• مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

الرئيس بيشتغل الفجرية.. وإحنا في سابع نومة

بقلم .... ضياء دندش

الثلاثاء 01 يناير 2019

القاهرة.. شبه نيويورك


** بقينا نقوم من النوم والشمس طالعة ونتمطع ونفرك عينينا وبعدها نعرف إن الرئيس السيسي زار مشروعات ساعة الفجرية وهي ساعة البركة والرزق وقبول الدعاء.. والناس لسه في سابع نومة إلا إللي شغلهم بيحكم عليهم يبقوا صاحيين.. وأفتكر مفيش رئيس في العالم يبدأ يومه في الفجر زي رئيسنا.. وكمان بقت فيه مشكلة دلوقت إن سكان المناطق الشعبية العادية بقت عندهم غيرة فظيعة وعاوزين الحكومة تهد بيوتهم وتبني بدالها كومباوندات زي الأسمرات وغيط العنب والقباري بعد ماشافوا شياكة وجمال العمارات والأسانسيرات والفرش المحترم .. شفتم السيسي عمل إيه في طموح الناس في خمس سنين بس.. يبقي بذمة أبوكم وحياة أغلي حاجة عندكم مش بلدنا تستاهل نشتغل شوية عشان ربنا يكرمنا..!! 


** إللي عنده قوات مسلحة زي اللي عندنا لازم يحمد ربنا ويبوس إيده وش وضهر كل لحظة.. محدش فيهم بيقصر مع البلد في أي حاجة ومستعد يضحي بحياته عشانها.. يبقي من حقنا نفتخر ونقول تحيا مصر ويحيا جيشنا العظيم. 


** خلاص مش هانشوف الكباري اللي زي محور روض الفرج في الأفلام الأمريكاني بس.. القاهرة هاتبقي شبه نيويورك. 


** دلوقتي كل مسئول بقي بيذاكر كل "فتفوتة" عن شغله..عشان لما يتسأل ميبقاش شكله مش ولابد قدام "الشعب"..!! 


** شفتم احتفلنا إزاي بعيد ميلاد الرئيس الراحل أنور السادات.. شيء مشرف.. عشان عيب الأمريكان يحتفلوا وإحنا أولي منهم ببطل الحرب والسلام.. وللجيل الصغير أقول: استفيدوا من اليوتيوب واسمعوا خطابات السادات بدال الأفلام والحاجات "إياها" هاتعرفوا إن ربنا بيرضي عننا في رؤسائنا.. ماعدا "الإستبن" اللي كان بيعاقبنا بيه سنة عشان نعرف "نعمة" عبدالناصر والسادات ومبارك وعدلي والسيسي..!! 


** الشعب السوري زينا.. جدع وبيعشق بلده.. ومش هايسيبها تضيع.. صدقوني سوريا راجعة. 


** النهاردة الليلة الكبيرة لمولد سيدنا الحسين رضي الله عنه.. نفسي وزير الأوقاف يتخفي ويدخل المسجد ويشوف إيه اللي بيحصل.. أو يتخفي ويدخله أي يوم جمعة ويشوف بعينيه.. وكمان مسجد ستنا نفيسة.. ممكن ده يحصل.. ياريت..!! 


** الأهلي يتعادل مع الداخلية نقوم نزعل لكن واقفين وراه.. محدش بيفضل غالب علي طول..!! 


** بالمناسبة معلق مباراة الأهلي والداخلية اسمه عصام عبدالجابر معندوش أدني وعي باللي بيقوله.. يا أخي مالك ومال حكم الراية محمود أبوالرجال بيشتغل إيه.. كده غلط.. ولو حد خد باله هاتتحاسب..!! 


** أفتكر لو تركي آل الشيخ مش راجل مهم ومطلوب وموثوق فيه كان زمانه قاعد في البيت بدون منصب.. وعموماً الرياضة ترفيه برضه ومش فارقة..!! 


** الفنانة بشري بتنصح رمز البلطجة في السينما بشكل محترم إنه يتواضع شوية لأنه ولا حاجة.. يقوم يتجنن ويقول "أنا الملك".. يا بني استغفر ربنا.. سبحانك يا الله مفيش غيرك الملك.. لأ.. ويشتمها كمان.. شفتم الفرق بين ولاد الناس عامل إزاي..!! 


** مش عارف ليه مقطعين الممثلة السعودية أسيل عمران عشان اشتغلت موديل في أغنية تامر حسني.. مين يطول يقف قدام "تموره".. ده قصر ديل..!! 


** بدأت الفنانة هالة فاخر تشتغل 1957 وبعد 18 سنة اتولد بيومي فؤاد "1965" يبقي مش عيب اسمه يتحط قبلها في "تياترو مصر"..!! 


** الله لايسامح اللي جاب كوافيرة بالقنوات المتخصصة مطلعة عين المذيعات.. ولا حنينة ولا طيبة خالص.. وكمان عينيها مدورة بتحسد واسألوا مذيعة الثقافية اللي زرارها اتفلق نصين.. ولما اشتكوا لأسامة البهنسي.. مردش.. هو خايف من اللي جابها..!! 
** كتبت عن مقدم البرامج الرياضية محمد السباعي كذا مرة وكان في.. ومن اسبوعين قابلته في عزاء شقيق المذيع عبدالناصر زيدان وكان قاعد يبص للموجودين بشكل لافت للنظر.. ولما مات أول امبارح عرفت إنه كان بيودع حبايبه وأصحابه.. الله يرحمه. 
** النهاردة أول "2019" يارب اجعلها سنة السعادة والسرور علي مصر ورئيسها وجيشها وشعبها أجمعين.. ويحقق لكل واحد فينا اللي بيتمناه.. قولوا آمين و"happy new year".