رئيس مجلس الإدارة
طارق لطفى
رئيس التحرير
أحمد أيوب
>
وأهيى ماشيه مابين وبين
وأهيى ماشيه مع المخاليق
نوسع بالنا لما يضيق
ونتحايل على الأيام
ومانقولش تكلف كام
عشان الخلق دى أصناف
ها أقولك بس أوعى تخاف
فى خلق عيشتها غش فى غش
بتلبس م الوشوش ١٠٠ وش
وخلق الشر ماليها
حفيد إبليس ساكن فيها
وخلق غتيته وتقيله
تخر نطاعه بالكيله
وخلق تقول ماهياش خلق
أساميها توقف فى الحلق
وخلق تعيش بدون إحساس
بتفرح لما تبقى مداس
وخلق أوطى من الوديان
فى أقرب زخ سيل تبان
وخلق تشوفها تتشائم
فى حرق الدم تتوائم
وخلق كتيره من ده الحال
ومش لازمين لكن فى البال
عشان فى خلق زى الماس
تلاقى الأصل فيها أساس
ومهما جاعت أ بطونها
تلاقى الخير مبطنها
وأهيى ماشيه مابين وبين
عصير كوكتيل مابين صنفين
وربك يعدل المايل
على الأيام بنتحايل
ونعمل نفسنا راضيين
يهون ربنا ويعين
على الدنيا وعلى المخاليق
ونحلم ب الوسع فى الضيق
وأهيى ماشيه مابين وبين
مقضينها مابين صنفين
وأهيى ماشيه
بقلم / جمال الأفندي الزمر
مدير القوافل المركزية وتنمية المجتمع بجامعة جنوب الوادى
اترك تعليق