رئيس مجلس الإدارة
طارق لطفى
رئيس التحرير
أحمد سليمان
برافو يا بنت الإيه
شعر: آية القويسني
بشجعني
وأقولي برافو يا بنتي وعاش
ولو راح اللي عزته بقول:
"ولا يهمك كإنه مجاش "
....
بطبلي
وأقولي برافو يا بنت الإيه
ولو حكمت في يوم أفية
بموت م الضحك ع الإفيه
وأقولي كفايا خفة دمى
يا بنتي خلاص هموت م الضحك
دا حقك تبقى نجمة كبيرة
وتاخدي دور في مسرح مصر
وأقول إيه النشاط ده
وأنا نايمة لبعد العصر
ولو ركِّبت لمبة بقول
يا فلتة وعبقرية زمانك
مفيش زي الدماغ دي اتنين
دا أصلًا فوق بقى مكانك
ولو كان الغلط مني ما أغلطنيش
ولو خدت القرار أبدًا ما أصغرنيش
أكمل لو هيحصل إيه
أنا الفاهمه وأنا الناصحه
وأنا بنت الباشا و الهانم
ولو بضعف بمد إيديا لإيديا
وأشد عليها تاني وأقوم
وبمسح دمعتي بنفسي
وأخرَّج نفسي طول اليوم
-
دي ناس بيروحوا وبيجوا
وفاكرين الحياة مثلًا
هتخلص لو يغيبوا ساعات
وفاكرين لو ميهتموش
هيبقى الحلم ضل ومات
مفيش في الحب شئ ثابت
وأفضل حب حب الذات
وتشجيعها
وتطويرها وتلميعها
وتفكيكها وتجميعها
وتفريغها من الإحباط
.
ولو ع العقل والمنطق
تعالى يا عم نحسبها
لو أنا بطلت أطبلي
وأفورلي وأشجعني
يجيلي عين منين أطلب
في يوم من حد يسمعني
ولو أسيب الإيدين تغرق
هيفضل مين يطلعني
فأنا أولى البشر بيا
تعبت وماله بستثمر
في نفسي دا حقها عليا
دا وعد وخدته على نفسي
في يوم أبنيها بإيديا .
اترك تعليق