• مصر
  • Loading...

رئيس مجلس الإدارة
سـعــــد سـليــــم
رئيس التحرير
عبد النبى الشحات

ضياء دندش

فركش

حكومة للبطولة الأفريقية

بقلم .... ضياء دندش

الثلاثاء 26 فبراير 2019

الإرهاب "بيفرفر".. زي الفراخ

** عودة استضافة مصر لتنظيم البطولة الأفريقية بعد 12سنة تؤكد قيمة وحجم "أم الدنيا" ودليل قاطع علي استعادة دورها الطبيعي والتاريخي في القارة السمراء خاصة مع رئاستها للاتحاد الأفريقي.. ولأن معدلات العمل لدي الرئيس السيسي لا تعترف بالزمن وتفوق معدلات المسئولين ولم يتبق علي انطلاق البطولة حوالي "100يوم بس" فقد ترجم الرئيس هذا إلي واقع عملي وتم تشكيل لجنة عليا لإدارة البطولة بقيادة رئيس الوزراء وحكومته وبدأت كل وزارة أداء دورها فيما يخصها مع انشغال اتحاد كرة القدم بتغيير لوائحه وأموره الشخصية ومين يمسك لجان البطولة وتعديل جدول الماتشات وغيره وغيره.. ثم جاء لقاء الرئيس مع أحمد أحمد رئيس "الكاف" مؤكداً توفير كل الإمكانيات البشرية واللوجستية للبطولة لأنها في وش مصر أولاً مش اتحاد الكرة.. ومن هنا لما الدولة تحط إمكانياتها تحت أمر بطولة أفريقيا يبقي إن شاء الله نطمن إنها هاتخرج علي أعلي مستوي وفي أجمل صورة تليق بمصر وشعبها..وتحيا مصر. 

** بعد ثورة 30 يونيه العظيمة كنا متأكدين إن الإرهابيين هايتجننوا وهايفقدوا صوابهم وعقولهم وهايعملوا تفجيرات واغتيالات مش هاتفرق بين مواطن وجندي وظابط.. والحمدلله تم حصارهم وخنقهم ونجحت العملية "سيناء 2018" في تصفية رءوسهم الكبيرة.. ولأن التنظيم الدولي بقي شكله "معفن" ومالوش تأثير بيمولوا عمليات صغننه تقول إنهم لسه موجودين لكني باسميها عمليات"فرفرة" زي الفراخ لما تدبح وتفرفر.. وكفاية كلام الست "حلاوتهم" بتاعة الدرب الأحمر وهي بتقول "كلنا فدا البلد".. عرفتم محدش هايقدر علي مصر ليه.. عشان شعبها. 

** شوفوا تنظيم أول قمة عربية أوروبية كان عامل إزاي.. حاجة تشرف وتطول الرقبة.. والوزيرة نبيلة مكرم عبيد وجه مشرف قوي لمصر.. ولما قلت شرم الشيخ بقت عاصمة المؤتمرات العالمية والدولية ماكذبتش ولما قلت خالد فودة محافظ جنوب سيناء ياخد نوبل المحليات برضه ماكذبتش. 

** إلي من يهمه هذا الكلام.. بذمتك مش الإعلام محتاج واحد زي المهندس أسامة الشيخ..!! 

** مرشح لعضوية نقابة مهمة عامل حتة بيان..يا اااااساتر ..محسسنا إن حياتنا سودة وهباب ..مصادرة حريات ومطاردات أمنية وجعانين وبنشحت وبلاوي تانية كتيرة.. يا أخينا إتجاهك معروف وكلامك غير صحيح لأني شخصياً واخد حريتي "ع الآخر" وغير منقوصة ولأحد بيطاردني ولاحد بيصادر حريتي وأنا في جريدة قومية..لأننا نؤمن بالحرية المسئولة مش الفوضي والسبهللة.. وبلاش تبلش بلاليشك علينا وتتاجر بكلام مش مظبوط..!! 

** بيقولك اتحايلوا عليا عشان أرجع في كلامي.. طيب ما احنا عارفين إنها لعبة جديدة.. لأنك مش هاتقدر ترجع ماسورة الفلوس اللي ضربت المجاري وبوظت المواسير من أغسطس اللي فات ولحد ما ربنا يقضي أمراً.. بذمتك مش مكسوف ..!! 

** فوجئ العاملون بقناة "نايل سبورت" بكلام يتردد أن مدحت شلبي سيقدم برنامجاً من العاشرة مساءً حتي الثانية بعد نص الليل ويتعاد تاني يوم من 10 صباحاً حتي الثانية ظهراً.. يا خبر أسود.. طب والبرامج اللي بتتذاع في التوقيتات دي تروح فين بالعاملين فيها.. بذمتكم "شلبوكة" لسه عنده جماهيرية.. وإزاي المجلس الأعلي للإعلام يوافق بعد ماوقفه عن الظهور في بيراميدز عشان اللي عمله.. والله ربنا هايحاسبكم طالما مفيش حد بيحاسبكم..!! 

** واحد طلع مع شوبير وقال "اللي يلعب مع الأهلي..يستحمل".. استحمل بقي ياحبيبي..!! 

** نص فرقة الأهلي كسبوا بيراميدز في الجونة وبعدها الأهلي كسب الجونة..بس خلاص..!! 

**" بعد ثمانية أندية.. "التوءم" بقوا احتياطي لأي مدرب.. ومعملوش بطولة واحدة..!! 

** نائلة فاروق: عندك ناس بتلعب علي الوشين ومن رجالة مجدي لاشين.. خدي بالك..خصوصاً اتنين من الإخوان"!!.. 

** يا أهل الخير.. حد ينصح محمد رمضان بوصول حالته إلي درجة خطيرة ..تصوروا دخل أوضة مونتاج فيلم رعب اسمه "فيروس" إخراج أسامة عمر..وبعد كام يوم عمل أغنية اسمها "فيروس Virus" لا.. والكارثة إنه هايبقي مطرب وهايعمل حفلات في الساحل الشمالي.. موافقين.. بس وحياة أبوك تسيب التمثيل لخبازه..!! 

** الناس بتوع مذكرات التفاهم.. ازيكم دلوقتي بقي.. يارب تكونوا كويسين..!! 

** صاحبي العزيز خالد توحيد.. مش هاقول غير إنك إنسان ما تتعوضش..الله يرحمك.