الإثنين
02 ذو القعدة 1439
16 يوليه 2018
08:46 ص

يا فرحة ماتمت

images
الأربعاء، 11 أبريل 2018 09:10 ص

ايه ده، مالكم قاعدين مستنيني كدة ليه؟ انتوا مبقتوش تعرفوا تبداؤ يومكم من غير متفرحوا فيا ولا ايه ؟!، عموما احب اطمنكم انا مبقتش اخاف، انا بقيت بترعب بس ، … خصوصا بعد ليلة امبارح.

بعد ليلة طويلة من الشد والجذب في البطانية بيني وبين عفاريتي، اللي الواضح ان مبقاش وراهم شغلانة غيري، اخيرا قراروا يسبوني أنام ... بس انا كمان قرارت اني لازم احط حد للموضوع ده ، ظبط المنبه علي وقت أذان الفجر وقلت أروح احكي لشيخ الجامع علي اللي بيحصلي، طبعا شيخ كبير وعلامة والناس بتشهدله في الموضوع ده وقلت اكيد هو اللي هيحلهالي ، وفعلا قمت الفجر اتوضيت ولبست، ومشغلتش بالي خالص بالعفريتة الكيوت اللي واقفة تحضرلي الشاي في المطبخ وانا اصلا بايت لوحدي ، ونزلت رايح الجامع وبرضوة مرضتش اقف لندي اللي مستنيني علي نصية شارعهم وفضلت تجري ورايا لحد الجامع، وفضلت اقنع نفسي ان كل ديه تهيؤات وانهم مش موجودين اصلا ، المهم وصلت الجامع وصليت الفجر، طبعا راحة نفسية وسلام داخلي رهيب بعد صلاة الفجر ?، استنيت الشيخ لحد مخلص كلام مع حد معاه وروحت رايح قاعد جنبه

- صباح الخير يا شيخنا

= صباح النور يابني

- شيخنا انا مش هعطلك والله، بس اللي بيحصلي اليومين دول شئ لا يصدقه عقل

= طب استعيذ بالله من الشيطان الرجيم بس واهدي وقولي مالك

- بص يا شيخ انا أدهم ساكن هنا قريب من الجامع ومشكلتي ان العفاريت بتبدل الورديات عليا يا شيخنا

= ايه؟!!!

- والنعمة زي مبقولك كدة، هحكيلك

... ورحت حاكي كل اللي حصل معايا للشيخ من اول موضوع ندي لحد البطانية، والاصطباحة العسل بتاعت النهاردة ، بصراحة الشيخ كان متأثر جدا باللي حكيتهولوا وحسيت اني صعبت عليه.

- بس يا شيخنا، ولحد قبل مدخل الجامع دلوقتي وندي بتجري ورايا عايزاني اوصلها تاني

= لا حول ولا قوة إلا بالله، يابني الله يكون في عونك، واضح انك ملبوس

- ايوة يا شيخ يعني هموت ولا ايه

= لا يابني مش للدرجة ديه، بص الجن والعفاريت كيانات موجودة وعايشة معانا وذكرت في القرآن الكريم وديه حاجة مفيش اختلاف عليها.

- انت بترعبني ليه يا شيخنا انا عايز حل للي انا فيه

= طيب بص يابني، أنت تقوم تروح دلوقتي علي البيت، وبهدوء تشغل سورة البقرة وتسيبها شغالة في البيت، وياريت لو عندك كام عود بخور حلوين كدة تولعهم في الشقة، وتقعد تستغفر وتستعيذ بالله، وان شاء الله كله هيتظبط.

- بالسهولة ديه يا شيخنا

= أيوة، ان شاء الله كله هيبقي تمام معاك.

- ربنا يكرمك يا شيخنا يارب يا قمر انت

... اخدت بعضي وطيران علي البيت، دخلت لقيت الدنيا هادية علي الاخر، تقريباً عرفوا نيتي فخافوا وهربوا مني ، روحت داخل علي الكمبيوتر مشغله وشغلت سورة البقرة وعليت الصوت عشان يتسمع في الشقة كلها، وجبت كام عود بخور من فوق التلاجة مكان ما بشيلهم عشان اولعهم في يوم الجمعة ورحت حاطط في كل ركن في الشقة عود، وقعدت اعمل اللي الشيخ قال عليه،... بدأت استغفر واستعيذ بالله منهم وصوت الشيخ العجمي بيجلجل في الشقة والبخور ريحته عبقت المكان، بصراحة حسيت نفسيتي ارتاحت وفرحت جداً لما لقيت كل شئ هادئ، مفيش اصوات ولا خيالات ، قلت بس الحمدلله خلصت منهم .
... وهوب دبل كيك لقيت العفريتة الكيوت خرجالي من المطبخ بكوباية الشاي وهي غضبانة انا كشيت في الكرسي اللي قاعد عليه ومعرفش ليه حسيت انه سخن من تحتي راحت واقفة قدامي وبصالي وقالتلي

- انت ازاي تنزل من غير متشرب الشاي اللي عملتهولك، طب ينفع كدة

= لا..لا

- أنت هتغني كمان والقرآن شغال.

= لا والله مقصدش يا هانم

- بس انا المرة ديه هسمحك عشان انا بحب ريحة البخور اللي انت ولعته، وكمان انا مسلمة وبحب اسمع القرآن...... فمتحولش


اضافة تعليق
لن يتم نشر عنوان بريدك الإلكتروني
الحقول المشار إليها إلزامية. *