تكتبها: سعاد سالم

انا وحماتي بحياتنا ما اجتمعنا الا وعملنا كارثه بشكل ما 
في يوم من تسع سنين كده قاعدين بنتكلم قالت ركبتي بتنقح عليا .. كنت زمان اروح عُمان اعمل ابر صينيه .. قولتلها طيب ما يلا نروح .. قالتلي خايفه حماكي يرجع ما يلاقيناش ينكد علينا

قولتلها بتثقي فيا والا لا؟؟ قالتلي لا .. قولتلها يبقي توكلنا علي الله بقي وامشي ورايا .. احنا نطبخ ع السريع ونروح جري ونرجع جري..عُمان دوله تانيه بس فركه كعب من الامارات .. كتير قريبه.. واهو بالمره نجيب خضره وخيار من هناك تحفه زي الاورجانك بالظبط
المهم قالت اوك .. اتوكلنا علي الله ودخلنا من حدود عمان.. و روحنا المكان اللي حماتي كانت بتروح عليه .. قعدت تشبه علي المكان مَش لاقياه قولتلها نروح اي عياده وخلاص كلهم صينين .. اصلا لو قابلنا نفس الشخص مَش هنعرفه كلهم شبه بعض والوقت كالسيف ان لم تقطعه عمو هيقطعنا

المهم دخلنا عياده ورفعنا بنطلوناتنا لحد الركبه زي  اللي هيتوضوا في الترعه  وع الزراعيه يا رب اقابل حبيبي ترااالملم .. ابتدوا يحطوا الابر في ركبنا .. ويروحوا وييجوا علينا بعدين قالوا خلاص ودفعنا مبلغ محترم .. طبعا احنا كنّا طالعين علي رجلينا .. بعيد عنكم نزلنا علي نقاله.. اول ما وقفنا فقدنا التوازن ..وانا وهي نصرخ من الالم ونتسند علي الحيطان .. الظاهر لمسوا عصب والا ايه .. ما اعرفش

ركبنا السياره  قولتلها اضغطي علي نفسك وسوقي لحد البيت احنا في دوله تانيه .. لو انكشفنا عمو هينفخنا زي خروف العيد وجوزي اللي هو ابنك هيفسينا لاننا ما قولناش ..

في طريقنا واحنا طالعين من عُمان  فرشات الخضار علي جنب .. وانا اقولها وقفي نجيب خيار وقفي نجيب خيار .. الست قالتلي وقفت الميه في زورك يا بعيده.. حماكي هيحشي الخيار ده في ودانا احنا الاتنين .. مش لازم نضيع ثانيه ..المهم دخلنا مدينه العين بالامارات .. وروحنا لقينا عمو لسه ما رجعش..حمدنا ربنا و اخدنا مسكن وقعدنا احنا الاتنين علي كراسي الصالون وغطينا رجلينا ببطانيات عشان ندفيها والالم يخف.. زي الوالدين بالضبط .. 

دخل عمو لقينا قاعدين كده ووشنا مصفر قال مالكم قولناله ولا حاجه احنا بخير .. تتغدوا قولنا شبعانين .. نتفرج علي التليفزيون قولناله نعسانين ..تتنيلوا قولناله متنيلين 

المهم شويه والالم زاد وبقينا نتمرمغ انا وحماتي في ارضيه الصالون .. قال انتوا اكلتوا ايه انتوا اتسممتوا ؟ نبص لبعض واحنا مرمين ع الارض ونقول الله المستعان .. اجابه مبهمه لا كذبنا ولا ورطنا روحنا

راح عمو ماسك التليفون واتصل علي جوزي قاله تعال حالا تقريبا امك وسعاد اتسمموا..قاله انا جنب البيت دقيقتين هاكون عندك 
والله يكفيكم الشر ..النار ولعت في جسمي كله .. مش في حاجه اسمها كسر مضاعف .. انا بقي عندي الم مضاعف من الخوف .. وروحت صارخه صرخه انثي الذئب الخائفه من الغول .. وقولتله لا يا عمو لا ما تخضوش علينا .. ما تخليهوش ييجي ارجوك ( احسن هاتعلق علي  بوابه  حدود عُمان والامارات عشان اكون عبره لمن يعتبر ولمن لا يعتبر بالمره)

راح عمو يفتح الباب لجوزي حماتي قالتلي قولي هنعمل ايه بسرعه قولتلها انا هاحاول يغمي عليا .. قالتلي وانا ..قولتلها انتي رجعي وغرقي الارض وبناطيلهم الهيهم عشان يقرفوا ويمشوا .. قالتلي ولو ما قدرتش.. قولتلها استني يا ابله نظيره اجيب ورقه وقلم وتسجيل عشان احكيلك قصه حياتي .. الفي من مخك مفيش وقت .. 

دخلوا علينا بعيد عنكم بس شفت الاتنين جسمي نمل وخدل وما بقيتش حاسه بخير ولا شر من الخوف ولساني انعقد .... وقعدت اردد ..اللهم ان كان سحرا فابطله..

جوزي سألني ايه حصل شاورت علي امه وعملت روحي باطلع في الروح .. سأل حماتي .. شاورت عليا وعملت روحها في النزع الاخير ..راح جوزي زعق زعقه سمعت اخواتنا في اليمن السعيد ومضيق جبل طارق اللي خدناه في اعدادي وقال شو في ؟ 

حمايا شك و بعد ما كان واقف مخضوض وخايف علينا.... راح قاعد ع الكرسي ومرجع ضهره لورا وحط النضاره و قال بهدوء شديد يخليك يجيلك انهيار من الخوف من المجهول.. انتوا روحتوا مكان النهارده؟ ردينا في نفس واحد زي الكورال اللي ورا المطربين.. عُمان
قال ليه؟

انا قولتله نجيب خيار 
وحماتي قالت نتعالج في بلاد بره 
ما شاء الله ع التطابق 

قال واتعالجتوا ؟ هو البيت ده مفهوش رجاله تستأذنوا منهم قبل ما تطلعوا مكان؟ فرضا حصلكم حاجه؟ حماتي شغلت نغمه الحسين ناداني يا سي السيد وانا قولت اشغل نغمه آني آسف ما لقيت اللي جوزي ماسكني من قفا البلوزه زي المخبرين .. ولسه عايز يعلقني في النجفه من رموشي .. روحت صرخه صرخه انثي السحليه وبصيت لحماتي وقولتلها طول عمرك بتكرهيني .. عمرك ما حبيتيني.. عايزه توقعي بيني وبين جوزي .. ليه كده ؟؟ عشان انا من جنسيه تانيه ؟  عايزه تطلقيني ؟ عمري ما هادخلك بيت تاني..

حمايا بقي وجوزي نقطه ضعفهم خلافات العيله .. راح جوزي راميني من ايده استقريت فوق رجل حماتي اللي بتوجعها راحت مصرخه .. وقال شو هالكلام الفاضي ما عندنا نسوان تتخانق بالعيله.. في شي اسمه احترام..احنا هنطلع الشغل .. نرجع نلاقيكم اتصافيتوا واعتذرتي لامي.. 

بس طلعوا من الباب .. قالتلي شاطره يا بت ايه الفكاكه دي .. قولتلها عشان تعرفي الذكاء... و نادينا الشغاله تعمل شاي الساعه ٦ وتجيب جبنه بزيت الزيتون .. قولتلها الاكله دي ناقصها خيار .. قولتلك نقف نجيب 
#الكدب_ملوش_رجلين_له_ركب
#دفنت_هنا_ضحيه_الخيار
#الحكاواتيه
#سعاد_سالم