السبت
08 صفر 1440
20 أكتوبر 2018
08:39 ص

ولسة هنحلم

أمل الوكيل
كلمات / أمل الوكيل الجمعة، 10 أغسطس 2018 01:54 م

من سنتين واحده صاحبتي قررت تروح رحله .. لوحدها مع نفسها مع ناس غريبه .. فجأه بدون اَي مقدمات اشتركت في رحله مش عارفه حتي تفاصيلها .. 
سألتها انتي ليه عملتي كده؟؟
ايه الي خلاكي تقرري تسيبي ولادك و تسافري لوحدك؟؟
ورحله كلها طلوع ونزول جبال كمان؟؟
اجابت لأني اما سافرت و قعدت وسط الأجانب لقيت راجل إنجليزي عنده 70 سنه بيتعلم الغطس عشان نفسه يروح يغطس في راس محمد ..
قابلت واحد امريكاني عجوز قرر يتعلم يعزف اله موسيقية معينه عشان لقي نفسه بيحبها ..
لقيت الناس  لسه بتحلم ..
لسه  عايزه تعمل حاجه ..
لسه بتتعلم ..
لسه بتحاول ..

بعد كلامها قعدت أفكر امال احنا مالنا؟ 
ليه اما بنتجوز ونخلف ونشتغل احلامنا بتقف ..
مش بس بتقف لا دي بتموت !!!
و كأن اهم اهدافنا كانت الجواز والخلفه والاستقرار ... وشكرًا !!
هو لو احلامنا حتقف عند المرحلة دي ال 25 و لا 30 طب ليه بنعيش لحد ال 70 واكثر حسب الاعمار المقدرة!! 
كان الأولي بقي نتجوز ونخلف ونكبر العيال شويه ونموت ... ماهو كله خلص خلاص...
ليه حتي أما بيكون عّندنا احلام في الوقت ده بتكون مرتبطه بالآخرين ؟
يعني لو سالت اَي حد دلوقتي نفسك في ايه ؟ 
حيقولك نفسي ولادي يكونوا احسن ناس في الدنيا .. حلو و تمام و جميل .. يارب دائماً ..
بس برضو انت بقي نفسك في ايه ؟؟ 
انت كإنسان ..كفلان؟؟
حيقولك : الستر .. الصحه .. السعاده ..
حلو اوي يارب طبعا ... دي امال و احلام كل البشر .. في كل الارض..
انت .. انت بقي .. انت تحديدا .. نفسك في ايه .. أحلامك ايه
حتلاقيه سكت .. هنج... فصل .. بيفكر ... بيفتكر من بعيد .. و حيبذل مجهود فظيع انه يفكر في حلم خاص بيه تحديدا .. يخصه لوحده منغير عيلته .. منغير مسؤلياته ..
أقولك حاجه حلوه .. عايز تسهلها عليه .. قولوا حلمك كان ايه وانت صغير ؟؟
حتلاقيه انطلق في الكلام ومش حتقدر توقفه ..
كان نفسي أكون لعيب كره .. كان نفسي أبقي نجم سنيما ... كان نفسي ابقي غني والف العالم ... 
كان نفسي ... كان نفسي ...
ايوه بقي دلوقتي نفسك تبقي ايه؟!
امتي توقفت عن الحلم ؟؟
امتي بطلت تحلم .. و بقيت تلف في الدائره .. تمشي زي القطيع ... 
تتحرك من مسؤلية للي بعدها... 
تتنقل من دور لدور ...
امتي سقف أحلامك نزل ووقف مباشره فوق رأسك؟؟
ايه الي حصل؟؟
اما كبرنا أحبطنا من احلامنا الكبيره .. 
او حققناها و تخطيناها .. 
وعشان كبرنا وعقلنا بقت القدره علي الحلم بأحلام كبيره جديده عبء علينا .. 
لان احنا اصلا عندنا مسؤليات كتير  .. 
مش ناقصين كمان يكون عندنا احلام .. 
لكن ..
سمعت من يومين كلمتين  رنوا في دماغي.. 
احنا عايشين بالاحلام البسيطه والانتصارات السابقة .. 
شويه احلام بسيطه فوق بعض .. 
علي انتصارات ورا بعض هي الي بتخلينا مستمرين .. 
هي الي بتحلي الأيام .. 
هي الي بتخلينا سعدا .. 

ركزت في اننا واحنا صغيرين .. 
زي ماكان عندنا احلام عريضه و بعيده ... 
كان عندنا احلام صغيره جدا .. و تافهه جدا ... 
كنّا أما بنحققها بنموت من السعاده .. 
و كانت كتير ... 
نحلم ان احنا نطلع رحله مع صحابنا ... 
نحلم ان احنا نسهر و نرجع متاخر ... 
نحلم ان احنا نشوف شخصيه مشهوره ... 
نحلم ان احنا نروح مكان معين عمرنا ما روحناه... نحلم ان احنا نسافر لوحدنا ... 
احلام و احلام .. تافهه بسيطه ..
طب الأحلام العظيمه  أصبحت عبء 
حصل ايه للأحلام التافهه البسيطه؟؟ 
في زحمه الحياه تخلينا عنها و نسيناها .. 
و استتفهناها... 
لا طولنا الكبيره و لا سعينا للصغيره..

الحقيقه ..
انك من المستحيل فعليا انك تحقق انتصارات عظيمه طول الوقت ... 
او انك تجري ورا احلام عظيمه طول حياتك  .. 
لكن الي ممكن فعلا .. 
الي قابل للتحقيق ...
انك تجري ورا احلام تافهه بسيطه .. 
و تحققها .. 
و تستمع بقدرتك علي تحقيقها ... 
و تتنقل من حلم لحلم ... من حاجه لحاجه ..
و تسعي و تحاول و تخطط .. 
و تقع .. 
و تحقق .. 
او تفشل ... 
و تغير الحلم .. 
او تصر عليه ...
الأحلام دي الي بتدي طعم للحياه ..
الي بتحسسك انك لسه عايش ...
لسه موجود ...
لسه فيك نفس .. طاقه ..
لسه هتحلم
امتي حنجمع احلامنا؟؟
امتي حنحاول نحققها؟؟
امتي حنحبط و نرجع ننبسط ؟؟

في حب الأحلام الكبيره .. 
والأحلام التافهه البسيطه ..

لو حتكتب قائمه باحلامك .. 
حاتحط ايه و تكتب ايه..
ركز كويس ..
أحلامك انت كشخص .. 
مش لاسرتك و لا الي حواليك .. 
أحلامك  كإنسان

اضافة تعليق
لن يتم نشر عنوان بريدك الإلكتروني
الحقول المشار إليها إلزامية. *
احمدددددددد
الثلاثاء، 09 أكتوبر 2018 04:24 م
كلام جميل جدا استمري يا استاذه امل انا متابع حضرتك من و حضرتك وكلامك جميل