هاي سليب
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

مش لوحدك..ياإنسان معاك "100مليون حسنة"

بقلم .... ضياء دندش

الثلاثاء 05 مارس 2019

** تعالوا كده بالراحة وبهدوء وبدون نفاق ولارياء نشوف كل حاجة بيعملها الرئيس السيسي لمصر وشعبها والدول العربية وقارة أفريقيا هانتأكد ليه أعداء الوطن متغاظين ومحروق دمهم.. وآخر حاجة كان أول قمة عربية أوروبية في التاريخ احتضنتها شرم الشيخ التي أظهر مؤتمرها الصحفي قد إيه إحنا مكروهين لما واحد من بتوع الوكالة الألمانية لمح بس مجرد تلميح عن أحكام الإعدام للإرهابيين قام الرئيس السيسي مخلص الحكاية بدرس قوي حازم حاسم باتر فيما معناه" خليكم في نفسكم وعاداتكم وقوانينكم اللي بنحترمها.. وإحترموا قوانينا وقضاءنا وديننا واوعوا تعلمونا الإنسانية عشان إحنا عارفينها كويس قوي" .. بصراحة تذكرت الرئيس عبد الناصر لما كان بيقف في خطاباته ويدي الأمريكان والإنجليز والزعماء والملوك المارقين فوق دماغهم بالحق والمستحق.. ودلوقتي قد إيه الشعب المصري العظيم واقف مع زعيمه وموافق علي كل مواقفه الوطنية والعروبية..ولما العالم كله باصص علينا في انبهار يبقي من حقنا نفتخر برئيسنا ونتمسك به بإيدينا وأسناننا ونحمد ربنا علي نعمة القائد المخلص الوطني والإنسان. 

** تعالوا نتفق علي عيب خطير في بلادنا وهو إن اي مسئول بيمسك "منصب" بيهد اللي قبله عمله ولايبني عليه ويكمله .. لكن لما الموضوع يتعلق ببلد بيتبني من جديد بعد مؤامرة 2011 وبينفذ خطط تنمية مستدامة يبقي هنا ستوب وماينفعش حد ييجي يبدأ من جديد..فهمتوا ليه الجماعة إياهم سايبين مواد الدستور اللي هاتتعدل وماسكين في مادة مدة الرئاسة.. عشان يرجعونا من أول السطر وإحنا ماصدقنا العجلة دايرة وفيه إستقرار وأمن والحياة ماشية.. وطول ما الشعب صابر وراضي وبيحمد ربنا علي الستر والصحة يبقي مصر هاتطلع لفوق قوي.. وكفاية هاشتاج" اطمن يا سيسي مش لوحدك" أبلغ رد ودليل. 

** أكيد كل اللي شارك في حملة "100 مليون صحة" بيدعي للرئيس من قلبه" ربنا يكرمك ويسترك ويقويك" ودعوة الغلبان مستجابة عند الله.. يبقي أكيد الرئيس إنكتبله 100مليون حسنة .. وتخيلوا الحاجات التانية اللي بيعملها وحسناتها بدرجات كتيرة عند الله.. ربنا يباركلك في صحتك ياريس. 

** شفتم الناس بتحب اللي بيشتغل بضميرإزاي..أقصد اللواء كامل الوزير رئيس الهيئة الهندسية. 

** وزيران يعملان بكل قوة لصالح الشباب "د.إيناس عبد الدايم وزيرة الثقافة..ود.أشرف صبحي وزير الشباب والرياضة"..شهادة لله. 

** قرأت تفسيرات لخبراء مصريين دوليين في السكة الحديد وبعض هواة التنظير والتسخين عن كارثة محطة مصر.. ولن أصدق أي حاجة غير اللي النيابة هاتقولها لأنها مصدر الثقة الوحيد وليس السوشيال..!!

** لأول مرة من فترة تتوقف الفتنة بين بعض الأهلاوية والزملكاوية علي الفيس بوك.. عشان كله بيتحد لما تحصل حاجة زي حادثة الجرارين.. إصحوا بقي وكملوا جدعنة المصريين..!! 

** تلقيت تعليقات كتيرة من العاملين في"نايل سبورت"عما كتبته عن محاولة اقتحام مدحت شلبي للقناة.. وقالولي ياريت تفكر الأستاذ مكرم محمداحمد بأنهم أوقفوا برنامجه بعد اللي حصل فيه.. وتخاطب حسين زين إن بيوتنا هاتتخرب .. وأنبه بأن "شلبوكه" مفيش قناة عاوزه تاخده بعد بيراميدز ماتقفلت عشان انكشف للجميع.. وأديني عملت اللي عليا..نستني النتيجة بقي..!! 

** فزورة :"H" سكرتير بالتليفزيون بيلعب علي الونجين وعلي كل الأحبال" عميل مزدوج"..!! 

** فاكرين من أسبوعين لما قلت ماتشات الكاس هاتتأجل.. أهو حصل.. إيه رأيكم بقي.. تأكدتم إن الدولة القوية محدش يمشي كلامه عليها حتي لو كان "ابن بارم ديله"..!! 

** عندي إحساس غريب إن مجلس إدارة إتحاد الكورة مش هايقعد بعد البطولة الأفريقية..!! 

** أيمن بهجت قمروأمير طعيمة..هو فيه ايه بالظبط..الناس هايجة عليكم ليه..سؤال برئ..! 

** واحد حبيبي قوي قاللي إنت بتنتقد "حبيب ستو" وهو تبع "فلان الفلاني".. فقلت لنفسي" وأنا تبع ربنا..!! 

** سبحان الله.. أغنية "فيروس" بتاعة محمد رمضان بقت دعاية لفيلم رعب..!! 

** للأسف كل اللي عرف المخرج بتاع الـ"سيكوسيكو".. هايتعاص.. ولسه هاشوف ونسمع..!!