أسرار يكشفها أحمد فتحى على الهواء .. أصعب وقت.. شارة الكابتن.. التكشيرة .. كورونا .. صـــور

كشف أحمد فتحى لاعب الأهلى السابق وبيراميدز الحالي، كواليس رحيله عن الاهلى وموقف أسرته من القرار، وكواليس أزمة شارة المنتخب وموقفه منها ولماذا يظهر دائما بالتكشيرة في الملعب ولا يضحك.

وقال أحمد فتحى فى تصريحات للإعلامية منى الشاذلى فى برنامج "معكم" على قناة cbc: "أصعب وقت مر عليها في تاريخى لحظة وداع الأهلى، ولم أتوقع خروجى من المباراة الأخيرة ومش متفقين على حاجة، وقلت لسيد عبد الحفيظ المفروض تجيبوا ليا تورتة تودعونى بيها قعد يضحك وهزر معايا".
وأضاف أحمد فتحى: "كنت سعيد جدا بما فعله الجهاز الفني واللاعبين وهى من أسعد لحظات حياتى لتكريمى من قبل الجهاز واللاعبين وتغيرت لحظاتى الصعبة إلى لحظات سعيدة".
وتابع الجوكر: "الكل في الأهلى كان عارف أن دى آخر ماتش ليا وقبلها بيوم الشناوى وسعد أتكلموا في آخر مران وانا أتكلمت وقلتلهم فيه لاعيبه بتمشى ولاعيبه بتبطل وسيظل الأهلى هو الباقى".
وأضاف أحمد فتحى: "هناك من يدير لحظات النهاية ولكن لم أرتب أي شيىء وخرجت بهذه الصورة الجميلة ودائما لا أحسبلها واتركها لله".
وقال أحمد فتحى: "زوجتى قعدت 4 أو5 أيام حزينة جدا وزعلانة على رحيله من الأهلى وطلبت منى إعادة التفكير، وقلت لها الأهلى دا النادى بتاعى ولو قلت لهم عاوز أقعد كنت قعدت ولكن الموضوع صعب".
وأضاف الجوكر: واحد صاحبى قالى طالما أعلنت رحيلك عن الأهلى يبقى خلاص مش هتلعب تانى، قلتله لا أنا هروح أكمل مسيرتى مع الأهلى وأتمرن كويس ومسألة اللعب في أيد الجهاز الفني وعمرى ما تدخلت في اللعب من عدمه، ودا قرارى أنى أكمل عقدى مع الأهلى واستحمل أي شيء يحدث معى".
وتابع أحمد فتحى: "أسرتى مالهاش في الكورة خالص، ومرة كنت عامل ماتش وحش جدا وكنت خارج متنرفز وسألت نورا إيه رأيك في الماتش قالتى كنت كويس جدا قلتلها أنت كدابة أنا كنت وحش جدا".
شارة كابتن منتخب مصر

وقال أحمد فتحى: "موضوع كبير وخد حجم أكبر من حجمه، محمد صلاح أخويا الصغير وأنا بحب جدا ولكن الحاجة لما تكون من حقى مش بحب أسيبها".
وأضاف الجوكر: "في حد كلمنى مش هذكر اسمه قالى إحنا عاوزين ندى الشارة لمحمد صلاح وأنت هتكون موجود، قلتله لا طبعا وأنت عاوز تعمل مشكلة ليه، وليه بتصدرلى مشكلة، وأنا عمرى ما عملت مشكلة، فقلت له لو أحمد حسن أو أبو تريكة مكانى كنت هتقدر تقوله كدة، قالى لا قلتله خلاص متكلمنيش في الموضوع تانى، والموضوع رجع تانى لما مرحتش الناس اتكلمت تانى".
كورونا صلاح
قال الجوكر: سألت زملائى عن محمد صلاح واطمأنت عليه من عبد الله السعيد وحمدى فتحى، وقالوا أنه كويس جدا ولم تظهر عليه أعراض والموضوع ده أقدار وصلاح أخويا".
التكشيرة في الملعب

وأضاف الجوكر: "أنا دائما بكون مركز في المباريات، ولكن في الأهلى الموضوع مختلف لأن الأهلى بيلعب على البطولات ودائما مكالب بالتركيز 100% ومش أي حد يلعب في الأهلى لأنك بتكون تحت ضغط على طول ولما بناخد بطولة تانى يوم الموضوع اتنسى خالص لذلك بطالب اللاعبين الشباب بتحمل الضغط، وموضع التكشيرة مش بيكون مقصود بكون مركز بس بتطلع كدة".
أسرته وكوورنا

قال أحمد فتحى: "كنا قاعدين في العين السخنة وقاعدين لوحدنا وفاطيمة نزلت الباسين، وبالليل درجة حرارتها ارتفعت جدا وكلمت الدكتور ونزلت عملت مسحة لكل الأسرة فطلعت نورا وفاطيمة إيجابية وأنا وملك سلبية وخديجة الدكتور قالى هنتأكد تانى لأن المسحة مش واضحة بالإضافة على المربية".
وأضاف الجوكر: "نورا بدأت تخاف وكل صحابها بدأوا يخوفوهم وعندنا ناس ماتت بكورونا، وقريبين مننا، والدكتور طلب منى الجلوس معهم لأنى كنت مخالطهم ونقضى فترة العزل مع بعض علشان يطمنوا، والحمد لله الفترة عدت على خير بس كنا عايشين في رعب".
زوجة أحمد فتحى .. ماليش فى الكورة
من جانبها أكد نورا إسماعيل زوجة أحمد فتحى، أنها مالهاش في كرة القدم نهائي، وبتتفرج على الماتشات علشان زوجها فقط.
وقالت نورا إسماعيل: "بتفرج على الماتشات علشان أحمد فيه ولكن بكون مش مركزة خالص في الماتش وبلعب في الموبايل وبعد الماتش بتصل بوالدى علشان أسأله إيه اللى حصل فى الماتش وأقول لأحمد لما يسألنى".