طول ما أنا برة الاستوديو هتلاقيني بلف بين المستشفيات ادخل حالات.. واطمن علي حالات بهذه الجملة لخصت النجمة نيهال عنبر حياتها بعيداً عن أجواء التصوير.

طول ما أنا برة الاستوديو هتلاقيني بلف بين المستشفيات ادخل حالات.. واطمن علي حالات بهذه الجملة لخصت النجمة نيهال عنبر حياتها بعيداً عن أجواء التصوير.
تضيف نيهال عنبر.. بعمل الحاجات دي بحب شديد جداً عشان كده بيكرمني في كل حالة اتولاها واساعدها.. وبسبب ظروف الكورونا مركزة جداً  في الجزئية دي.. الـ48 ساعة الماضية ادخلت حالتين من أعضاء النقابة المستشفي وتابعت حالتين آخريين علاج منزلي.. وسامحيني مش هتقدر أقول اسماءهم دي أمانة.. هما يعلنوا بنفسهم لو عايزين.
وقالت نيهال عنبر.. ربنا خلقني احب اساعد الناس حتي لو كانوا ليسوا أعضاء في نقابة الممثلين.. أي حد يلجأ لي لازم اساعده.. ربنا اداني موهبة القدرة علي التواصل مع عدد كبير من الأطباء والمستشفيات وبسخر علاقاتي في مجال خدمة الناس.. وأصبح لدي خبرة كبيرة في تشخيص الحالة وتحديد العلاج المطلوب.. وأمارس هذه الخدمة منذ ما يقرب من 15 سنة وكلما اتيحت لي الفرصة لأكون عضوة في مجلس النقابة اتولي لجنة الصحة لأني الأكثر خبرة فيها.
عن الاهتمامات الأخري تقول.. المفروض انني رياضية جداً.. احب السباحة والجري والذهاب للجيم.. لكن انشغالي الشهور الماضية ابعدني عن الرياضة.. ودي حاجة مضايقاني أوي عشان وزني ابتدا يزيد بس هابتدي الأسبوع الجاي الرياضة تاني.. خاصة انها عنصر مهم جداً في الحفاظ علي اللياقة البدنية وزيادة مناعة الجسم ضد الأمراض خاصة وباء الكورونا.. غير كده بحب المطبخ جداً.. ماهرة في صواني الرقاق والمكرونة بالبشاميل والملوخية.. وابني حسام وأولاده يطلبوا أعملهم الأكل.
تضيف: مليش في الحلويات سواء عمايل أو أكل وكذلك ابني حسام وأحفادي.. لكن في رمضان بحب أعمل صينية الكنافة.
أخيراً تقول النجمة نيهال عنبر: يا رب السنة الجديدة تكون خير علينا ونتجاوز الموجة الجديدة لوباء الكورونا.. ونلتزم بالإجراءات الوقائية خاصة الكمامة لانها  اهم عنصر للحماية من العدوي.. وبلاش نجري ورا الاشاعات.. أنا شايفة ان ناس قلقانة جداً من التطعيم ضد الكورونا.. يا جماعة اطمنوا لا الدولة ولا وزارة الصحة هتجيب حاجة تضرنا.. والوقاية خير من العلاج.