رئيس مجلس الإدارة
طارق لطفى
رئيس التحرير
أحمد سليمان
#يوميات_مهندس_مشاكس
اللام الشمسيه و القمريه
يكتبها: تامر راغب
مراتي كانت قاعده تذاكر لابني الكبير عمر وهو عنده وقتها ٧ سنين وعماله تشرح ليه الفرق بين اللام الشمسيه واللام القمريه وطالع عينها معاه .
اما انا فكنت ممدد علي الكنبه ومعايا الموبايل عمال العب لعبه من الالعاب علي موبايلي .
مراتي كانت جايبه امثله لعمر ابني علشان تعرفه الفرق بين اللام الشمسيه واللام القمريه ، وكل شويه اسمعها تقول له :
مراتي : دي بقي تبقي لام ايه ؟
عمر : لام قمريه .
مراتي : طيب دي بقي تبقي لام ايه ؟
عمر : لام شمسيه .
مراتي : طيب ودي ايه ياعمووور ؟
عمر : صمت
مراتي : ايه ياعمر ، ايوه ياشطور قول
عمر : بفكر ياماما .
انا : دي تبقي لام نجميه .
عمر : هو فيه لام نجميه يابابا ؟
مراتي : ياتامر ابوس ايدك تسكت وتسيبني اذاكر للولد .
انا : اووووف بقي ، ماهو انا بساعدك اهو .
مراتي : بتقول للولد معلومه غلط وتقولي بساعدك ، حرام عليك بقي ، اسكت ارجوووووك
اليوم الثاني :
عمر راجع من الامتحان ومراتي بتراجع معاه الاجابات لغايه ماجت لسؤال عن اللام الشمسيه والقمريه .
مراتي : الله ، دي اللي احنا ذاكرناها امبارح ياعمووور ، كتبتها ايه ياحبيبي ؟
عمر : كتبتها لام نجميه ياماما .
مش عارف ليه مراتي قعدت يومين كل ماتشوف وشي تقولي " حسبي الله ونعم الوكيل فيك "
يعني هو انا اللي قولت للولد يكتبها لام نجميه ، انا كان قصدي اهزر مع الولد شويه
يرضيكم اللي حصل ده حضراتكم
أسعد الله اوقاتكم
دامت الابتسامه علي وجوهكم
ودمتم بخير
اترك تعليق