بقلم: سماء عماد

فالاعتذار في حد ذاته هو إظهار ندمك على فعل معين، واعترافك بالأذى الذي سببته للشخص اللي قدامك.

اعتذار إيه أنا مبعتذرش لحد..أنا مبعرفش أقول لحد أنا آسف..

ببقى من جوايا نفسي أقول للشخص اللي متبني هذا الفكر بذمتك مش مكسوف من نفسك؟!

مش عايزة افاجأك و اقولك إن أوقات كتير حتى الاعتذار بيبقى غير كافي أما يكون اللي حصل كبير و شديد و تقيل و صعب، أو يكون عدى الوقت اللي لازم الشخص يعتذر فيه، أو اتوجعت من شخص مكانته في قلبك كانت كبيرة..

الاعتذار بيعيد ثقتك في نفسك و بيرد كرامة الشخص اللي قدامك و أحد اهم وسائل إعادة المياه لمجاريها..

حاول من بدري بدري علم ولادك ثقافة الاعتذار، علمهم الكلام الطيب و مسؤولية أفعالهم و تصرفاتهم و كلامهم، كلنا بنتعرض أوقات كتير جدا لإن نجرح حد بقصد أو من غير قصد، علمهم كلمات و مفردات التواضع و الاعتذار، بعدها علمهم كيفية الاعتذار..

علمهم إن الاعتراف و الاعتذار ما هي إلا قوة و تعبير عن حبك للطرف الآخر..

علمهم إن الاعترافات و الاعتذارات الصادقة هي بس اللي تستحق القبول..

علمهم إن الأعذار السيئة أسوأ من عدمها..

علمهم ان لا يفسدوا الاعتذار بالتبرير..

علمهم إن الاعتذارات المفتقدة للصدق و غير النابعة من القلب هي أسوأ بكتير من عدم تقديم الاعتذار من الأساس..

علمهم انا آسف، سامحني، حقك عليا، أنا غلطان و بعترف بخطئي..

علمهم انت حبيبي و انت غالي عليا، يعز عليا زعلك، ده بس شيطان و سوء تقدير لتصرفي و اللي صدر مني حقك على راسي..

علمهم يكونوا شيك، علمهم يكونوا أسوياء

في مقال في مجلة أبحاث علم النفس اللغوي

Journal of Psycholinguistic Research

قدم فيها عالما النفس ستيفن شير و جون دارلي إطار من ٤ خطوات توضحلك فن الاعتذار:

١- التعبير عن الندم و وصف اللي عملته بوضوح

٢- الاعتراف بالمسؤولية و فهم تأثير اللي عملته او قلته

٣- التعويض

٤- وعد بأن الأمر مش هيتكرر تاني

طيب، عملت كل ده و اعتذارك قوبل بالرفض؟!

في بعض الأحيان اعتذار واحد لا يكفي لإظهار ندمك على العك اللي عكيته وقد تكون مجبراً على تقديم الاعتذار كذا مرة عشان اللي قدامك يسامحك خصوصاً إذا كان خطأك كبير و لا يغتفر من منظوره هوا مش من منظورك انت..

تكرار الاعتذار مش ضعف، ده تأكيد على الشعور بالندم، وهذا الندم يساعد على تقليل غضب الشخص الآخر، ويعيد بناء ثقته فيك و علاقته معاك..

طيب برضو منفعش؟؟

كل اللي عليك تعمله أن توضح أنك عايز تحافظ على علاقتك كويسة مع الشخص الآخر، و تقدر تقول إنك آسف للي عملته و وصلكم للنقطة دي، وإنك عايز تستعيد علاقتك الجيدة ببه، وتوضح له أنك في انتظاره دائماً إذا غير وجهة نظره وقبل اعتذارك.

خليك عارف و متأكد إن المسارعة بالاعتذار دليل الشجاعة و المحبة و الثقة بالنفس و قوة الشخصية...

أربعة لا تكن قاسياً معهم أبداً، المرأة و الطفل و الخادم و من أتاك معتذراً..

يقول الإمام الشافعي:

إقبَل مَعاذيرَ مَن يَأتيكَ مُعتَذِراً إِن بَرَّ عِندَكَ فيما قالَ أَو فَجَرا. لَقَد أَطاعَكَ مَن يُرضيكَ ظاهِرُهُ وَقَد أَجَلَّكَ مَن يَعصيكَ مُستَتِرا.

اعتذر و لتعد الأيام الود بيننا إن شاءت...