د. هالة منصور أستاذ علم الاجتماع

ولادي تاعبني قوي. ادعولي ربنا يهدي ولادي. خلاص مش قادرة أتعامل معاهم. إحنا كنا غير كدة خالص . وفي المقابل وعلي الناحية الثانية الأولاد شايفين اننا مش قادرين نفهمهم. مش عارفين نتعامل معاهم. مش قادرين نتجاوب مع متغيرات حياتهم. حوار دايم بين الأجيال علي مر العصور منذ بدء الحياة بس الفترة دي صوته أعلي شوية وحدته بقت اقوي بكتير.

هي دي ملامح الحالة إللي إحنا عايشينها في الوقت الحالي . لغة الحوار بقت أكثر حدة . منطق الكلام بقي أكثر تحيزاً. آلية المشاعر بقت أكثر أنانية . حالة من الازدحام وعدم الانضباط و اللخبطة في كل شئ . حالة من محاولات التبرير المستمرة أو الإتهام الدائم سادت بينا وبين بعض دون تركيز أو تعمق لا في الاسباب ولا النتائج طب الحل ايه؟ نعمل ايه؟  أو حتي نفهم وصلنا لكده ليه؟ وهنا بقي تعالوا نفهم ونركز علشان نقدر نصلح ونحل.

في البداية لازم نهدا ونفكر ونشوف هو إحنا متفقين علي ايه؟ ببساطة نتفق علي بعض الثوابت إللي بتخلينا نعرف نتعامل مع بعض وإحنا قادرين نبني توقعاتنا صح ويكون فيها قدر من الاتفاق.. إمتي هنسقف ونقول برافو؟ وإمتي هنلوم ونقول ما يصحش؟ وإمتي هنعجب بالتصرف؟ وإمتي نعدي والسلام؟ . وإمتي لازم نفهم ونوضح ونثبت؟ وإمتي لازم نحاسب ونلوم ونعاقب؟.

علشان ده يحصل لازم الأول نتناقش بموضوعية وحب وود وهدوء في كل حاجة علشان نتفق . دي مهمة كل من يملك ناصية الفكر سواء في التخصص أو الخبرة أو العلم أو السن أوالمكانة اوالاستيعاب أو حتي صاحب المشكلة وبمنطق الحوار الرزين والتفاوض السليم. نتفق علي حاجات ونأكد علي حاجات وبرضة هنعدي حاجات ونقبل حاجات ونرفض حاجات.وهنا بقي هنقدر نحط معايير نصيغ بيها التوقعات بمرونة ونسبية ونحط ثوابت وبمهارة وبذكاء ورقي العرض نعلنها ونوضحها ونكسب التأييد الكافي لتطبيقها بالحوار والحب والثقة ودي مسئولية كل من يستطيع التأثير بفكرة أو مكانه أو تخصصه أو مهاراته ليعلم الجميع ويستوعب ثقافته وبعد كدة طالما اتناقشنا واتفقنا وعرفنا يبقي لازم نأكد ونثبت ونعلن.

هنا بقي لازم نتفق إزاي نحاسب اللي يلخبط أو يخبط أو يكسراو يتمرد ونمنع ونرفض ونعزل ونلوم كل اللي يخرج بقصد عن الثوابت أو يتمرد علي أي شئ اتفقنا أنه ثابت ونمنع التمرد والتحيز والتجاهل بالمودة والمرونة والحب ومافيش مانع برضه نغير ونعدل ونطور باستمرار بالتفاوض بالتجاهل بالتغافل ماهو في الآخر هدفنا واحد نبقي سعدا والكلام وبالفعل لازم يبقي واحد مش شعارات ومبادئ. لا ده لازم يبقي منهج حياة نعرف نحب. ونعاتب صح حتي لو هنلوم يبقي برضه صح ونقرب من بعض أكثر علشان تدوم المودة وتبقي دنيتنا احلي وما يبقاش فينا حد شارد لا كبير ولا صغير ما هو في الآخر إللي هيسعدنا واحد.

قربوا من ولادكم . ناقشوهم. اقنعوهم اقتنعوا بيهم. كبروهم وقت اللزوم. واظبطوهم برضه وقت اللزوم. وللحديث بقية إن شاء الله.