ايام قليلة وتبدأ  التجربة الثانية التي تجريها وزارة التربية والتعليم تحت  اشراف رئيس  الوزراء  وبالتعاون  مع  كافة الوزارات  والجهات  والاجهزة المعنية للتأكد من  سلامة  شبكات  الامتحان  الالكترونية  ومنصاتها  والياتها  ..
ورغم ان الدكتور طارق شوقي وزير التربية والتعليم  اعلن اكثر من مرة انه  لاتراجع  علي الاطلاق عن  عقد  الامتحانات الاكترونية لطلاب الثانوية العامة هذا العام  وان  كافة التفاصيل  سوف يعلنها  أخر مايو الحالي 

الا ان الطلاب واهاليهم  ومدرسوهم  لم يهدأوا  ولم  يصمتوا لحظة   ومازالوا  يتنقلون بين المواقع  الاخباريه   والصحفيه  وصفحات التواصل الاجتماعية لعل وعسي  يجدون  ما يطمأنهم  ويريح بالهم ..لكن للاسف  فان  المعلومة المؤكدة لم  تعلن  بعد .. 
اكثر  ماينتظره المهتمين  بامتحانات  الثانوية العامة
قرار  لم  يتحذه  بعد  اي  جهة  وهو عقد  الامتحانات  ورقية وليس  الكترونية  لدرجة ان اي طالب  او ولي امر او معلم  ليس  لديه  اي استعداد  لسماع  اي  كلام  غير  ذلك !!!
الجمهورية  اونلاين  طرحت سؤالا علي اعضاء  جروب  غرفة عمليات  الجمهورية اونلاين  بالتليجرام  وانتظرت 
الاجابة  

بدأ  النقاش بمجموعة  استفسارات  اطلقتها  ولية  الامر نهي  حجازي  قالت  فيه ان  هناك  كلام تردد
انه  فى حاله سقوط السيستم لاى طالب يوجد بديل جاهز " امتحان ورقى"

من حقنا كطلبه واولياء الامور فى سنه مهمه زى الثانويه العامه اللى بيتحدد فيها مصير ومستقبل اولادنا ان نجد اجابات لمجموعه من التساؤلات
احنا عرفنا ان السيستم لو من البدايه مفتحش هيكون البديل الجاهز فى اللجنه امتحان ورقى ... المفروض نقول للطالب اتفضل خد ورقه وامتحن بعد ميكون جرب يدخل الامتحان مره واتنين وتلاته علشان يقرر مدير اللجنه انه يمتحن ورقى وياترى 
المدير هيقرر القرار ده بعد اد ايه من الوقت ؟؟ وهل الوقت الضائع ده هيكون من وقت الامتحان ولا هيتحسب الوقت من اول ميحل فى الورقه ؟؟
واعصاب الطالب اللى اتعرض للمشكله التقنيه دى هتكون عامله ازاى ؟؟ ولما اعصابه تبوظ ويقلق هيعرف يحل ؟؟ ده اكيد هيكون نسى اى معلومه ذاكرها 
 طب لو السيستم وقع اثناء الامتحان فى نصف الوقت مثلا الحل هيكون ايه ؟؟ 
طب لو السيستم وقع اخر ربع ساعه الحل ايه  طب لو الامتحان وقع اخر 5 دقايق الحل هيكون ايه طب لو خلص الامتحان بامان والامتحان مرضاش يتبعت (فشل فى الارسال) هيكون الحل ايه 
كل دى اسئله مشروعه من حقنا نعرف حلول المشاكل دى ايه 
لان المشاكل دى ظهرت فى السنتين اللى فاتوا ووارد جدا استمرار حدوثها 
اعتقد صعب جدا نجازف  فى سنه مهمه ومصيريه زى دى دول يعتبروا اطفال سنهم لا يتعدى 17 سنه اعصابهم بتبوظ بسهوله وهما بيكونوا رايحين الامتحان وهما اصلا خايفين مبالك لو حصلت مشكله اثناء الامتحان او اخره
عايزين اجابات للمشاكل دى معلنه للجميع 
مع العلم ان اى تعويض لا يمكن تعوضيه للطالب عن الضغط النفسي اللى اتعرض له خاصه لو المشاكل التقنيه دى كانت اول او تانى او تالت يوم فى الامتحانات هيبقى صعب يكمل بقيه الامتحات بنفس الهمه والحماس بعد تعرضه للضغط النفسى والاحباط ده 

وهنا   تدخلت  الجمهورية اونلاين   لتطرح  السؤال  المنطقي :ماذا  لم  تم  طرح  هذه الاسئلة    عليكم  كاعضاء  جروب هنا  ..ولو انت  مكان  المسئول  ممكن  تعمل  ايه !!
وطلبنا  المساهمة بالرأي 

رد  عماد  لبيب  (معلم )

اما ان 
 الوزارة على قدر  المسئولية
والثقة فى قدرة النت للوصول الى جميع الطلاب بنفس الكفاءة
وكذلك
صيانة جميع اجهزة التابلت
مع توفير البديل باعداد مناسبة
مع
وجود لجان متخصصة للدعم الفنى باعداد تناسب عدد الطلاب فى كل مدرسة
بنسبة ١٠٠٪

او العودة للامتحان الورقى

واؤكد لكم ان أجهزة التابلت ليس كلها بنفس الكفاءة
لان تم الحصول على خط انتاج كامل. بكل مميزاته وعيوبه
ورفض الصيانة عمل سوفت وير جديد للأجهزة او التأكد من سلامتها
خوفا من الضغط عليها 

لتعود  نهي حجازي  مرة  اخري  وتقول : 
 اعتقد ان  واضعي النظام الجديد لما وضعوه  المفروض يكون عندهم حلول  وعاملين حسابهم لكل مشكله كبيره وصغيره يتعرض لها الطالب في الامتحان لانه امتحان مستقبلي للطالب وامتحانات امن قومي  مش كده ولا ايه فالحلول احنا بنطلب من واضعي النظام الرد علي كل  سؤال من الاسئله دي

قالت  الجمهورية  اونلاين  ردا  عليها  :
طالما سيادتك  تعلمين  هذا  وتؤكدين عليه
ليه  مش  عاوزة  تصدقي  ان  الوزارة  عندها  حلول  وليه  التأكد  المسبق  من  ظهور مشاكل
ولم تهدأ  نهي حجازي  قائلة 
لان  المشاكل دي عاصرناها في السنتين الماضيتن وكنا بنتغافل عن الحلول لانها سنوات نقل عاديه
و انا مش بأكد والله انها عندها الحلول لا خالص انا بقول المفروض يكون عندها حلول

تدخلت  عايدة  الروبي  معلمة  مؤكدة فلننتظر الاختبار التجرببي الاسبوع القادم بإذن الله فإن وجدنا الابجابيات للاختبار الالكتروني اكبر من السلبيات بمعنى تم التغلب بنسبه كبيره على مشاكل السيستم والشبكات فعلى بركة الله نستمر
لكن إذا وجدنا السلييات اكتر بمعنى المشاكل لم يتم حلها ففي هذه الحاله من الممكن عمل الامتحان ورقي بوكلت زي كل سنه او بابل شيت ويصحح بالماسح الضوئي دون تدخل عنصر بشري 
ولو حصل الاحتمال الثاني لا يدل على فشل النظام الالكتروني لانه طبق طول العام بشكل ممتاز ومنظم من خلال بنك المعرفه وغيره من مصادر التعلم والقنوات والمنصات التعليميه ..
والتي استفاد منها كثير من الطلبه والمعلمين 
وتحياتي لسيادة الوزير الدكتور طارق شوقي ومجهوداته الممتازه 

وعادت  نهي  حجازي  ترد عليها 
التخوف حضرتك سيظل موجود الي ان توضح الوزاره  لنا الحلول لان بنتي ليله الامتحان لما تقولي علي الحاجات اللي خايفه منها بجانب خوفها من الماده يكون عندي الرد القاطع اللي يثبت نفسيتها ويخليها تدخل الامتحان مطمئنه مش بتفكر غير في كيفيه حل الماده اللي دخلاها

حضرتك بتقولي التغلب علي نسبه كبيره لا المفروض تقولي التغلب علي المشاكل بنسبه ١٠٠% لان مش وارد ولا واحد في المليون ان طالب ميدخلشي الامتحان٠   وحضرتك طلعينا بس من السنه دي واحنا حنصقف للنظام ولبنك المعرفه وللمنصات وكل حاجه في النظام الجديد واوعدك حننسي تعب الاعصاب والتوتر والارهاق النفسي والمعنوي اللي انا عشته انا وبنتي وبيتي كله  تلت سنين متواصل وكمان بنتي التانيه داخله تانيه ثانوي يعني لسه حعيشه  معاه ان شاء الله 

واضافت غادة  اسماعيل 
 الوزاره ماينفعش تحل بينها وبين نفسها لازم تعرض الحلول على الطلبه وأولياء الأمور علشان يطمئنوا كلنا اعصابنا مشدوده..لازم حلول واضحه لكل الاسئله

اكد  امادوا
لابد أن يتم التغلب على جميع المشكلات التقنية بنسبة ١٠٠٪ لأن عدم دخول طالب واحد لامتحان واحد من جميع الامتحانات هو كارثة كبيرة جداً و لن يتم القبول به بأى حال من الأحوال

ومرة  اخري  تدخلت  الجمهورية  اونلاين :
ايه  اللي  يخليكم  تطمئنوا  انها  هاتتحل ..
طالما  انكم  ليس  لديكم  استعداد   لتقبل  اي  حاجة  تقال  لكم

وهنا  ردت  نهي حجازي 

 كلنا آذان صاغيه اتفضل والله احنا مش بنجادل ولا حاجه ابدا خالص احنا عاوزين حلول تقال واحد اتنين تلاته مش كلمه واحده تتقال اطمنوا لا يا فندم الجمهوريه كبيره  وفي قري ونجوع بها مدارس ثانوي الحلول دي لازم تكون في ايد رئيس اللجنه ومستعد

ها  واحنا حقنا نعرفها علشان نطالب بيها لو اتعرض اولادنا لقدر الله لاي مشكله من دي  مش بعد الامتحان يتقال تمام يا وزاره كله تمام وخلاص  وولادنا يقعوا فيها ويدمروا

اضافت  الصحفية  ليندا سليم
المشاكل التقنية تتحل ودا الأفضل مع وعد بأن أي خطأ تقني تتحملها الوزارة وليس الطالب مثل ما حصل في النقل والمدارس أعطت للولاد امتحان تكميلي عشان بردوا الدروس وسقطوا بمزاجهم في سنوات ثانوي النقل ،، للأسف اي عام مش ثانوي بس هتتدخل فيه ايادي بشرية عرضة للمحسوبية والدروس انا مع الالكتروني ولكن بضمانات بلس لازم أسئلة مثل المعاصر مثلا تتوفر وما تكون مفاجأة يعني بنك أسئلة مماثلة لان دي دفعة هتتحمل التجربة بدون اي داتا واللي بعدهم هيكون حظهم اوفر فحرام ما نحصنهم باسئلة تدريبية واشكال للامتحانات متعددة وربنا معاهم كلهم ولازم الوزارة يا استاذ سيد تعاقب المدارس اللي عطت للولاد تكميلي لانها ممكن تعطيهم ايضا دور ثاني او ترسبهم في سنوات النقل يعني زي ما كل الخارج مثلا في النقل ناجح ومنقول لمجرد أنهم حلوا وسلموا لازم كل طالب نزل من بيته وحل مهما كان الحل يجتاز غير كده يبقي بنسلم الولاد المدارس تستغلهم ودا حصل في بعضهم للأسف اولاد عدوهم بالقلم الازرق وتانين معدهومش بالقلم الاحمر  لأغراض متعدده , وشاكرين مجهوداتكم الخلوقة وربنا يوفق الوزير والوزارة في هذا التحدي وياليت كلنا نتعاون لتنجح التجربه على خير مع مراعاة ما قلت سلفا ومراجعة المدارس اللي رسبت طلاب حضروا .

بينما  اكدت  نهي حجازي  اخيرا

اننا  نثق  في الجمهورية اونلاين
  في توصيل مخاوفنا وفي انتظار الحلول  التي  تبلغنا بيها

اما عبد  الحميدشعيب  المالكي  فقال 

موضوع اعتبار الطالب اجتاز ده كان في الترم الاول وكان الكتروني لا فيه قلم أزرق ولا قلم أحمر 
أما الترم الثاني كان امتحان ورقي تم تصحيحه 
ولو حضرتك أو مصدر معلوماتك لديه أي دليل على تلاعب أي مدرسة في نتائج الطلاب يتقدم للإدارة التعليمية التابع لها بما لديه من أدلة وسيحاسب المخطئ بلا شك 
أما بالنسبة لموضوع النقاش فقد أعلن معالي الوزير عن الإجراءات ومنها امتحانات التجربة ومعالجة أي سلبيات تظهر أثناء التجربة م يتم تحديد الامتحان ورقي أو الكتروني والقرار في ذلك ليس قرار منفرد بل قرار دولة ستعرض الصورة كاملة وسيتم اتخاذ القرار الذي يضمن حقوق جميع الطلاب كاملة فيجب أن نثق في قدرة الدولة فكما تعلمون أكثر من خمس وزارات تشترك في هذه المهمة 
اكد  عمرو جاويش  معلم ان وجود امتحان ورقي بجوار التابلت سيكون الفشل هو المصير المحتوم ، والفوضى الرهيبة داخل اللجان ، وليس الأمر كأول وثان ، وكل عليه أن يتحمل المسئولية، فلا مجال لهفوة أو خطأ

أوضح ان  التجارب السابقة مخيبة للآمال، لذا لابد من تجارب فعلية تحمل طمأنة للطلاب قبل أولياء الأمور، وليس مجرد كلام

واختتمت  سهام  مصطفي  المناقشات  قائلة
نتمنى من  الوزير الدكتور طارق شوقي أن يكون الامتحان ورقيا منعا لاي أخطاء مش في الحسبان لان في ناس في اماكن كتير في الجمهورية هيكون الموضوع عندهم صعب جدا ، وخصوصا الثانوية العامة فهي سنة تحديد مصير ، 
ياريت توصل صوت أولياء الأمور لمعالي الوزير رأفة بولادنا ، بجد المطلب ده لو تتحقق احنا مش هيكون عندنا اي مشكلة أخرى من اي نوع .