رحل ليمشي في جنازته كل محبيه الذين كان يعظهم ويأتون من كل صوب وحدب ليسمعون قصته بعد ان ورث لقب " سفاح كرموز" و  بعد "توبه " وصفها اهالي  المنطقة بأنها كانت " نصوحه" حيث اصلح نفسه وابتعد عن كل ماصنفه " مسجل خطر فئه "ا" اخر عشر سنوات في حياته لينقلب الى ناصحا لكل من تسول له نفسه الخطا او الخروج عن القانون وكأنه يكفر عن سنوات وسنوات عاشها متمردا وعصيا على القانون ومكدرا للأمن والسلم العام

رجعت اسكندرية لل" خمسينات"  و "شلت"  اللقب بس غيرت النهاية !

 اتحبست  من وانا "١٧ سنة " و حياتي كانت مابين السجن والشارع !!

اصبت لواء كبير  ايام "العادلي" وسلمت نفسي في النيابة و كافئوني لما تبت ب " كشك "!!

كنت اجرأ واحد يشيل "سلاح أبيض" وقتلت ب " الغلط"  .. وتبت في المحكمة بسبب "دعوه" !

الشباب بيجيلي يسمع حكايتي بقولهم " بصولي واتعظوا " .. ولو في العمر بقية " نفسي أحج"

" الجمهورية اون لاين " كانت قد اجرت معه هذا الحوار قبل وفاته بعدة أشهر والذي حمل قصته الغريبه وعظات تظهر حقيقة الحياة في عين شخص عاشها طولا وعرضا وكأنه يترك نصائحه الاخيره ووصاياه واليكم نص الحوار

مابين ماض بعيد حمل أحداثا مهولة لفصول قصة سفاح كرموز الاصلي الذي قتل احدى عشر ضحية بدم بارد  بالاسكندرية وذاع صيت جرائمه ليؤرق فيها الجميع وبات الصغير قبل الكبير يتابع اخباره وصولا الى القبض عليه ونهايته التي تمثلت في محاكمه درامية غطتها الصحف وقتها و انتهت باعدامه و بين ماض قريب حمل صاحب هذا الحوار ذات  اللقب ولكن ليس لذات التهم فلم يكن قاتلا متعمدا الا انه كان مسجلا خطرا فقد تشابه مع نظيره القديم انه ايضا ارق الامن واصبح صداعا في رأسه لفترة طويله بعد ان بات يتخذ من "عراك الشوارع"  منهجا له لايفارقه السلاح الابيض الذي تسبب للاسف في هذه" العراكات" مثلما يطلق عليها" السكندرية"في سقوط ضحايا واصابات ..  الا انه قرر ان يغير مصيره تماما في لحظة فارقة كان فيها صادقا مع نفسه ربما رأى فيها الحياة على حقيقتها .. اتخذ قراره  بأن يتبدل الحال والايصل لان يلاقي ذات مصير من يحمل لقبه ..

" انا اللي رجعت اسكندرية  للخمسينات .. مكنش في حد بيناديني الا باسمه .. تقدري تقولي انا اللي حملت اللقب وانا اللي شلت اسمه وختمت المسيره بنهايه مش متوقعه ... اه انا سفاح كرموز " ..ضحك ضحكه غريبه لاتعرف ان كانت استهزاء  من  تلك السنوات الطويله التي ستسرد ايامها حكايته التي ما ان تسمع تفاصيلها لن تصدق انها واقعا ... سنواته التي قاربت ال ٧٥ عاما والتي يرى فيها ان نهاية كل مافعله وكل سيطه لايساوي شيئا وان الامر لم يكن يستحق  .. وان الحياه حقا متاع الغرور وكذبة كبرى لاشئ فيها يدوم   .. ام انها ضحكة خجل من حكايته التي بات كل من يراه على حاله الان .. بهذه الشيخوخه وهذا السن الطاعن يتعجب قائلا " معقووول انت سفاح كرموز"!!

" الدنيا بتدي خيارات كتير .. اسهلهم الوحش والشر على فكره رغم اننا بنفتكر انه الصعب بس بتضحك علينا وبنكتشف في الاخر اد ايه كنا هبل " قالها مبتسما قبل ان اخبره انه الى الان سيطه يملأ المنطقه وان الكل مازال يهابه رغم تجاعيد وجهه وشعره الابيض الذي يوحي بضعفه فأضاف " ميغركيش .. انا اه تبت بس مبحبش اللي ييجي عليه وحد جرب كده لقى الشراسه موجوده فمن وقتها محدش بييجي ناحيتي وانا بقيت في حالي .. عاوز اسيب سيرة كويسه لعيالي"

" هنبتدي  منين الحكايه ياعم ابو كرشة " قلتها ضاحكة لأقاطعه وهو يحدثني عن ذكرياته في الاسكندريه .. منطقة كرموز تحديدا وكيف كان يسمع مثل غيره عن سفاحها الذي كان يهابه الكثيرين واكملت" انا جايه اكلم مع السفاح الجديد القديم .. القديم ده اتعدم وراح .. الجديد ده اللي حكايته محدش يعرفها اوي والمهم فيها انه ازاي تاب وحول حياته من مجرم لمواطن صالح وعنده كشك" !

- اسمك ايه الاصلي؟

- محمد احمد عبد الرحمن ابوموسى

- طيب .. امال ايه ابو كرشه دي .. اذا كان الشهره سفاح كرموز؟

- لا ده الشهره من سن سنه ل ٢٥ سنه

- وسبب التسميه ايه؟

- كان عندي سنتين وفي زيارة عند جدتي في قريتنا  في طنطا فأكلت خميره وعيش بطني اتنفخت ورحت المستشفى وقعدوني يومين وخرجت قعدت اسبوع كده فطلعت عليه من وقته " ابو كرشه" او " ابو كرش"

- طيب ده الشهره الاول .. ايه حكاية سبب تسمية الشهرة التاني .. اظن ده حكايته طويلة ؟

 - ضحك وقال اه طويله بس الناس اللي طلعته لان كنت بخش عركات بقلب جامد ومبيهمنيش وحصل للاسف ان ناس ماتت فيها ربنا يرحمهم وعركات بالاسكندراني يعني خناقات بس كانت بتبقي حرب شوارع

- واول مره اتعاركت فيها امتى؟

- من سن ١٦ سنه

- سن صغير اوي؟

- اه كنت عفي وقلت لايمكن اسيب حد يقف في طريقي والدنيا متتاخدش الا بالدراع لان اول مره اضربت فيها حسيت بقهر فظيع قلت ليه وعلى ايه وكنت وقتها في الجمرك بشتغل بياع رحت تاني يوم اتعاركت وهابوني بعدها في المكان كلها فعجبني الموضوع

- بتقول في ناس ماتت في المشاجرات دي؟

- اه  بس مكنش بقصد كانا بنبقي بنتخانق .. واحد كان اسمه  " الميت" وخدت فيها ٧ سنين  والحقيقه انا مكنتش بتعارك الا مع اللي بينزلوا برده يتعاركوا وعاوزين يبينوا نفسهم او يفرضوا نفسهم عالخلق

- انت كنت بتشتغل ايه؟

- ياااه اشتغلت حاجات كتير اوي بياع في الجمرك وشويه مشروع صغير كده وشويه في البحر لفيت يعني

- اول مره اتحبست فيها وانت عندك كام سنه؟

- وانا ١٧ سنه

- ياخبر!

- اه .. هو الواحد لما شيطانه بيركبه والشقاوه خلاص كده

- واستمريت تتشاقى وتتعارك قد ايه؟

- اكتر من ٥٠ سنه

- ٥٠ سنه؟؟

-ايوا اكتر لاني اتحبست اكتر من كده مبقتش بعد

-  ليه انت اتحبست كام سنه؟

- اتحبست في ٤٠ سنه كل مااخرج اعمل مصيبه وادخل واتعملتلي جوابات اعتقالات ايام حبيب العادلي

- اه انا سمعت انك اتسبب في اصابه لواء شهير وقتها؟

- اه وخفت وطلعت سلمت نفسي للمحامي العام واتعملت القضيه وات
لقد أرسلت
- اتحبست انفرادي قبل كده؟

- طبعا سوء سلوك .. لا انا بعترف ان حياتي كانت صعبه اوي

- طب ٥٠ سنه سجن .. وعراك بالاسكندراني زي مابتقول كل شويه .. وكل مابنسأل عليه يقولولنا ده كان شرس شراسه محدش يشوفها كان بينيم مناطق من المغرب
 وبيجري رجاله قدامه .. ايه كان سبب توبتك؟

- بصي مش هتصدقي .. انا اخر مره دي اتقبض عليه فيها كنت كبرت وقلت مش هخرج منها و القاضي هيديني اقله ٥ سنين .. كان المحامي بيترافع وكنت ابتديت اصلي بسبب واحد قابلته فقلت يارب ٣ سنين والتوبه .. فجأه القاضي نطق الحكم بالحبس ٦ شهور مكنتش مصدق فصرخت قلتله تايب يارب والتوبه نصوحه ومن وقتها على الصراط المستقيم

- انت عندك ولاد؟

- بصي عندي ولدين ٩ سنين و٦ سنين

- ده انت اتجوزت متاخر اوي؟

- اه دي حكايه برده تانيه .. اصلا مكنتش عاوز اجوز .. خدي بالك كانت الناس هتخاف تناسبني

- امال اتجوزت ازاي؟

- انا اخويا مات وكنت بحبه فقالولي مراة اخوك في رقبتها ٣ منهم بنتين فقلتلهم انا اولى بيهم وكنت تبت فاتجوزتها وربيت ولاد اخويا يعني بربي خمسه واعتبرتها اشاره برده بصلاح الحال وبحبهم كلهم ، كلهم ولادي

- في حد منهم ورث الشقاوه بقي او بمعنى اصح حد منهم عنده ميول انه يمشي قي نفس طريقك القديم؟

- لالا خالص كلهم متعلمين وفي مدارس وادب الدنيا وانا اللي بحكيلهم وبوعيهم وبقولهم لا البني ادم يقعد طول عمره يفتكر نفسه حاجه وهو ولا حاجه مهما كان او عمل كلها متر في متر ومش هيتبقالكو غير عمل صالح ينفعكو في اخرتكم

- انت دلوقتي صاحب الكشك ده .. ك
مين جابهولك؟

- لما خرجت من السجن في واحد محترم لما عرف اني تبت ساعدني وراح بيه المحافظه ومشينا في الاجراءات وجابهولي عشان ابقي انسان كويس ومن وقتها اهه

- بتعمل ايه لما حد بيبقي عنده فضول من شباب المنطقه وييجي يقولك " معقول انت سفاح كرموز" او يقولك احكيلي؟

- بقوله بصلي كويس .. شوف الراجل العجوز ده اللي كان خارب الدنيا دلوقتي ازاي ..  انك لن تخرق الارض ولن تبلغ الجبال طولا .. اتعظ وامشي عدل

- كنت لسه هقولك .. بعد العمر ده كله ايه الرساله اللى بتوجهها لاي حد من الشباب الطايش واللي بيبلطج او بيمشي في سلوك وحش او بيخرق القانون ؟

- هقوله نفس اللي قولته واقوله تاني اتعظ وبص ليه ولغيري .. توبتي دي عبره وعظه عشان افضل احكي الحكايه واقولي اني ندمان

- لو يرجع بيك الزمن هتعيش نفس الحياه؟

- ابدا يابخت من بات مظلوم ولا بات ظالم وحقي هاخده بالقانون ولو مخدتوش ربنا موجود وهعيش حياه مسالمه احب الناس والناس تحبني وهبعد عن اي حاجه غلط وهتمنى ان سيرتي تبقي جميله زي مادلوقتي مابحاول اصلح كتير

- تتمنى ايه لولادك؟

- اتمنى ليهم كل حاجه جميله ، اعلمهم كويس ويتستروا ويعيشوا حياه هاديه وبسيطه وخاليه من المشاكل وان ربنا ميحكمش عليهم ظالم

- من خبرتك في الحياه مين اكتر شخص سئ في الحياه؟

- الكذاب والخاين

- في حد خانك قبل كده؟

-اكيد صحاب كتير بس برده في ناس كويس الخير في امتي ليوم الدين
- ايه احلى حاجه في الحياه؟

- الستر والصحه والرضا

-ايه اسوأ حاجه الانسان ممكن يعملها في حياته؟

- انه يظلم حد او يستقوى عليه

- طيب ايه احلى حاجه ممكن يعملها في حياته؟

- انه يجبر بخاطر حد او يساعد اي روح بتقول يارب

- عاوز ايه  .. ايه اللي بتتمناه في العمر ده؟

- نفسي احج

- ايه العنوان اللي تحطه لحياتك؟

- الحياة كذبه كبيره

- امال ايه الحقيقه من وجهة نظرك؟

- الموت الحقيقه الوحيده ..  واللي لازم كل واحد فينا يشوف هو معاه ايه لليوم ده .. فياريت كلنا يبقي معانا كتير

- تفتكر من واحد عاش حياته زيك وجرب كل الغلط والصح .. ايه اسلم طريقه نعيش بيها الحياه ؟

- ضحك وقال الحياه هي اللي بتعيشنا يابنتي احنا بنضحك على نفسنا .. الصح انا الايام بتعيشنا فالعمر بيتسرق فالصح اننا نلحق نعمل فيه كل حاجه كويسه ونحقق فيه كل اللي احنا عاوزينه من غير غلط او اننا نئذي حد  ونشتغل ونسعى ونتبسط كل يوم ولو بالقليل  ونرضى الرضا شئ عظيم جدا