رئيس مجلس الإدارة
طارق لطفى
رئيس التحرير
أحمد أيوب
>
أبويا حجر نادر
بقلم: نورهان الجنيدى
إسمحولى أحكى عن أبويا...بس مش عارفة أبدأ منين...من الأول ولا من الآخر...ولا من الدين...اللى عمره ما هيترد لوعشت طول عمرى شاكر...
أبدأ من الحنين السهل اللين...ولا الشديد اللى بس قربى منه يقربلى كل بعيد...ولا من الشجاع...اللى دايما لينا أول خط دفاع...اللى الخضة بتملى عينه لو جالنا حبة صداع...
فاكر؟!...فاكر سهرك جنبى طول الليل و أنا بذاكر...طيب فاكر طلباتى اللى بس بيتقالها حاضر...فاكر؟!...
أنا أبويا حجر نادر...وجماله فى الإختلاف...وأمانه فى إنى جنبه عمرى ما بخاف...
بيقولى...بيقولى أنا قلبى قبلك كإنه ميت لا حس و لا شاف...
يا حب متغمس بحزم وشدة...يا قلب دهب و لسان فضة...طب أحكى...أحكى عن الشهامة و لا عن الرجولة...ولا عن الضحكة اللى كلها ود و طفولة...ولا عن الصعب اللى بين إيديه يعدى بسهولة...ولا عن طيبة القلب...أحكى عن إيه؟!...أحكى عن كل صعب بين إيديه يعدى بسهولة ولا عن طيبة القلب...ولا عن صورتى اللى جنب صورتك فولة...
و لا عن العظيم و لا عن الشريف...و لا عن القوى اللى قدام حبى ضعيف...القوى اللى عاش عمره كله يعمل ولد سوى...
أحكى عن الطيبة و لا عن الهيبة و لا عن السيرة الطيبة...و لا عن دموعه اللى فى نجاحنا قريبة...
أحكى عن الأصيل و لا الخليل و لا الشفا لكل عليل و لا اللى نظرة عينيه تفتحلى ألف سبيل...
ده كفاية إن إسمى جنب إسمك يعلونى دايما لفوق... كفاية إنى جنبك الدنيا بتحلى و تروق...أنا عايش و متأكد لو حلفوا على المياه تجمد إن ذى حنيتك أنا عمرى ما هدوق...
يا أول حب فى حياتى...يا سوبرهيرو لكل حكاياتى...يا حظى الحلو من الدنيا و قيمتك عندى زايدة يوماتى...
أصل الناس فى الدنيا حظوظ...ما هى الناس فى الدنيا حظوظ...وأنا أبويا حظى الحلو...الكل بيتغنى بأمه...وده العادى والسلو...بس تسمحولى أحكى عن أبويا بكل الصوت و العلو...
لو شايف حقك مهدور... و بانى بينك و بين أبوك سور...بص فى مرايتك هتلاقى كل يوم فى عمرك أبوك له ألف دور...
بس أنا أبويا راجل حديدى...معلش...أنا أبويا راجل حديدى...ده كفاية سيرتك لما بتيجى...يقولوا راجل إبن راجل خلف راجل...ما هو ده إبن الجنيدى
اترك تعليق