حقق النجم مصطفى شعبان نجاحًا كبيرًا بمسلسل "ملوك الجدعنة" فى رمضان وتصدر المسلسل التريند.

وحرص عدد من النقاد على الإشادة بمصطفى شعبان حيث قالت الكاتبة أسماء علاء الدين أنها تقدر موهبته وترى أنه يستحق أن يكون موجودًا على الساحة التلفزيونية والسينمائية بشكل أوسع.   

وأكد الناقد محمود قاسم انه يتابع مصطفى من التسعينات وهو ممثل شكله حلو وأدائه كويس وبسرعة جدًا حصل على البطولة المطلقة واتنقل بسرعة لأفلام الحركة واشتغل هو وأحمد السقا راس براس وطبعاً وجوده في التلفزيون كان مهم والستات كلها بتحبه وذلك ظهر بشكل أكبر في المسلسل الأخير مع ظهور لياقته وهو سابق محمد رمضان ويستحق مكانة أكبر من كده وكان أولى يكون نمبر وان لأنه أجرئ من محمد رمضان وموهوب اكتر منه بمراحل ، وكنت أتمنى يكون هو بطل المرحلة دي في السينما لأنه قادر على ذلك وأتمنى أيضًا كمان انه يسيب ظاهرة الحاج متولى هو صحيح امتداد لنور الشريف لكن انا عايزه يرجع السينما في ادوار اكثر تألق وياخد مكانه الحقيقي.

وقال الناقد كمال القاضي أن مصطفى شعبان ممثل هايل لكنه اتظلم في مسلسله الاخير في تقديري كناقد لان ملامحه ملامح شخص هادي ورقيق وهو باين في جزء انه بيفتعل حالة الشر ومثلا الجزء الانساني بتاع اخته وهي في المستشفى هنلاقي اداؤه رائع وغير مفتعل لاننا اتعودنا منه على الادوار الانسانية بشكل كبير والعيوب الموجودة في المسلسل كلها عيوب كتابة، ودور الشر مش لايق على مصطفى شعبان لأنه طيب وعينه طيبة مهما حاول يقنعنا بعكس كده ويليق في الأدوار الإنسانية أكتر.

وأضافت الناقدة ماجدة خيرالله أن مصطفى شعبان واحد من أهم الممثلين في جيله وأنا شوفته على المسرح في بداياته وقولت دا ممثل كويس جدا وهو عمل مجموعة أدوار مختلفة ومتنوعة ولعب أدوار كتيرة ومن ضمنها الأدوار اللي فيها حس كوميدي وذلك أفاده جدا وانا شايفة انه من اكتر الناس اللي عندهم قدرة على التلون بالاضافة ان قوامه ممتاز ومحافظ على لياقته لذلك بيكون في ادوار الاكشن هايل وكلنا شوفنا في مافيا لما كان قصاد احمد السقا هو اكل السقا لان مصطفى قدراته كبيرة ورغم كل اللي قدمه هو مخدش المكانة اللي يستحقها ومن حسن الحظ ان لسه في فرصة انه يقدم حاجات أفضل وانا شايفه انه بير من الموهبة لم يستخدم كله بعد.

وتابع الناقد محمد القناوي أن مصطفى ممثل هايل من زمان وانه غير راضي عن مسلسل ملوك الجدعنة في ان كل عناصر المسلسل يكونوا شخصيات غير سوية دا بعيد عن مجتمعنا ومكنش في شخصية سوية غير دلال عبدالعزيز، ومصطفى من الممثلين الجيدين جدا سواء سينما او تلفزيون لكن البطولة المشتركة مش في صالحه واخدت منه اكتر ما اعطته وامكانياته اكبر من كده بكتير ومن افضل الادوار واجملها شخصيته في ايوب كان في كم من اداء وتمثيل وانفعالات وكم احساس بالشخصية وتتابع احداث وتشويق غير عادي
وملوك الجدعنة تجربة ليها جمهورها واتمنى ميتوقفش عندها او يقول ان دي من أهم أعماله لان له أعمال كتير أفضل.

وأكدت الناقدة ميرفت عمر أن مسلسل ملوك الجدعنة مصطفى درس فيه الشخصية كويس وأدهشنا في أداءه جدًا وحسيت انى شوفت مصطفى شعبان جديد في طريقة كلامه ولبسه وكل حاجة وهناك حالة تحول كبيرة حصلتله في المسلسل مع ان في تحفظ على العمل نفسه لكن ماحبش ابخس حد حقه فمصطفى اشتغل على نفسه اوي وهو معجون موهبة وشخصية سفينة لبسته اللي هو الشخص اللي بيمزج بين الجدعنة والصياعة في وقت واحد فشايفه اداءه موفق جدًا وتغيير نمطي ملحوظ، مبسوطة انه غيير نمطه لانه بيتهم طول الوقت انه حاصر نفسه في نمط واحد ودا مش حقيقة ولكن حابه انه في اعمال جديدة نحس ان في مصطفى شعبان جديد لان لسه عنده كتير ممكن يقدمه وكمان اتمنى اشوفه على المسرح.

وأكدت الناقدة دعاء حلمي أن مصطفى شعبان حدث له تطور رهيب جدا وانا منبهرة بالتطور والمنطقة الجديدة والتغيير الجذري في شخصيته وشايفه ان الحس الكوميدي وانا بقيت محتارة هو هيعمل ايه تاني بعد كده بس اظن دلوقتي القماشة بقت اوسع عليه ويقدر يعمل حاجات احسن وكمان هو فئة اولى يستاهل انه يعمل حاجات افضل والمسلسل عليه اتهامات كتير انا برفضها ومفهوش اي شبحنة ناتجة من فراغ لان دول كانوا عيال شقيانة ودا تطور طبيعي للمناطق العشوائية او الشعبية وحتى هناك فرق بين لهجة مصطفى ولهجة احمد العوضي اللي كلها طبقة صوت مستعارة وسجع اوفر ومصطفى عامل دور انسان بيحس وفيه مناطق دراما فهنشوفه انسان شعبي، أنا طايرة بالمسلسل كحركة وكاخراج وكاكسسوار وكحارة مصرية والدليل على دا النجاح الحقيقي مش الفيك 
كمان مفتقدة مصطفى في السينما وعنده فرص كتير انه يروح لأدوار مختلفة في السينما بس يختار دور مناسب لامكانياته.

واستطردت الناقدة خيرية البشلاوي ان مصطفى شعبان ممثل يمتلك كل المؤهلات التي تجعله ممثل جيد ويمتلك كل المقومات التي تجعله يتفوق ولكن هذه المؤهلات مشروطة بوجود مايسترو جيد وهو المخرج ونص جيد وهو السيناريست وموضوع جيد يثير الناس تتفرج ويجب ان يكون هناك عزف على كل هذه الادوات بما يصنع سمفونية درامية جديرة بالمتابعة وعايزة اقول ان صناعة الدراما بدأت تلتفت الى ضرورة الاختيار الجيد للموضوعات الجديرة بالمعالجة، فالقوى الناعمة لابد لها ان تلعب دور مهم اوي في اذكاء الوعي وتغذية العقل الجمعي وحث الناس على الانتباه لهمومهم الاجتماعية والانسانية بل وحاجتهم للترفية.

وقال الناقد سامح فتحي أن مصطفى ممثل جيد افضل من ممثلين كتير واخدين صيت على الفاضي وحاسس انه بعيد خالص عن السينما ومفتقدينه حقيقي وغيابه فارق لان اليومين دول بقا في كوارث طالعة ومصطفى من الناس المحترمة والممثلين المثقفين وشايف انه مينفعش يبقى في بطولة مشتركة مش في صالحه وياريت يرجع للسينما تاني ينقذنا من الكوارث اللي بنشوفها.

واستكملت الناقدة ياسمين كفافي أن مصطفى شعبان شبه محمود عبد العزيز وانه بيطور كل سنة بس ظلم نفسه في دور الشعبي لان موهبته اكبر من الدور دا، وياريت ينتبه للسينما بل وافلام المنصات لاننا عايزين نشوف افلام حلوة وهو لطيف لما بيعمل حس كوميدي في شخصياته لان دي طبيعة المصريين ومحمود عبدالعزيز في الكيت كات كان عنده تاتش كوميدي وكذلك نور الشريف لان دي الشخصية الطبيعية ومصطفى بيعرف يعمل دا حتى في الاتجاه الدرامي اللي فيه مأساة، وشايفة ان المؤلف له دور كبير وللاسف احنا محتاجين مؤلفين جديدة احنا عندنا معرض كتاب كل سنة اختار روايتين تلاتة اعملهم معالجة هيكون افضل من اننا نعتمد على مؤلفين تلاتة لكل الاعمال.

وأكدت الناقدة نانسي ابراهيم أن مصطفى من الممثلين اللي بدأوا كبار واستمر في مكانه كنجم له كاريزما وحضور وذكاء يظهر حتى من نظرة عينه، الممثل تاريخ طويل من الاداء الصادق غير المفتعل والتنوع وخفة الروح والوصول بالملتقى الى اعتباره واحدا يعرفه ويصدقه دون جهد ظاهر، احبه واحترم موهبته جدا.

وقال الناقد أحمد السماحى ان مصطفى ممثل مخضرم عنده أدواته اللي بتساعده في تجسيد الأدوار وعنده تكنيك ومشروع فني فهو بصفة عامة ممثل جيد جدًا لكنه يفتقر الذكاء الفني فى اختيار الأدور وأعتقد انه محتاج يعمل أدوار أعمق وأتقل من كده لان امكانياته تسمح له بذلك، وأتمنى انه يحلق بعيد عن الأدوار اللي يقدر أي فنان ممكن يقدر يعملها، أتمنى انه يسلك طريق أحمد ذكي في التنوع المرعب من الأدوار العميقة، ولا أحد يقدر ينكر موهبته، وله جمهور كبير ميقدرش يستغنى عنه في التلفزيون وهو نجم تلفزيوني بإمتياز  لكن ممكن لو رجع للسينما مع مجموعة من الشباب يكون رجوع كويس ومصطفى موهوب أكتر من السقا وأمير كرارة ولا أحد ينكر هذا، وأنا ضد الناس اللي بتقول انه مايليقش في أدوار الشر او غيره، لانه ممثل موهوب يليق في كل الأدوار وعنده تاريخ يشهد بس أتمنى ميكررش أي شخصية بيقدمها ووضعه يسمح انه يختار ادواره بدقة ويختار ورق يليق بيه وبموهبته الكبيرة وانا عارف انه انسان راقي ومثقف أتمنى يقرا روايات ويختار منها اللي يشوفه مناسب ويليق بيه.

وأكد الناقد أندرو محسن أن مصطفى شعبان ممثل شاطر و ان كان اتجه للأدوار اللي ليها جماهيرية ودا مش غلط لكن فنيًا كان عنده فرصة إنه ينوع بين الأدوار وأيوب مسلسل مهم وأتمنى أنه يجرب أدوار أكتر وأنا شايف إنه في فيلم مافيا ظهر عن السقا كتير ومع اني ضد المقارنة لكن يبقى كويس لو جرب أدوار تانية خاصة انه يقدر يعمل كده وانه ينوع أدواره ويختارها كويس جدا.

النقاد يشيدون بمصطفى شعبان بعد تألقه فى

Previous Next