رئيس مجلس الإدارة
طارق لطفى
رئيس التحرير
أحمد سليمان
طريق السعادة
الفرح والحزن قرار شخصي
د. هاله منصور أستاذ علم الاجتماع
الحب. العشرة. المودة. الألفة. الراحة. الأمان. السعادة. الهنا. الرضا.. كلمات ومعاني كلنا بنتمناها. نعيش فيها ونلون حياتنا بيها ونحلي واقعنا بمفرداتها. ونستمد منها قوة مواجهة مشكلاتنا. وهنا بقي تلاقي الناس بقت كثير مركزة مع السلبيات والوجع والظروف وكل واحد بيقول الناس بقت صعبة والظروف ضاغطة وبدأت تسيطر علينا حالة من حالات الاستسلام للكآبة بدرجة كبيرة وبقينا نستسلم للوجع والقلق والهموم وبقي كل واحد باصص هو ناقصه إيه ومش مركز هو عنده ايه. وشايف الناس عندها ايه ومش واخد باله ناقصها ايه فيزيد إحساسنا بعدم الرضا و الاسقاط علي الآخرين.
هنا بقي عاوزة أقول إن السعادة والفرح و التعاسة والحزن قرار شخصي. آه والله. لأن رؤيتنا الصح للأمور تقدر تخلق فرص سعادة و بالارادة والايمان والثقة بالرحمن نقدر والله نتغلب علي الصعاب بس لازم نبص للأمور من زاوية صح. لازم ندير حياتنا برؤية صح. كل إنسان فينا فيه جانب حلو وجانب صعب. خلينا مع الجانب الحلو ونقرب منه ونتغاضي عن الجانب الوحش ونبعد عنه.
أي موقف في الحياة ثلاثة عناصر أنا والآخر والظروف. يعني أنا باحتياجاتي ورغباتي وقدراتي وطموحاتي و توقعاتي وأحلامي وتصوراتي وطرف تاني سواء كان شخص أو مجموعة أهل. أصحاب. زملاء. جيران.
معارف. كله عنده برضه إمكانيات وقدرات وتوقعات واحتياجات وبيحكمنا في التعامل ظروف كثيرة عبارة عن عادات وتقاليد وقوانين ولوائح وظروف يعني الحياة مشتركة بيننا وبين الآخرين مافيش حد بيملكها لوحده وهنا بقي بقولك دور علي التوازن مع عناصر الموقف خير الأمور الوسط.
اوعي تحمل نفسك آكتر من طاقتها. إعمل إللي تقدر عليه وإدي الطرف الاخر ما يستحق بس بكرم شوية. وجدعنة برضة شوية. بس افهم الناس صح علشان تقدرها صح وتحس بيها صح. وخلي شوية عليك وآخرهم عند ربنا بس اوعي تجور علي نفسك. برضة دلعها وابسطها وارضيها وخد من الظروف علي قد ما تقدر وكيفها بثقة في الله وايمان ووعي وساعتها هتبقي أستاذ في إدارة المواقف وتعرف تقرب إللي يسعدك ويفرح قلبك وتبعد إللي يوجعك ويضايقك بذكاء وامان. خد من الحياة علي قد ما تقدر من الفرح وابعد علي قد ما تقدر عن الحزن والخوف والقلق واعمل كل إللي عليك وسلم أمرك لله تبقي علي طريق السعادة. ماهي السعادة في الرضا. وللحديث بقية إن شاء الله.
اترك تعليق