الأحد
09 شوال 1439
24 يونيو 2018
06:29 م
تمثيلية إذاعية

المتاهة والإعصار (الجزء الثاني)

نهى علي
قصة وإعداد إذاعى / نهى على الخميس، 15 مارس 2018 01:41 ص

م(1) حياة فى ترحاب فاتر :
أهلا وسهلا يا عمى عطية نورت
عطية فى هدوء وتملق :
دا نورك يا بنت أخويا عاملة إيه يا حياة إنتى والولاد
حياة فى هدوء حزين :
الحمد لله والشكر لله
عطية فى نبرة ملتوية :
بس أنا مش عاجبانى قعدتك لوحدك يا حياة معقولة بيت عمك ومرات عمك يبقى مفتوح وإنتى تقعدى لوحدك كدا
حياة فى هدوء جاد :
أنا مش لوحدى يا عمى معاى ربنا أولا وأخيرا إللى أحسن من الكل ثانيا أنا قاعدة فى المنيرة بيت أبويا وأمى الله يرحمهم والجيران وأهل الحتة حواليا
عطية يطقطق وفى نفى :
ميصحش يا بنت أخويا برضوا يا إما تقعدى مع أهل المرحوم فى البحيرة أو تيجى عندى والبيت دا نشوف له صرفه
حياة فى إستخفاف وشىء من الإحتقار :
أه ما تقول كدا من الصبح يا عمى وسيبك من دخلة الخوف والمحبة دى عاوزنى أبيع البيت مش كدا
عطية فى حماس وطمع :
أه نبيعة العمارة تجيب دلوقتى شىء وشويات ومحدش وريث فيها غيرى أنا وإنتى نبيعها وتبقى على وش الدنيا بدل الفقر والضنك إللى إنتى عايشة ومعيشة فيه ولادك
حياة فى حدة وصوت عال :
على جثتى يا عطية مش حيحصل وبيت أبويا مش حبيعة
عطية صائحا :
عطية حاف كدا أما إنك قليلة الربابية و........
حياة فى غلظة وغضب :
ولا نص كلمة زيادة إلزم حدك إيه مكفكش إللى عملته فيا زمان جى تكمل عليا دلوقتى
عطية فى حدة :
عملت فيكى إيه .. سترتك وجوزتك راجل محترم بدل الهلفوت إللى كان راهنك جمبه وبعدين دا مش موضوعنا
عطية فى نبرة تهديد :
البيت حتباع بالذوق بالعافية
صوت خطوات وفتح الباب
حياة فى نفس النبرة :
شرفت يا عمى
عطية فى عصبية :
بتطردينى يا حياة مش أخر المطاف يا بنت عثمان الحكيم
صوت صك الباب
حياة فى شجن وهى تبكى :
منك لله يا شيخ حسبى الله ونعم الوكيل فيك
نقلة موسيقية
م(2) جيهان فى نفاذ صبر :
عاوز إيه يا حاج رضا
رضا فى إسلوب معسول :
عاوز الرضا يا جيهان وربنا المعبود شاروى إنت بس وأنا حقولك شبيك لبيك أنا عاوزك على سنه الله ورسوله
جيهان فى صوت محتد :
يحنن يا عنيا إسمع يا راجل إنت إما لمتش نفسك وبعدت عن سكتى وإحترمت شيبتك دى لأكون مفرجه عليك عبيدو إوعى من سكتى بلا قلة قيمة
رضا فى إصرار :
برضوا وراكى يا جيهان مش حسيبك
نقلة موسيقية
م(3) رنين جرس الموبايل
طارق فى نبرة عادية :
ألو
منار فى إنهيار :
أيوا يا طارق مبتردش على أرقامى ليه
طارق يزفر وفى نبرة محتدة :
أوووف بقا إنت عاوزة إيه قولتلك كل شىء إنتهى
مراتى عرفت كل حاجة وخيرتنى بينك وبينها وأنا إخترت بيتى وولادى
منار وهى تبكى بمرارة :
بالبساطة دى إيه لدرجة دى أنا كنت ولا حاجة عندك إمال فين كلامك فين مشاعرك إنت حياتى يا منار مقدرش أعيش من غيرك إنت عمرى
طارق فى نفاذ صبر :
بصى بقا يظهر إنك بتحبى تعيشى الوهم كتير براحتك أنا مش فاضى ليكى ومتكلمنيش تانى ولا تبعتى على الفيس أو الواتس خلى عندك كرامة
منار فى صدمة ومرارة وهى تبكى :
طارق ....... طارق .....طار
نقلة موسيقية
م(4)
حياة فى إشفاق وهوادة :
خدى إشربى كباية الليمون دى حتروق دمك دا شىء متوقع يا منار
منار فى إنهيار :
خلاص الحكاية خلصت كدا أنا بحبه يا حياة بجد ومش قادرة أبعد عنه
جيهان فى غيظ وتوبيخ :
مش قادرة تبعدى عنه يعنى إيه إيه يا بت إنت البعيدة معنديش دم ولا ريحة الكرامة
منار وهى تبكى :
كفايا يا جيهان
جيهان فى نفس النبرة :
فوقى الله يخرب بيتك دا رمة ميستاهلش ظفرك ولا إيه يا حياة متكلمى
حياة فى إشفاق :
أنا مقدرة مشاعرك يا منار بس لازم تنسيه ميستاهلكيش إنت كنتى تسالى ليه
منار فى صوت خفيض :
خلاص يا حياة أنا كويسة متقلقوش
أنا طالعة أرتاح شوية عن إذنكم
نقلة موسيقية
م(5) ممدوح فى نبرة هادئة :
إشرب شايك يا وليد وروق جيهان إنت عارفاها كويس زى ما إحنا عارفناها ولا ناسى إننا كلنا ولاد حته واحدة
جيهان عنيدة ولسانها متبرى منها تلاته متر قدام
وليد فى ضيق :
عارف يا ممدوح بس مش عارف أعمل إيه
ممدوح فى تهدئة :
بالسياسة العنف مش حجيب نتيجة معاها
وليد فى قلة حيلة :
قولى أعمل إيه أنا بحبها وعاوز أرجعها وألم حياتى وأعيش معاها ومع بنتى بقا
ممدوح فى إقتراح :
عندك حل واحد مالوش تانى صحابها منار وحياة
وليد فى عدم فهم :
مش فاهم
نقلة موسيقية
م(6) جيهان فى هدوء :
الشاى يا حياة
حياة فى نبرة شاردة :
متشكرة يا جيهان
جيهان فى نبرة هوادة :
إن شاء الله حتفرج يا حياة إرمى حمولك على ربنا
حياة تطلق تنهيدة طويلة وفى نبرة شجن :
والله ماليش غيرة بس لازم أشتغل يا جيهان المعاش مش مكفى لمصاريف الولاد والبيت مش نافعة خالص
أنا كلمت ناس كتير والكل بيسمع ويوعدك ويكبر دماغه أنا مش أدور فين بس
جيهان فى هوادة :
إن شاء الله ربنا حيفرجها
حياة فى تساؤل :
أخبار منار إيه مختفية بقالها فترة وبقت قليلة الكلام من بعد موضوع طارق دا
جيهان فى حيرة :
والله ما أنا عارفة منار بقت تصرفاتها غريبة وأمها على طول بتشتكى منها أنا خايفة عليها قوى يا حياة
حياة فى قلق :
ربنا يسترها يا جيهان
نقلة موسيقية
م(7) ممدوح فى تحفيز :
يا فارس يا بن عمى حتة الأرض دى لقطة موقعها تحفه ممكن نبنى عليها المطعم
فارس فى تعقل :
ندرس الموضوع الأول يا ممدوح الفلوس إللى جمعتها دى شقى العمر تعب وممرمطة فى بلاد الخليج ذل وهدة حيل
ممدوح فى جدية :
عارف والله وعمرى ما هقولك حاجة إلا إذا كنت متأكد منها إنت بتعمل مستقبل لبنتك
فارس فى هدوء :
خلاص نروح نشوف حتة الأرض وربنا يكتب إللى فيه الخير
ممدوح فى سرور تماااا.........
رنين جرس الموبايل
ممدوح فى نبرة عادية :
أيوا يا وليد لأ أنا عند فارس بن عمى فى البيت إيه
أه كلم صاحباتها وبالتحديد حياة الحكيم ليها تأثير عليها حياة عاقلة وزينة الستات ماشى هشوفك بكرة إن شاء الله سلام
فارس يتنحنح وفى شىء من الفضول :
وليد صالح دا
ممدوح مجيبا :
أه يا سيدى جيهان مطلعة عينه وعاوز يردها ومنشفة دماغها
فارس فى نفس النبرة المتسائلة :
هى حياة الحكيم رجعت من سفرها
ممدوح فى نبرة عادية :
حياة جوزها إتوفى من مدة ورجعت بيت أبوها مع ولادها قاعدة فية إنت بتسأل ليه مالك يا فارس ؟
فارس فى نبرة نفى :
أبدا مفيش لفت نظرى الكلام بس
ممدوح فى نبرة غامضة :
أه
نقلة موسيقية
م(8) عطية فى غل واضح :
خلاص كدا يا زكية البيت راح لا والله ميتقالش عليا راجل وألبس طرحة إما كسرت أنفها حياة
زكية فى طمع وتحريض :
إنت عارف العمارة دى تسوى قد إيه إشتغلها فى الأزرق يا عطية إن شاء الله  تفضحها وتكسر عينيها بأى حاجة المهم توافق على البيع
عطية فى توعد :
هو أنا حسيبها يا زكية أنا ماليش شغلانه غيرها حتبيع يعنى حتبيع أنا بس لابد ليها فى الدره أتكتك ليها كدا الصبر طيب يا حياة
نقلة موسيقية
م(9) حياة فى نبرة باكية كلها ألم :
كدا تطلقنى يا فارس هونت عليك بالسرعة دى بتخلى عنى
فارس محاولا التماسك فى نبرة مختنقة :
طلقتك عشان مظلمكيش أنا مشوارى طويل عندى أمى وأختى لازم أطمن عليها
عمك معاه حق
حياة فى إنهيار :
إنت عمرك ما حبيبتنى ... أنا كنت نزوة وخلاص خلصت ...... أنا بكرهك يا فارس بكرهك
وأقل واحد عندى أحسن منك أنا حتجوز صبرى ومش عاوزة أشوف وشك تانى
صوت بكاء حياة
فارس محدثا نفسه :
طلقتك عشان خفت عليك ..... كان مشوارى طويل يا حياة كل شىء قسمة ونصيب خلاص
كل واحد راح لحاله إنتى إتجوزتى صبرى وأنا إتجوزت هالة جوازة تقليديه بس بتحبنى وإتحملتنى وبقت أم بنتى
إيه يا فارس مالك إستعذ بالله من الشيطان ربنا يصلح حالها وحالك
نقلة موسيقية
م(10) منار فى هدوء :
أهلا يا وليد خير طلبتنى أنا وحياة
حياة فى نبرة لطيفة :
أخبارك يا وليد بقالنا كتير مشفنكش
وليد فى نبرة هادئة :
والله مشاغل الدنيا يا أم أدم بس الغالين عمرهم ما يتنسوا أبدا
حياة فى نبرة رقيقة :
تسلم إحنا تحت أمرك
وليد فى نبرة هادئة ولكنها شجينة :
الأمر لله وحدة
أنا لسه بحب جيهان يا أم أدم وعاوز أردها ونتلم أنا وهى وبنتنا
منار فى تهكم :
دلوقتى بقت بنتك وبتحب جيهان إمال لما إتجوزت عليها دا إيه
حياة تتنحنح
وليد فى نبرة ندم :
خليكى محضر خير يا منار أنا غلطت وضعفت كلنا بنغلط وعرفت قيمة جيهان
ربنا بيسامح يا ستى
حياة فى إشفاق :
أنا مقدرة شعورك يا وليد بس إنت جرحت جيهان جرح كبير خصوصا لأنها بتحبك من صغرها كان صعب عليها قوى بس أوعدك إننا نتكلم معاها وربنا يقدرنا ونكون سبب فى الخير ويتلم شملكم تانى ولا إيه يا منار ؟؟؟؟؟؟؟؟
منار فى هدوء :
حنكلمها وربنا يهديها جيهان
نهاية الجزء الثانى


اضافة تعليق
لن يتم نشر عنوان بريدك الإلكتروني
الحقول المشار إليها إلزامية. *