رَمَضَانَ والناس
هيرمس
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

أمير الإنسانية.. حبيب القلوب

بقلم .... ضياء دندش

الاثنين 25 مارس 2019

نماذج مضيئة.. من الجيش

** لما باكتب عن الرئيس السيسي لا باكتب من عندي ولا من مؤلفاتي ولاحد بيقولي اكتب.. لكن بانقل مشاعر الناس اللي شايفة بيعمل إيه ومقدرة اللي بيعمله.. ومن كام شهر سمعت بوداني دعوات المواطنين للرئيس "الله يكرمك ويسترك" لما بدأت حملة "100 مليون صحة" وحتي الأفارقة وضيوف مصر اللي هايستفادوا من الفحص والعلاج.. ومن أيام توجه أصحاب المعاشات إلي الله بالدعاء للرئيس لما أمر بسحب استشكال التضامن ضد حكم قضائي خاص بعدم صرف علاواتهم المتأخرة.. وأجمل ما سمعت وقرأت عن الرئيس وصف "السيسي الانسان" وهنا توقفت وتذكرت ما يحكيه لي بعض الأصدقاء عملوا تحت قيادته بالقوات المسلحة عن انسانيته ورقة قلبه بجانب حسمه وحزمه في العمل.. يعني كل من يعرفه عن قرب أو بعد اتفقوا علي "انسانيته".. وكل الناس دي لا تربطهم علاقة سوي أنهم مصريون.. وهاتوافقوني لو قلت إن الرئيس بثبت صدق الرأي فيه بأفعاله وأعماله للبلد كلها وليس لفئة أو جهة محددة.. ومن هنا أقدر أقول عليه بالفم المليان وأعلي صوت "السيسي.. حبيب القلوب.. وأمير الانسانية".. ربنا يقويك علي المسئولية ويديلك الصحة. 

** شفتم أبناء القوات المسلحة لما بيمسكوا مكان بيعملوا إيه في لمح البصر.. باتكلم عن الفريق كامل الوزير وزير النقل.. شفتم لما قال "الفاسد هانقطعله إيده".. رسالة قوية وانذار مفيش وزير قال أول مامسك وزارته لأن رجال القوات المسلحة لا يعرفون الشمال ولا العوجان.. ومفيش هزار في شغلهم.. وبجد وحق وحقيقي الحياة المدنية كسبت شخصية محترمة بتحب البلد من غير مقابل.. ولسه هانشوف من "الوزير". 

** وكما شفتم اللواء خالد فودة ابن القوات المسلحة عامل ايه في جنوب سيناء.. حاجة تشرف.. الراجل بيعمل كل حاجة بايديه وبيشوف ويتابع بنفسه.. عشان كده شرم الشيخ بقت قبلة المؤتمرات والمهرجان العالمية.. برافو. 

** إيشي خيال يا ناس.. تصوروا أدخل وحدة مرور البساتين وآخد رخصة العربية في 20 دقيقة.. رئيس النيابة محمد الشيخ نموذج راق ورفيع للانسانية والجنتلة.. الرائد محمد جلال رئيس الوحدة منتهي الانضباط والتيسير والشياكة.. واللا المراجعين حاجة تفرح.. يارب تكون كل الأماكن كده.. وعلي فكرة معرفوش انا باشتغل ايه. 

** سوزان حامد: بحق حب واحترام العاملين ليكي.. شوفي القناة الخامسة بيحصل فيها إيه.. ومش هاوضح أكثر من كده!! 

** أول امبارح الأحد الساعة واحدة ونص الضهر سمعت برنامجاً في إذاعة "شعبي FM" بيقدمه "ليلي.. ورشدي" شيء مقزز لا يمت للفن والإعلام بصلة.. سمعونا أغنية لمطربة بقول "عاملة نفسي نايمة" وبقية الكلام اسقاطات مش نضيفة وأحدث موضة للإسفاف ومش هاقول كلمة تانية.. هو مين مسئول عن الإذاعة دي عشان أقوله عيب عليك لازم تتحاسب بتهمة الإسفاف.. ده إذا كان فيه مسئول بيحاسب..!! 

** هأهأهأهأ.. فطست علي نفسي من الضحك لما شفت إعلانت المطرب البلطجي متعلقة في الشوارع وترحمت علي العملاق أحمد زكي اللي قدم اغنيات معبرة درامياً في افلامه وما فكرش يعملها حتي علي شرايط.. أهم حاجة عرفتن مين المطرب البلطجي..!! 

** أشرف زكي: وحياة أبوك وأمك وبناتك.. طالما بتنجح بالتزكية.. يبقي ما ترشحش نفسك.. أو نلغي الانتخاب علي منصب نقيب الممثلين لانك هاتكتسح أي حد قصادك بحب وعشق الوسط الفني كله ليك.. أما إيهاب فهمي فأقوله "انت نقيب الممثلين لما أشرف زكي يطلع ع المعاش" أعلي أصوات يا مفتري.. مبروك..!! 

** ماتش الزمالك والأهلي السبت الجاي لقاء عادي جداً شفناه قبل كدة سنين طويلة.. لكن أهميته إنه مش شرط اللي يكسب ياخد الدوري.. فاكرين فارق "13 نقطة".. الكورة.. دواااره..!! 

** سؤال برئ: يا تري حسن راتب عنده سيطرة علي قناة المحور.. بصراحة.. ماظنش..!! 

** انتظروا الاطاحة بمسئول إعلامي شهير بعد فشله في إرساء العدالة في المكان الواسع عليه. 

** مخرج في منتهي الــ "......" اللي ما يسمعش كلامه وينفذ رغباته يقرفة في عيشته ويعقده من حياته.. وماشي يقول "أنا طالع لفوق.. جاتك خيبة.. مفيش ترقيات.. يا اخينا مفيش حاجة بالعافية.. وآخرتك سودة..!!