المؤسسة المالية والاستثمارية الرائدة في الاسواق الناشئة والمبتدئة
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

محمود البدوي

ما تيجي نغلس على مصر !

بقلم .... محمود البدوي

السبت 14 ديسمبر 2019

عندنا مثل بيقول (متخافش من الهبلة وخاف من خلفتها) أه لازم تخاف من ابن الهبلة، ده أهبل وأكثر هبل من اللي خلفته ، وقدمته هدية للبشرية علشان يكمل مسيرتها في الهبل والرخامة على خلق الله ، وابن الهبلة هنا نام وقام وقال ايه؟

قال أنا ازاي قاعد كده ساكت والبلد الغلبانة الشقيانة اللي احنا بنزق عليها كل تيارات الإرهاب من 2011  وحتى الآن لسه واقفة على رجليها ؟ لأ وأيه كمان دي عمالة تبني وتعمر في كل شبر ، إشي انفاق وإشي قناة سويس جديدة ، وإشي انفاق تحت القناة لتعمير ومد شرايين الخير لسيناء ، لأ وكمان الجبابرة المصريين دول رايحين يطوروا جيشهم بأحدث الأسلحة، وبينوعها كمان، صواريخ تلاقي طائرات حديثة تلاقي حاملات طائرات ما يضرش ، غواصات تطلق صواريخ لمدى 130كم شغال ، يا نهار ابيض ومخطط كمان ، هوا إزاي انا عمال ارازي فيهم من ناحية وقطر بتمدني بالمال الحرام من ناحية تانية ومش عايزين يقعوا ، ولسه البلد واقفة على رجليها ، هو ازاي رئيس البلد دي بيقف له زعماء العالم إجلالًاٌ واحتراماً وأنا وتميم بينفضولنا وبيعاملونا معاملة نص كم !

والعبيط هنا لمن لا يعلم هو حفيد سليمان القانوني السفاح، ابن بايزيد الثاني اللي نفي اخوه الأمير جيم بعد وفاة والدهما السلطان محمد الفاتح الدموي القاتل ، وهنا لازم كمان تعرف أن سليم الأول ده واللي سموه (سليم الغازي) ده قتل أبوه بعدما طمع في عرش الدولة العثمانية ، وقتل كل اخواته وزوجاتهم واولادهم بما فيهم الرضع منهم بدم بارد واللي حاول يقتل ابنه بعد ما شك انه عايز يزيحه من كرسي السلطنة، واللي ثبت ان اصوله تمتد الي المغول السفاحين، وده بيفسر  أفعال حفيدهم السفاح المجنون راعي الإرهاب والإرهابيين والدواعش بالمنطقة أردوغان، واللي راح قعد في قعدة مزاج مع رئيس حكومة الوفاق (منزوع الصلاحيات) المدعـو فايز السراج، بليبيا الشقيقة، وفي وسط قاعده انبساط وقاله..... بقولك ايه يا أبو الفوز ، قاله عيني يا قردوا قول يا غالي ، قالوا ما تيجي نغلس على مصر ؟

رد السراج وقال : يا نهارك ابيض يا قردوا ، مصر مين ياعمونا اللي عايز ترازي فيها وتغلس عليها هو احنا قد مصر، فوق كده يا شقيق وسيبك من حبوب الهلوسة دى اللي مخلياك فاكر نفسك حاجة ، وتقدر تغلس على مصر ، دي مصر يا شقيق فاهم يعنى ايه ولا أفهمك انا ؟

رد قردوا وقال : يا جدع متقلقش ، احنا هانسوق الهبل علي الشيطنة ، ونعمل اتفاقية بينا اننا نعيد ترسيم الحدود البحرية بينا ، وننط ليهم في سبوبة الغاز الطبيعي بتاعة البحر المتوسط ، واهو أي غتاته والسلام .....رد منزوع الصلاحيات وقاله : بس يا قردوا انا منزوع الصلاحيات بموجب اتفاقية الصخيرات .

قالوه قردوا : يا جدع بقولك ها نغتت عليهم ونرازي فيهم ، لا صخيرات ولا حلويات ، ومن عندي هازق عليهم شيخ الفتن والضلال الغرياني الإخوانى اللي قاعد عندنا في إسطنبول وعمال ياكل في شاورما تركي ، ويسمع أغاني آمان يا لا للي ، واهو يبقي عمل بلقمته ، يحبشلنا كده كام تصريح من طراز (طق حنك ارض جو) يضفي مشروعية ومهلبية على الغتاتة بتاعتنا ، واهو كله بيرزق من فضل الله .

- قووووووم ايه (بصوت سليمان باشا غانم في مسلسل ليالي الحلمية) تطلع البحرية المصرية القوية الفتية ، تتمشي في شموخ وكبرياء في عرض البحر الأبيض المتوسط ، ماشية فاردة قلوعها  في البحر الأبيض بحاملات طائرتها وغواصاتها ، وفجأة الدنيا تظلم والسماء تغيب شمسها بعد ما حجبها نسور الجو المصريين من قائدي الطائرة الرافال (الذكية المقاتلة المخيفة) ، ومعهم اخوتهم من قائدي  المقاتلة الهليكوبتر (كا52) الروسية واللي أقلعت من فوق سطح حاملة الطائرات المسترال (أنور السادات) ، مشهد يخض ويخوف.

- وهوب قووووم ايه ؟ تطلع الغواصة المصرية زي الوحش الأسطوري اللي بيخرج من قلب الماء لتطلق صاروخ مداه 130 ميل بحري ، وكأن البحرية المصرية وفوقها القوات الجوية بيقولوا ( نوديكي فين ياصحة ) واللي نفسه يجرب يبقي يتجنن في عقله ويقرب .

- ده مشهد الجزء الأول منه عبثي تخيلي خطر علي بالي بين بلطجي تركيا (الجبان) اللي بيذكرني بالرجل قصير القامة بمسرحية تخاريف اللي كان بيقول لبطل المسرحية (ماتقدااااارش) واللي كان بيبلطج وهو لا يملك أي شيء يدلل على تلك البلطجة او حتى يدعمها ، وبين الطرف الآخر من هذا الحوار العبثي وهو فايز السراج ، رئيس حكومة الوفاق الوطني الليبي (منزوع الصلاحيات) واللي عمل فيها من بنها ، ونسي انه منزوع الصلاحيات فيما يخص ابرام المعاهدات او الاتفاقيات بموجب اتفاق الصخيرات ، بس عادي بتحصل في احسن العائلات ! ، أما الجزء الثاني فهو مشهد حقيقي للقوات البحرية والجوية القوية العفية المصرية اللي واقفين يحموا مقدرات مصر بالبحر المتوسط في مشهد مهيب يبُث الرعب في نفس كل طامع .

- وهنا بنقول إن مصر بلد مالهاش في كلام الصغار ، مصر دولة قوية وعفيه، وكمان  مصر دولة مشروعية دولية ، ولا تقبل بأن ينال من ثروات أبنائها أي بلطجي او حرامي مدعوم بفتاوي مدفوعة الأجر من مفتي إخوان ليبيا الإرهابي الغرياني ، مصر دولة ملهاش في الكلام ، مصر دولة أفعال مش اقوال ، مصر 2013 وما بعدها دولة قوية وقادرة وعفيه ، مصر دولة تملك الحلم والصبر ، بس ربنا يكفيك شر الحليم إذا غضب ، واهي طالعة تتمشي على نواصي البحر الأبيض المتوسط بنسور الجو ورجال بحريتها البواسل واقفين كما الأسود الشجعان بيقولوا احنا اهو ، واللي يقرب ها يدوق نيرانا ويجرب ، واللي يفكر يمد ايد او رجل على رزق وخير المصريين اللي ربنا انعم عليهم بيه من البحر المتوسط ها يرجع لبلده من غيرهم مذلول مدحور خزيان ، مصر دولة لا تعتدى على احد وتبادل كل دول العالم المحبة للسلام ، الخير بالخير والسلام بالسلام ، بس اللي يفكر ياخد حاجة من حقوقها يبقي هوا اللي جنى على روحه ، وخليك فاكر كلمة الكبير لما قال واقسم بالله العظيم (قسماً بالله اللي ها يقرب من مصر هانشيله من على وش الأرض  شيل)
 #خلص_الكلام