المؤسسة المالية والاستثمارية الرائدة في الاسواق الناشئة والمبتدئة
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

محمد حسين الجداوي

كورونا مدير عام

بقلم .... محمد حسين الجداوي

الاربعاء 20 مايو 2020

 


وصل الأستاذ «كورونا كوفيد» المدير العام لمصلحة «أرزاق» الواقعة جنوب غرب «جزيرة فيروس»، في تمام الساعة الثامنة إلى مقر مكتبه، القاطن في الدور الأول بالعقار رقم 19، وطلب من السكرتيرة «بوسطة اليوم».  

المدير: صباح الخير يا هايدي.

السكرتيرة: صباح الخير يا افندم.

المدير: ممكن البوسطة من فضلك.. عقميها كويس.

السكرتيرة: من عنيا يا ريس.. ثواني.

-يضرب جرس الهاتف-

كورونا: ألو أنا كورونا كوفيد مدير المصلحة مين معايا؟

المتصل: أنا عزوز السُهن من باب الشعرية.

كورونا: أؤمر يا سي سُهن.

عزوز: تسلم يا عمهم.. أنا من طرف المعلم بُقلة الشنواني وقاصدك في خدمة.

كورونا: بُقلة ده حبيبي أوامر.

عزوز: كنا عاوزين نعرف نجيب منين كمامات ألوان.

كورونا: اشمعنى ألوان ما الكمامات مالية البلد.

عزوز: هقول لمعاليك.. أصل الواد ابني هنعمله عيد ميلاد في العيد ومش هينفع نلبس الكمامات إياها.

كورونا: هههه ألف ألف مبروك كل سنة وهو طيب اسمه إيه ننوس عين أمه.

عزوز: اسمه كراوية يا بيه.

كورونا: ربنا يخلي.

عزوز: ها هتدلنا نجيب الكمامات الملونة منين؟

كورونا: فيه سكتين.. سوق سودا عند ناس حبايبي.. وسوق الدليفري بتاع الإنترنت والاتنين صاحبك مسيطر هههه.

عزوز: ربنا يباركلنا فيك يا عمهم.

كورونا: انت هتحتاج قد إيه؟

عزوز: شوف يا بيه انت عارف كل سنة وانت طيب ده عيد كورونا -استثنائي مش زي الباقي- السنة دي يعني لازم نبعد عن اللمة والاحتكاكات ربنا يكفينا شر العدوى.

كورونا: عين العقل.. خد بالك من الإجراءات الاحترازية وإلبس.

عزوز: ما احنا بنلبس يا كوفيد باشا.. علشان مش خارجين هههه.

كورونا: برضه مقولتليش محتاج كمية قد إيه.. وبأنهي سكة؟

عزوز: شوف يا بيه أنا قُلت لمراتي هنعزم أبويا وأمي و4 من أخواتي التسعة.. وعيالهم وبالمرة اتصلت بنسايبي علشان حضرتك عارف «قمصة الستات» وقلتلها أعزمي أمك وأختك الكبيرة -سوسن- بعيالها الخمسة.. وبلغي أخوكِ اللي في الخليج يبعت مراته بدل ما تفطر لوحدها.. وأهو ناخد ثوابها.

كورونا: حيلك حيلك ده عيد ميلاد ابنك ولا مولد السيدة.

عزوز: يا كوفيد باشا أنا لسه هكمل.. فيه بقى عم حمص جارنا وعياله.. والست أم متولي مكسورة الجناح وقاعدة لوحدها.

كورونا: صدمتني يا عزوز!!

عزوز: ليه يا بيه؟

كورونا: أنا فاكر محتاج دستتين تلاتة ألوان كنت هقضيهملك.. لكن كده هتاخد خط إنتاج لوحدك هههه.

عزوز: انت الخير والبركة يا كبير.

كورونا: تسلم يا حبيبنا.

عزوز: وأنا اللي قُلت هتلومني على التجمعات وتحكي في إصابات ووعي وهتعملي شغلانة طلعت حكاية انت يا أستاذ كوفيد وبتدورها مصالح ههه على وضعك.

كورونا: لأ ما أنا مأمن نفسي بالغرامة هههه.

عزوز: خلاص مقضية.. بكرة بالليل بقى هكلم معاليك تكون حضرت الكمامات اللي على شكل ميكي ماوز وتوم جيلي علشان العيال يفرحوا.

كورونا: مع السلامة يا عزوز وسلم على المعلم بُقلة الشطانوفي وشركاه.. بس احذر من التلامس وطهر إيدك وعقم قلبك وصفي نيتك وتوكل على الله.

-رسالة موبايل بعد 4 أيام من عيد الميلاد-

إصابة 850 شخص بكورونا من عائلة واحدة نقلت العدوى بعد احتفال أحد الأقارب بعيد ميلاد ابنه.. وجاري تتبع المخالطين.

المدير كورونا: لا حول ولا قوة إلا بالله.. أكيد ملبسوش كمامة وهما بيطفوا الشمع ومغسلوش إيدهم 20 ثانية بالمية والصابون بعد ما أكلوا التورتة.. وفرقعوا البلالين في وش بعض فاقدين للوعي.