رَمَضَانَ والناس
هيرمس
  • مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

الوجع والفرحة.. بالشهداء

بقلم .... ضياء دندش

الثلاثاء 12 مارس 2019

مصنع رجالة.. بكل فخر

** مع كل ندوة تثقيفية للقوات المسلحة قلبي بيوجعني وهو فرحان وأنا باسمع أمهات وزوجات الشهداء يتحدثن عن أبنائهن وأزواجهن ودموعي تنزل.. إيه الإيمان بالله ده وإيه حب الوطن ده.. وإيه فرحتهن دي إن أمنيات أبنائهن وأزواجهن بالشهادة اتحققت.. ومن الصعب والمستحيل مقارنة هؤلاء الأبرار مع الأندال كارهي البلد.. وتحيا مصر. 

** قلبي بيطير من الفرحة وباطمن زيادة علي مستقبل مصر لما باشوف طلبة الكليات العسكرية "مصانع الرجال" يوم إجازتهم وهم يسيرون في الشوارع أو علي المحطات أو في المواصلات.. شباب ورد مفتح تشوف الشموخ والعزة علي وجوههم والإصرار والعزيمة في عيونهم والالتزام في هيئتهم ووقفتهم ومشيتهم.. حاجة تحسسك بمنتهي الفخر.. لكن في الجامعات المدنية مقدرش أتكلم.. استغفر الله العظيم.. اللي بنطلونه ساقط واللي لابس مشجر وفوشيه وبنفسجي واللي مضفر شعره أو ضارب ديل حصان.. شايفين فارق السما من الأرض..!! 

** عرفتم بقي ليه باقول علي المواقع والتويتر وفيس بوك "السوشيال هباب".. لأنها بتخرب الدنيا.. وأكبر مصايبها وكوارثها ما حدث من مؤامرات عاشتها مصر من 2011 لحد ما الجيش والشعب خلصونا من التتار والهكسوس الإرهابيين.. وللأسف يتم حالياً استخدام السوشيال زفت في إطلاق الإشاعات من كل صنف ولون.. ويا عيني بعض البسطاء بيصدقوا الأكاذيب دي.. وياما قلت وحذرت هنا وفي البرامج التليفزيونية من خطورة السوشيال قطران لحد ما ربنا بعتلنا واحد اسمه "خالد" راح ناشر كذبة تعيين وزير للنقل وحط اسم والده المتوفي وجريت وراه مواقع النت ومعاهم مذيع يبيع أبوه عشان "عشرين ريال أو خمستاشر دولار" لتنضرب السوشيال كذب علي قفاها وتفقد مصداقيتها عند البسطاء لكن للأسف لسه فيه شوية مأجورين شغالين الله ينور لكن مين هايصدقهم غير المتآمرين معاهم.. وانكسفوا علي دمكم.. وربنا يحميكي يامصر.

** بالذمة وزارة التموين بتعمل إيه.. الله أعلم.. تخيلوا بيوقفوا بطاقات الراجل اللي استهلاك كهربته 650 كيلووات.. ياوقعة سودة.. ده التلاجة والغسالة والتليفزيون وشحن الموبايلات يعمل 650"ك.و".. وعلي فكرة اللي بطايقهم وقفت استهلاك كهربتهم لايتعدي "300 ك.و" يبقي الناس ماتولعش نور خالص وتعيش في الضلمة عشان التموين والعيش.. معقولة د. مصيلحي..!! 

** ناس كتيرة جداً بتسألني "ليه محمود سعد ووائل الأبراشي ومني الشاذلي وعمروأديب رجعوا نجوم أكتر من الأول مع إننا عارفين عملوا إيه في البلد ساعة المؤامرة الكبري 2011.. وإذا كانوا عملوا حاجة واحدة كويسة للبلد واحنا مانعرفهاش حد يقولنا عشان نصلح وجهة نظرنا".. ولم أرد عليهم وسايب الحكاية للقائمين علي أمر الإعلام يعرفونا الحكاية إيه عشان الناس ترتاح وده حقهم لأنهم مش طايقين يشوفوا وشهم ولايسمعوا صوتهم علي الشاشة..!! 

** توفيق عكاشة: مش محتاج تقول إنك المذيع الأكثر مشاهدة وجماهيرية في العالم العربي.. الناس هي اللي بتقول وأنا باقول.. ومن غير ماحد يزعل مننا لولاك محدش كان اتفرج علي حاجة.. بس ياريت تكتر العامية شويتين عشان حبايبك بتوع المصطبة..!! 

** أجمل حاجة في اللواء خالد الدكروري رئيس قطاع الأمن بماسبيرو لما تتعرض عليه شكوي إنه بيجيب الجمل والجمال قصاد بعض.. والحقيقة تبان.. هايل. 

** مين يراهني إن نقابة الإعلاميين قدامها كتير علي ما ربنا ينتعها بالسلامة وتطلع.. ياجماعة معقول كبار المذيعين عضويتهم بتترفض.. لعن الله المصلحة..!! 

** أحلي حاجة ضحكت القراء لما قلت لواحد مخرب بلاش تبلش بلاليشك.. وربنا يخلصهم من امثالك..!! 

** بدون افتراء أسوأ حاجة في نايل سبورت مقدم ستوديو النيل بس مش خالد لطيف.. الجدع ده مزهق الكباتن الضيوف.. وبيقولك مسنود من بابا..!! 

** الأهلاوية هايتفقوا معايا إن حسين الشحات ورمضان صبحي ومروان محسن مايستاهلوش يلعبوا لنادي القرن.. والله حرام الملايين اللي اندفعت فيهم..منك لله يابدري..!! 

** حلمي طولان زملكاوي معاه الأهلاوي وليد صلاح.. وعماد النحاس أهلاوي معاه علاء عبد الغني الزملكاوي.. وأحمد ميدو زملكاوي معاه عادل مصطفي أهلاوي.. فهمتوا الكلام يا بتوع الفتنة..!! 

**متاجرة مفضوحة قوي لما بيولعوا الموبايلات في الدقيقتين "22و76" بماتشات الأهلي والزمالك..!!