رَمَضَانَ والناس
هيرمس
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

لا "تيك أواي.. ولا مسلوق" يا فرحتك .. قدام العالم

بقلم .... ضياء دندش

الثلاثاء 08 يناير 2019

** تعالوا نحسبها ونفصصها بالراحة كده ودون فزلكة ولا طنطنة ولا فرد عضلات ولا كلام مجعلص من بتاع النخبة والعيال الخايبة.. ربنا سبحانه وتعالي هو اللي بيختار حاكم البلد دي.. وكمان عندنا مقولة فلاحي لما الحكاية تبقي مش ولابد "يا بلد عاوزة ولد".. طيب.. جه مواطن مصري صميم فوضناه يقف قصاد الإرهابيين ومعاه جيشنا وربنا قواهم لحد ما قربنا نخلص من الإرهاب.. وبعدها طلبنا منه يتولي أمور مصر ووافق وهو عارف إن الدنيا بايظة وخربانة من اقتصاد وصحة وتعليم والذي منه.. وقال "السيسي" بسم الله واعتمد علي الله الكريم ثم علي شعبه "الجدع" وشال الليلة علي كتافه وقعد يجري بالبلد وهاتك يا مشاريع تنمية وعمران وهوب راح عامل مبادرة "100 مليون صحة" عشان يخلص علي فيروس "c" ومعاه تحليل سكر وقياس ضغط ووزن ببلاش وده ما حصلش في العالم.. وجنب ده يعمل مبادرة "حياة كريمة" للناس الغلابة والمحرومة من حاجات كتيرة وكل أجهزة الدولة هاتشتغل فيها.. وهارجع أفكركم تاني لما أقسم الرئيس إننا في 30 يونيو 2020 هانشوف مصر دولة تانية خالص.. وأظن كلنا شايفين من الغربال اللي بيعمله يوماتي..يبقي ينفع نفكر ثانية واحدة إننا نسيبه يمشي بعد ثماني سنوات والبلد لسه بتبني نفسها علي إيديه ونرجع نعيده من تاني ونسيبها للمجهول.. كل واحد يجاوب بضميره.. وهنا نروح لحد "دستور 2014" اللي اتعمل علي مزاج ومقاس ناس وتكتلات وجماعات "تيك أواي" بطريقة اسلق يا جدع لكن مش علي مزاج ومقاس البلد.. وحوالي "40 " من مواده عبارة عن ألغام تحت أقدام الشعب إذا عاوز يغير منه حاجة ينفجر ويفرتكه.. ولأن الدستور مش قرآن ولا إنجيل ولا توراة وإحنا اللي عملناه بسرعة في فرن مولع نار يبقي إحنا اللي نغيره وياخد حقه في التسوية علي نار هادية وعندنا برلمان وجهابذة قانون دستوري يقدروا يعملوا ده وبعدها استفتاء بحق وحقيق بمزاجنا ونقول رأينا مش غصب عننا.. وبالنسبة للمعترضين علي كلامنا أقول "مصلحة البلد أعلي من أي حد".. وطبعاً هايقولوا يا بتوع النظام يا مطبلاتية.. أيوه أنا بتاع النظام اللي ماشي مع شعبه.. وكمان مطبلاتي لبلدي واللي مش عاجبه يتحزم ويرقص.. وتحيا بلدي.. تحيا مصر. 
** يا فرحتك قدام العالم يا مصر.. عمرنا شفنا "جامع وكنيسة" بيتفتحوا سوا.. أيوه.. أول امبارح في العاصمة الإدارية.. فهمتوا بقي..!! 
** يا هووووه.. عاوزين وزير إعلام.. الحكاية زاطت ومش حلوة..!! 
** عيني دمعت ود.جمال شعبان مدير معهد القلب بإمبابة بيقول في قناة dmc "أنا خدام قلوب المصريين".. يسلم قلبك يا راجل. 
** كتبت كتير عن "ديفوهات" قناة "أون سبورت".. ولأنها إعلام للمصريين بجد جابوا أيمن سالم صاحب الخبرة في "مودرن سبورت" و"dmc سبورت" ونتعشم أن يرحمنا من المعلقين علي ماتشات الكورة لأن الجمهور طفش منهم والله.. ويطور الاستوديو التحليلي اللي بيقدمه كريم خطاب وإبراهيم عبدالجواد.. ونسيب شوية لبعدين.. ومبروك وبالتوفيق. 
** "25" عبده مشتاق بيقول هايرشح نفسه "نقيباً للإعلاميين"..!! 
** هوه التليفزيون مش هايتعدل حاله.. الموضوع كبير قوي علي أي حد.. فين بريزنتيشن.!! 
** تخيلوا هاني شاكر "الهادي.. الكيوت" خرج عن شعوره وصرخ "كفاية بلطجة وعنف بقي".. بعد ما سمع واحد اسمه محمد رمضان بيقول "أنا مافيا" وبيرقص بحركات خارجة.. وعن نفسي أشك أن عنده عقدة من صغره يمكن حد اتعامل معاه بعنف وقسوة وبيحاول يخلص تاره..!! 
** الخميس ليفربول اتغلب والجمعة الأهلي اتغلب.. عكننة من كل ناحية لكن روح الفانلة الحمرا بتعمل المعجزات.. منه لله حسام البدري دمرالفريق..!! 
** بصراحة.. حسين الشحات ولا يسوي الهري ده كله..!! 
** عارفين إن سكان الجبلاية همه القرود.. وتقدر تلاعب أي قرد وتشتريه بكبشة سوداني وصباعين موز.. هايعملك عجين الفلاحة ونوم العازب..!! 
** فيفي عبده.. نموذج واضح لحب الحياة.. ولعت الدنيا ورقصت في رأس السنة والصالة كومبليه.. كايداهم يا فوفة..!!