موكب المومياوات ..حاجة تشرف

ظهرت موهبته فى التاسعة من عمره ، فوقف على مسرح المدرسة يغنى  حتى ذاعت شهرته بين أصدقائه ، وقرر أن يتعلم الموسيقى فعزف على العديد من الآلآت، ولعشقه للفن دخل معهد الموسيقى، و أصبح واحدا  من أشهر مطربي جيله بأغانيه التى سكنت القلوب ..  دكتور الفن إيهاب توفيق في حوار خاص مع الجمهورية أون لاين..

نبدأ بعيدا عن الفن .. كيف رأيت الحدث التاريخى ومشهد موكب المومياوات؟
شيء عظيم وحاجة مشرفة لمصر كلها والعالم كله شاف الموكب والمسيرات الرائعة اللي اتنقلت بيها الموميات من المتحف المصري للمتحف الجديد  وطبعاً بشكر كل الناس اللي عملو المجهود الكبير في ان الاحتفال يظهر بالشكل الجميل ده والعالم كله بيتكلم عنه بشكل ايجابي تماماً ويارب دايماً مصر في خير ورخاء واحتفالات جميلة في كل الأوقات يارب. 

فترة الكورونا كانت صعبة على ايهاب توفيق؟
فترة الكورونا صعبة اوي وقبلها فترة الحريقة اللي توفى فيها والدي الله يرحمه وقبلها مشاكل كتير وقبلها وقت الثورة واللخبطة اللي حصلت في الدنيا كلها في كتير من البلاد العربيه ومصر كلها كانت فترات الواحد كان مفيش النفس الحلوة اللي كان الفنان يشتغل بيها ويبقى سعيد وهو بيشتغل والروح الحلوة اللي كان بيختار بيها الاغاني والتركيز اللي كان بيشتغل بيه و ان شاءالله نرجع نركز تاني وتبقى عودة قوية.

صوتك مميز في الأغاني الوطنية..  كلمنا عن أغنية ١٠٠تحية؟
أغنية بنشكر فيها الناس اللي قامت بمجهود بفترة الحظر اللي حصل في مصر بسبب كورونا والأطقم الطبية اللي كانت بتضحي بنفسها و ناس كتيرة خدوا العدوى وتوفوا بسبب ان هما بيشتغلوا في التمريض والطب فكان أقل واجب اننا نشكر الناس اللي قامت بالمجهود ده هما والجيش والشرطة في وقفتهم لمساندة المصريين في الجائحة اللي حصلت دي وبتمنى يارب السلامة لمصر والعالم كله باذن الله.

ما سر غيابك عن الوسط الفنى لفترة ؟   
يعنى بعض المشاكل الفترة الماضية كانت سببا فى ذلك، وإن شاءالله لن يكون هناك أى غياب تانى، والفترة اللي جاية هيبقى فيها نشاط مكثف باذن الله هنبتدي ننزل الأغاني اللي سجلناها وصورنها بعد رمضان ،وناوي باذن الله كل فترة كل ٣او ٤ اسابيع كل شهر يبقى في اغنية جديدة ولو مكنتش تم تصويرها بطريقة الفديو كليب  هطرحها سنجل .

بصراحة شديدة ايهاب توفيق ظالم نفسه والا الدنيا ظلمته الفترة الماضية؟ 
 هو سؤال صعب لكنى لن أضع اللوم على الظروف،  ولكن حدث الكثير معى و أحداث كتيرة في حياتي جعلت الواحد يبعد شوية وتركيزه في الاختيارات والشغل عموماً مكنتش مركز  بنفس الفترة اللي كنا فيها قبل كدة، والنفسية مدمرة، بعد وفاة والدى فى حريق الفيلا، والحمد لله راضى بكل شئ ،  وبدات أعود لحياتى الطبيعية وأقاوم الظروف ،والجمهور له حق علي.

أغنيه زحمة الأيام مع نجوم التسعينات ماذا عنها؟
احنا السنة اللي الماضى٢٠٢٠عملنا أغنية انا وحميد الشاعرى ومصطفى قمروهشام عباس  بعنوان   «زحمة الأيام»، ولسه مانزلتش لغاية دلوقت لأ أعلم  حميد ليه مانزلهاش المفروض تنزل ،وفي رمضان اللي فات عملنا الاعلان سوا يعني كانت عودة كويسة الحمدلله، نتمنى تقديم أعمال تظل بين الجمهور لأن الأغانى اللى قدمنها عايشة لحد وقتنا الحالى لأننى تعبنا كثيرا فيها .

رأيك فى أن يتواجد فى شهر رمضان 3 أعمال بطولية عن الجيش والشرطة؟ 
 طبعا بحى كل القائمين عليهم أفكار جديدة وحقق الأختيار العام الماضى نجاحا كبير ،وأن  احداث المسلسلات بترصد دور الجيش وأرى ان التركيز على هذة النوعية من الاعمال الدرامية  ،اللي بتقدم معلومات وترصد حكايات أبطالنا وأد ايه الحيش والشرطة بيقدموا تضحيات كتيرة وبيروح منهم شهداء وضحايا كتير بسبب انهم واقفين ضد الارهاب والأعداء اللي دايما مترصدين لينا في شباب صغيرين ماحسوش قد ايه الناس دي بتتعب عشان نبقى احنا عايشين بسعادة ونروح ونسهر بحريتنا وفي أمان وده اقل واجب ليهم المسلسلات دي عشان توري الناس قد ايه افراد الجيش والشرطة بيتعبوا عشانا وبيضحوا بارواحهم لكى نعيش في سلام.

رأيك إيه فى الفترة الحالية فى الأغنية خاصة بعد ظهور مطربى وفرق المهرجانات ؟
  بصراحة مش عايز ابقى زي الناس اللي وقت ماإحنا ظهرنا في بداية التسعينات يبقى في انتقادات وهجوم انا مش عايز اعمل نفس ده ولكن انا معترض على الكلمات اللي بتتقال في الاغاني الشعبية اللي بيسموها مهرجانات ،طول عمر الفن الشعبي والغناء الشعبي في مصركان له طابع مميز بأصوات حلوة بكلمات حلوة بكلام مايجرحش الناس اللي بتسمعه،الشكل الجديد اللي ظهر من التوزيع الموسيقي بيسمى مهرجانات دلوقتي انا مش معترض عليه ده تطور طبيعي ممكن يحصل في اي مكان في العالم في الموسيقى و  في الفنون عموماً ومش حصل عندنا بس ده في العالم كله ولكن المحتوى اللي بيقدم في الاغاني دي هو بس اللي بيزعل .

هل ممكن أن تقدم ديتو مع مطرب مهرجان؟
عمري مافكرت فيها ولكن شكل توزيع الموسيقي ممكن اي حد يغني عليه.

أى مطرب عايز يشتهر حاليا بيغنى مع مطربى المهرجان ؟رأيك إيه ؟
أعتقد أنها وجهات نظر في ناس كتيرة بتشتغل بالفن والغناء ماعملوش مهرجانات وناجحين والناس بتسمعهم وحافظة اغانيهم ولكن أجيال بتطلع بتحب شكل جديد وناس جديدة بتحب حاجة جديدة ممكن تاخد وقت وتنتهي وممكن تاخد وقت وتستمر وممكن يحصل تطور فيها حاجة تانية..

كلمني عن أغنيتك الجديدة" الباشا "؟
الأغنية اتصورت في الامارات في دبي مع المخرج عادل سرحان ومن انتاج شركة لايف ستوريز بحاول اركز في اني ارجع للشكل اللي الناس حبت فيه ايهاب توفيق في الأغاني السريعة المقسوم وكدة وان شاءالله تكون رجوعا قويا.

تشارك لأول مرة فى خيمة رمضانية  ؟
بالفعل أشارك لأول مرة بخيمة خان المعز نفس شكل خان الخليلي كدة ، مكان تتجمع فيه برمضان على الفطور والسحور هيبقى اسمه خان المعز.. المكان اللي اخترناه عشان نعمل فيه ده واخد الطابع الشرقي القديم كله معمول بالخشب والزخارف والمشربيات بشكل مختلف.