هذه القصيدة هى نتاج قصة حقيقية لبطل من أبطال أكتوبر المجيد رواها لنا الشاعر حامد أبو دقة فى نادى الأدب بالغردقة، وقال  أثناء مشاركته فى انتصار أكتوبر.

حيث سرد الشاعر أثناء حرب أكتوبر المجيد كان بجواره مجند مسيحى واخر مسلم وجاءت قذيفة فاستشهد الاثنين واحسادهم تناثرت أشلاء.

فقاموا بجمع أشلاء الشهيدين ووقفوا فى حيره كيف يفرقون بين المسلم والمسيحيى لكي يقوموا بالصلاه عليهم فقاموا بجمع أجزاء من كل واحد وقسموهم نصفين وصلوا صلاه المسلم و صلوا صلاه المسيحي للأثنين، وكتب الشاعر عبد الباسط سلامة هذه القصيدة:

( حكاية بطل )

 _ 

وف قلب قلب النار 

والحرب دايرة رحاها 

الله أكبر ع الرجالة 

ع الدشمة واللى بناها 

الله أكبر على نسورك 

ع الطلقة واللى رماها 

نار جاية ونار رايحة 

تصد النار 

ورجال تقول الله أكبر 

تهد جبال 

اه ياما لو شوفتى ولدك 

اللى كان بيخاف م الضلمة 

البندقية ف ايده 

من قوته خايفة 

وحجارة الجبل تحته 

كما طمى النيل 

وطلقته تسمعيلها 

لو ع القناة للعدو عويل 

قاعد ف وسط رفاق 

تقوليش ياما اخوات 

الموت يخاف منهم 

لما الحرب تدور 

وف وسط ياما الراحة 

تقوليش عليهم بدور 

فيهم خالد ومينا 

ما يبطلوش نقار 

تقوليش احنا ف رحلة 

والحرب كله هزار 

بس إنت عارفة خالد 

كان ياما واد رجيل 

يقولى عايزك يا حامد 

إنت وفضل وبشير 

يقولنا هو انتوا ماتت 

فى قلوبكم الرحمة 

ولا الحرب جنتكوا 

وما خلت عندكوا تقدير 

إيه ذنب مينا وبشوى 

يا أخوانا معانا صايمين 

ايدوهم شوية النفس 

دول منكم مكسوفين 

وف لحظة ياما ما كانت 

ع البال محسوبة 

جات ياما م العدو ضربة 

ما كانتش محسوبة 

بصيت ومعاى الرفاق 

ما لقينا خالد ومينا 

غير ياما شوية أشلاء 

ما تعرفيهم لمين فينا 

سكتنا ياما فجأة 

ووشوشنا كبرت 100 سنة 

وكأننا ما فرحنا 

ولا زارنا يوم الهنا 

فضلنا نلم فيهم 

لما عملناهم كومين 

الله الوكيل ياما 

كانوا ف الكومين الاتنين 

منين هنعرف مينا 

ومنين هنعرف خالد 

م الدم كان واحد 

واللبس كان واحد 

وقفنا ياما وعلى كوم 

بالفاتحة صلينا 

وع الكوم التانى 

ياما م الإنجيل صلينا 

ساعتها بس الدمعة 

من عينى نزلت 

لا قدرة ياما ادارى 

ولا عرفت حتى احوشها 

بصلى بشوى وقالى 

م تصلى ع النبى يا حامد 

يا بختهم ياخى ويا هناهم 

هو احنا نطول نبقى وياهم 

قلتله كام مينا وكما خالد 

راحوا عشانى وعشانك 

كام مينا وكام خالد راحوا 

عشان ماتكون أحرار 

وكام  مينا وكام خالد 

جواهم كام قاتل  وفاسد 

يبيعوا البلد بقرش قديم 

أو حتى يا دوب مليم 

كام مينا وكام خالد بيموتوا 

عشان ما نعيش أحرار 

وكام مينا وكام خالد 

منا وفينا يجيبوا العار 

وكام مينا وكام خالد 

منا وفينا يجيبوا العار