى بتحسن حساسية الانسولين زى السيدوفاج وادوية تنشيط التبويض سواء اقراص او حقن وممكن توصل لعملية منظار بطن علاجى.مع اتباع نظام غذائى للتخسيس او عمليات السمنة . والنتائج مرضية فى حالات كتير وبيحصل حمل خلال 6 شهور من المتابعة ..ولكن حالات اكتر بتوصل لعملية الحقن المجهرى وبيحصل حمل واحنا محلناش المشكلة الاساسية وهى مقاومة الانسولين ..

مع انتشار انظمة الدايت قليلة النشويات عالية الدهون زى الكيتوجينيك دايت  ونجاحها فى تحسين حساسية الانسولين اتعمل دراسات كتير منها دراسة حديثة على سيدات عندهم تكيسات مبايض بالتاريخ المرضى والاعراض والتحاليل .. سنهم من18-45 سنة وBMI>27
وتم متابعتهم بالوزن والتحاليل كل اسبوعين وعمل استطلاع عن رايهم الشخصى فى تحسن الاعراض .

التحاليل كانت عبارة عن تحاليل هرمونات التبويض وهرمونات الذكورة ودهون فى الدم وانسولين صايم وسكر تراكمى وسكر صايم

النتايج كانت ايجابية بالنسبة لهرمونات التبويض واتحسنت العلاقة لصالح حدوث عملية التبويض بنجاح وهرمونات الذكورة المسئولة عن الشعر الزائد وحب الشباب والبشرة الدهنية نسبتها قلت بدرجة ملحوظة

نسبة الانسولين الصايم قلت بدرجة ملحوظة ما معناه حساسية الانسولين اتحسنت

الوزن نتايجه كانت ايحابية .. وانتظام البريود كان ايجابى وكل مؤشرات رضا السيدات كانت ايجابية

ضغط الدم اتحسن لحد ما.. تحاليل الدهون محصلش فيه تغيير ملحوظ على المدى القصير.

وتاثير الكيتودايت على تكيسات المبيضين وعلاج تاخر الحمل مجال بحث ودراسة فى مراكز البحوث الطبية عالميا

وانتظروا المقال القادم لشرح تفاصيل نظام الكيتوجينيك دايت الغذائي

-----------------

مدرس مساعد امراض النساء والتوليد.جامعة بنى سويف

اضافة تعليق
لن يتم نشر عنوان بريدك الإلكتروني
الحقول المشار إليها إلزامية. *