رئيس مجلس الإدارة
طارق لطفى
رئيس التحرير
أحمد أيوب
>
هستناكي
بقلم - ميرفت سيف الدين
هستناكي جوة جنينة ورد
وجمب الشجرة
وتحت المطرة حاجز ضلة ليا وليكي
ايوة شاريكي وهابقي معاكي
هستناكي
هستناكي جوة قلوب بتحب بجد
ونوية تهد سدود وجبال
حلفه لتمنع حبي انا ليكي
برضو انا عاشق أيوة هواكي
هستناكي
هبني في صحرا بيت وجنينة
وقصة طويلة مكتوب فيها
حب جميل جوه النيل
كاتب إني مش هنساكي
هستناكي
هستناكي جوة كتاب عنوانة عليكي
١٥٠ صفحة بيحكو فين ومن أمتي
دقة ساعة الصفر في قلبي
لما قابلتك رمشة عينك ضحكة صوتك
قولتي انا اسفة قولت فداكي
هستناكي
هستناكي عند النور اللي منور
بس عشان راسم قلب وسهم ما بنا
حالف أنه يكون مركبنا
مخبي أنا فيه كل تعبنا
مهما تتوهي حالف ايوة إني الاقيكي
هستناكي
هستناكي عند نهايه الشارع بدري
ويا نهار عمال يجري
بس نهاية الشارع خير
شوفتك يومها في نفس مكاني
هستناكي
هستناكي شهور وسنين صبح وضهر
وعصر وليل عمري ما هزهق مش هضايق
مهما أنا أتعب هبقي انا عارف
عشقي بيكبر تحت سماكي
هستناكي
عند الفرحة ولابسة الطرحة
وماسكة في ايدك شمعة وحنة
سمعه الغنوه ناس بتغني
وناس بتزغرت
ما انتي الماضي وإنتي الاتي
هستناكي
غازل كل حروف الحب عشانك
هزرع عشقي ولهفة قلبي
جوة زمانك
هفضل احبك طول العمر
عايش أحلم ابقي معاكي
هستناكي
اترك تعليق