الجمعة
09 محرم 1440
21 سبتمبر 2018
11:42 ص
فركش

تورتة الفضائيات.. بالهنا

ضياء دندش
ضياء دندش
الإثنين، 13 أغسطس 2018 10:48 م

قناة بيراميدز.. إمكانيات ولكن
** كنت أحد الذين رفضوا قرار الحكومات السابقة بإلغاء منصب وزير الإعلام وكم أشعر بأنني كنت علي حق في رفضي هذا خاصة خلال الثلاث أربع سنين اللي فاتوا مع هذه الحالة المتردية المزرية التي وصل لها الإعلام.. كله بيلعب وبيهجص وبيملا الشاشة والسلام ومش مهم مصلحة البلد وبقت الحكاية "بابا غنوج" ع الآخر ..لكن لو كان عندنا وزير إعلام كان هايبقي مسئول سياسياً ومهنياً ويظبط الأداء الخاص والعام بدال القرف اللي بنشوفه ده.. شوية مأجورين لسه بيخبطوا فـ البلد وشوية بيلعبوا سبوبة وشوية بيقبضوا مرتبات وحوافز وخلاص.. وعندي اقتراح ممكن نعمل استفتاء محدد الشروط بعودة وزير الإعلام وهانحترم النتيجة مهما كانت..!! 
** كلام وحواديت عمالة تتقال عن دمج بعض القنوات الخاصة وعن بيع بعضها وعن كيانات بتتحكم في الحكاية من أولها لآخرها وآخر ماسمعته أن هناك سيطرة علي بعض القنوات بالنسبة لفرض مسلسلات من شركات بعينها لقنوات بعينها وممنوع الخروج عن كده.. وإن فيه مذيعين ومذيعات بيتم تحريكهم زي قطع الشطرنج من لعيبة محترفين.. وكل ده طبعاً كلام يرعب وينذر بهدم آخر طوبة في صناعة الدراما لأن فيه شركات مش أحوات هاتوقف شغلها وها تتاجر في قشرالبطيخ ومخرجين ومؤلفين ها يقشروا بصل عشان خاطر شوية أباطرة حطوا التورتة في إيديهم وبيقسموها علي مزاجهم.. وعن نفسي باسمع كتير ومش عارف الحقيقة فين.. لكن الأكيد إن العلم عند الله وهو سبحانه اللي هايفكها من عنده..يارب..!! 
** تقرير شركة صوت القاهرة أعجبني وعشرة علي عشرة فيما يخص المخصصات المالية لرئيس الشركة لأنني أعرفه معرفة شخصية تمتد إلي ربع قرن من الزمن وأعرف سلوكياته وأخلاقه ونزاهته لايستطيع أحد مسها بحرف.. لكن الجزء الخاص بأنه لن يتم المساس بالشركة حسبما نشر البعض بتصفيتها وأنا قلت الأسبوع الماضي إن القطة أكلتها فلست مقتنعا بأن أي جهة ستنقذ الشركة العريقة وإعادتها لأيام العز والأبهة لسبب بسيط هو أنه تم بالفعل نقل مئات العاملين بها إلي الأب الروحي ماسبيرو"الميت إكلينيكياً" وتم توزيعهم علي القطاعات المختلفة ويادوبك فاضل شوية بالعباسية وحبة بالوكالة بالدقي يبقي اللي بيتقال صح واللا غلط.. وإذا كان اللي صعبان عليه الشركة وحزين عليها من بره ماسبيرو أمال ولادها يعملوا إيه.. وحسبي الله ونعم الوكيل في القطة اللي بتاكل ولادها..هاييجي تعبان يقرصها..!! 
** بالنسبة لقناة بيراميدز الوليدة بنت كام يوم فإن إمكانياتها المالية تفوق إمكانيات البشر اللي بيظهروا علي شاشتها.. حرام يتعمل فيها الشغل التقني والتكنولوجيا الرائع ده ويطلع علي شاشتها الفاشل والعاجز والجاهل وصاحب السبوبة.. وخسارة يبقي إيهاب جلال رئيس القناة ومعاه أدوات تعبانة لأن إيهاب واحد من أنجح الإعلاميين الذين أسسوا قنوات رياضية وارجعوا لقناة النهار الله يرحمها وطلع فيها علي إيد إيهاب نجوم زي كريم حسن شحاتة ومحمد عباس وغيرهما.. وأكيد فيه أسباب معرفهاش أقوي من إيهاب فرضت عليه الخلق دي..ياناس حرام ده واحد اسمه أحمد عفيفي خريج نظم معلومات وبيدرس إعلام مفتوح بفلوسه كان بيولع الفيس بوك بين الأهلاوية والزملكاوية وبعدها خدع عمروعبدالحق وأوهمه إنه عنده مشاهدة بالملايين وبعدين دخل dmc إزاي معرفش وكل اللي فيها أباطرة إعلام وبعد ماقفلت dmc سبورت هوب نط علي بيراميدز وبيقدم ستوديو تحليلي وهو مالعبش حتي طاولة ع القهوة.. والله العظيم تلاتة حرام الفلوس اللي بتتصرف دي علي ناس "محروقة".. وإيهاب جلال "معاك ربنا"..!! 

اضافة تعليق
لن يتم نشر عنوان بريدك الإلكتروني
الحقول المشار إليها إلزامية. *