يقول المهندس علي عبد المنعم:

 الراجل من ساعة ما بيتولد لحد ما بيوصل لمرحلة النضج بيعيش عمره كله بيتعلق بأبوه اكتر من أمه علشان بيحس دايماً انه بيجيبله اللي هو عايزه و اي حاجه بيعملهاله و صاحبه و سنده اللي بيجيبله حقه في المدرسه من اي حد يعمل معاه مشكله او من اي حد يزعله في الشارع او في النادي فا بيفضل قرابة الربع قرن متعلق بأبوه اكتر من امه بس الحقيقه ان الراجل لما بيوصل لمرحلة النضج و يفهم يعني ايه مسؤليه و بيت و أسره و حياه بيكتشف ان اهم حد في حياته هو أمه . بيفتكر ساعتها من اول ما بدأ يوعي علي الدنيا لحد اللحظه ديه بيفتكر كمية المعاناه اللي امي كانت بتعاني فيها سواء في تربيته علي الأصول و الاخلاق و القيم و المبادئ بتاعة زمان اللي للاسف مهدره و بتنعدم الأيام ديه . بيفتكر كمية المعاناه اللي عاشتها معاه من صغره وقت تعبه و بتفضل نايمه تحت رجليك بالساعات و الايام لحد ما تقوم بالسلامه ، وقت ما بتوديه للمدرسه كل يوم و انها بترجع يادوب تنام كام ساعه علشان تصحي تاني تجهز اكل للبيت ، وقت ما تفضل معاك وقت التمرين في النادي ولا مركز الشباب و تشجعك و كفايا عليك انها قاعده بتتفرج عليك ده بيديك تشجيع جوه نفسك رهيب انك تطلع كل اللي عندك . بتفكتر كمية المعاناه اللي مكنتم عايشينها وقت ضيق الحاله الماديه في البيت و انها عمرك ما حسستك بكده لحد ما كبرت و افتكرت و فهمت كل اللي كانت بتعمله ساعتها . بتفتكر خوفها عليك طول السنين ديه حتي لحد ما تكبر و تبقي راجل . بتفتكر و بتفهم كل لحظه كان نفسها تفرحك فيها علي قد ما قدرت و انت ماكنتش فاهم ان ده اقصي ما في استطاعها و لو في ايديها تعملك اكتر من كده هتعملك . بتفكتر كل المعاناه اللي فعلاً عاشتها طول حياتها بحلوها و مرها علشان بس تشوفك كويس و فرحان و احسن واحد في الدنيا في عينيها . اول لما توصل للمرحله ديه و تفهم الكلام ده كله اعرف و اتأكد انك وصلت لأهم مرحله في مراحل النضج و انك لا تساوي شئ من غيرها . و بحس اني افضل كلام ممكن يتقال عن الأم و يلهص دورها في حياتك كلمات اغنية الكينج محمد منير امي الحبيبه : 

امى الحبيبة امى الحنون يا قلب ابيض من الندى يا صورة عايشة فى العيون 
امى الحبيبة امى الحنون انا كنت فين قبلك انا ومن غيرك ازاي اكون 
امى الحبيبة امى الحنون يا صابرة دايماً ع الاسى وعلى الهوان وعلى الشجون 
سامحينى يا حضن الحنان سامحينى 
سامحينى لو خدنى الزمان سامحينى 
و ادعيلى ديما ربنا يهدينى خلى الطريق الصعب يا امى عليا يهون 
ياحب غالى مالى كل كيانى علمنى ربى والرسول وصانى 
اوفى جمايلك فى خريف عمرك 
واخفض جناح الزل وادعيلك 
واطلب الرحمة للى ربانى وانا صغير 
واسئل عليكى من اخر الدنيا امشيلك 
زى الطيور التايهة ما تعود للغصون 
امى الحبيبة امى الحنون 
يا بسمة حلوة نورت لياليا انتى الكفاح والصبر والتضحية 
ما تزعليش لو شفتى منى اسية انا ابنك مهما كان ويكون 
وانتى الى جوة القلب يا امى الحنون