والله لأشَهِّد أغانيكي على اللي حصل فيكي! حقك علينا يا ست الكل!.

مع إنها قالتلكم في أجمل أغانيها "لا تنتقد" ومع ذلك محدش "سمع الكلام".

أنا فعلا حزنت جدا لما قريت رأي الناس في الفنان الكبير في السن لما يضعف جسمه زي كل البشر يعني بنيجي الدنيا بنصرخ خايفين معتمدين ١٠٠٪؜ على أهالينا فمفيهاش حاجة والله لما نقرب نمشي منها ضعاف شوية ولا محتاجين مساعدة شوية.

اللي حصل واللي اتكتب واللي اتذاع واللي أتقال ده حرام.

الصوت اللي كبرنا وحبينا مع أروع أغانيه جالها تكريم من مهرجان "جوي أوردز" وأكيد جزء منه تكريم مادي ومين عالم الحال إيه بعد سنين إعتزال طويلة؟! فالناس هاجمته.

مع ان الدنيا دواره مجرد شوية سنين وتبقى في مكانها وتبقى نفسك العالم ما يحكمش عليك بالموت.

وليه مش بنقدر صعوبة "فراق الأحباب"، وليه ما فهمناش نجاة وهي بتقولنا وتحكيلنا عن "الطير المسافر" وإنها يمكن حاسة أنها قربت تسافر (ربنا يديلها طول العمر) فحبت تطل علينا وتسيبلنا ذكرى نفتكرها بيها.

نجاة مكسورة الفؤاد مش مصدقة الناس دلوقتي  وتقول "أيظن" الناس إني مش من حقي أتكرم ولا أظهر؟!، "والله مية سلامة" ليكي وعليكي يا قيثارة.

في الغرب بيحترموا السن جدا لكن احنا ليه "إيد ع الزناد".

متخيل نجاة بتقول زعلانين ليه إني  اتكرمت في محفل تكريم عالمي يليق بمكانتي مع إن مفيش حد تاني سأل عليا.

خسارة ان ده يبقى شعور الناس ناحيتي وكأنكم بتقولولي في كبري "اسألك الرحيل"

كنت فاكرة في دماغكم أغنيتي "والنبي خلينا نشوفك" و"إلا فراق الحبايب" لكن هاقول إيه غير "إلهي ما أعظمك" انت اللي هتجيبلي حقي من كل شامت ومش عارفة اللي قال عليا الكلام ده "ماذا أقول له؟".

ده أنا كان نفسي في اليوم ده ييجي من زمان اللي تكرموني فيه تحت بند "أنا بأستناك"، قوووم تعملوا كده فيا.

والله لسه مليانة حياة ولسه "بأعشق البحر".

"إلا إنت" ما توقعتش منك إنت يحصل كل ده، ده أنا هاين عليا أقول "إلى اللقاء" فعلا وأمشي قبل وقتي "إلى حبيبي".

"أما براوة" فعلا أنكم خليتوني احس إنكم موتوني ودفنتوني بالحياة حسستوني إني "أنا ذكرى" بس "أنا عايزة ألعب وأغني".

لسه واثقة في حبكم  من كتر حبي ليكم ولمصر لأن "أنا كل ما أتوب أرجع تاني"، ومن كتر ما بأحبكم كنت عايزة أشوفكم وتشوفوني، لأني والله "أيوه بأغير" و"آه بأحبه" فحسسوني "بالسلامة".

أنا عارف إن كتير هيقولولي يا دكتور باسم انت مالك ومال الكلام ده ما تخليك في الطب و"تكتوكاية حكاية" بتاعتك على السوشيال ميديا لكن أعمل إيه "بان عليا حبه" ولازم أكون "بأحلم معاك" لأن اللي عملته الناس ده بعد حفل تكريم نجاة "بكاني لما خلصت دموعي".

يا قيثارة الطرب .. إوعي تقطعي بينا تاني "والنبي خلينا نشوفك".