رئيس مجلس الإدارة
طارق لطفى
رئيس التحرير
أحمد أيوب
>
مقتطفات من قصيدة "حِب الناس"
شعر: أحمد أبوطاقه
سلم كل الأمر من إيدك لله
لما تضيق بص واتأمل في سماه
تلقى الدنيا كبيرة وواسعة
أما الهم فراح تنساه
عيش أيامك بين إخوانك
حب وود وراحة بال
تلقى الهم قوام ينزاح
حتى ولو كان تقل جبال
واوعى كمان تتمنى الشئ اللي في إيد غيرك
إوعى لترجع تكره خيرك
لكن دور في هموم كل الناس حواليك
واحمد ربك
تلقى همك قدره بسيط
تلقى الحب بيسكن قلبك
رزقك يوصل مش محتاج جري وتنطيط
حب الناس عيش واتعلم
واياك تتعود تتألم
ألمك ممكن يبعد عنك كل الناس
حتى قرايبك .. حتى اصحابك
حاول تجعل كل الناس حواليك أحبابك
حب بجد ومش تقليد
واوعى تكون للحب عنيد
حب بقلبك مش بقلوب الناس التانية
واوعاك تنسى إن حقيقي الدنيا ده فانية
مش هتدوم
لو راح تبقى لمليون عام .. لو مليار
مش راح توزن قطرة ميه من الأنهار
مش محتاجة إن الناس تكره
واكره ليه .. واكره مين؟
هو انا عارف بكرة انا راح اوصل على فين
علشان أكره .. علشان أخدع
أو حتى أدور مين أجدع؟
واخدع ليه صاحبي وأخونه..
علشان مال .. دهب .. الماظ؟
لو علشانهم هخدع صاحبى
يبقى الأفضل عندي إزاز
عندي حصيرة معاها مودة
أحسن مالكرسي الهزاز
دنيا إيه يابني قوم فوَّق
واحدة عجوزة .. لكن للغاوي بتتذوق
عايزة تلم الناس حواليها
دنيا صحيح المكر ماليها
يلا قوام اهربوا من إيدها
روحوا لسيد الآخرة وسيدها
روحوا لله .. قولوا يا رب
ادعوا ومدوا إيديكم ليه
ادعوا ده كل الخير بإيديه
ادعوا تلاقوا الشر يزول..
والداعي لمطالبه ينول.
اترك تعليق