رئيس مجلس الإدارة
طارق لطفى
رئيس التحرير
أحمد سليمان
تطورات الحالة الصحية لـ سلمى صباحي بعد العملية الجراحية
كشفت الإعلامية سلمى صباحي، عن اخر تطورات حالتها الصحية، بعد 3 أسابيع على خضوعها لعملية جراحية في المخ.
وكتبت سلمى صباحي، عبرحسابها الشخصى على الـ فيسبوك: "انهارده فات ٢٠ يوم ع العملية..20 يوم مانمتش فيهم ساعة على بعضها .. ماهو لما دماغك تتفتح و يتحط فيها جسم غريب متوصل بأنبوب لحد بطنك و يبقى عندك غرز في دماغك و في بطنك يبقى طبيعي ماتعرفش تنام ،، لا تعرف تحط راسك على مخده ولا حتى تنام على جنبك".
واضافت سلمى صباحي: "بس بالرغم من ان دي فتره صعبه من عدم النوم و شدة الألام و كتر الأدوية ،، انا اتعودت دايما ابص على الحلو و في حاجات حلوه كتير شوفتها الفتره دي .. أولا ان ربنا بيحبني .. لطف بيا أوي لما خلاني اكتشف المشكله اللي عندي من حاجه بسيطه جدا ما كانتش حتى بتوجعني و كان ممكن جدا اطنش و ما أركزش فيها لكن ربنا خلاها تزيد عشان انتبه و أدور على السبب و الحمدلله الحمدلله هداني لدكاتره محترمين و نجاني من خطر كبير كان ممكن يحصلي لو كنت استنيت اكتر من كده».
واستكملت سلمى صباحي: "ثانيا حسيت أوي ب حب الناس في سؤالهم و دعواتهم و ممتنه جدا جدا لكل حد افتكرني بدعوه في صلاته او في الكعبه او عند مسجد سيدنا النبي و بعتلي من هناك ،، و كل حد زارني و خفف عني ،، كبيره أوي عندي ان حد يقرر يديني شويه من وقته و ينزل من بيته عشان يجيلي و انا تعبانه .. من الحاجات اللي أثرت فيا أوي الناس اللي خدوا من يومهم وقت و جهد و تعبوا نفسهم و عملولي أكل بأيديهم و بعتهولي! حقيقي تصرف فيه اهتمام و خير غير طبيعي".
وتابعت سلمى صباحي: «أكتر حاجه فرحتني و بكيتني كمان الأطفال اللي بعتولي رسايل و رسومات و فويس نوتس .. حبكم أكبر نعمه ربنا كرمني بيها .. ثالثا اكتشفت اني غلط!!! أيوه غلطت كتير في حق نفسي ،، و دي رساله لكل أم ،، ركزي مع نفسك خلي بالك من نفسك ماتطنشيش نفسك ،، اول ما تحسي بتعب اكشفي من فضلك و اتطمني،، مش لازم تفضلي تستحملي لحد ما تقعي ،، و متخليش حاجه تعصبك عشان آخرة العصبيه خطر كبير عليكي ،، انا باوجه كلامي هنا للأمهات بالذات عشان احنا كلنا زي بعض ،، الفتره دي خلتني اعيد تفكير في طريقتي و احاول اني اكون أهدى و اخلي بالي من نفسي عشان اكون قادره اخلي بالي من ولادي».
واختتمت سلمى صباحي: «رابعا بصيت على النعم اللي ربنا ادهالي طول حياتي و أيقنت ان الابتلاء دايما ربنا بيدي معاه الصبر و التحمل ،، ربنا عارف انا اقدر احتمل ايه و مقدرش احتمل ايه .. الحمدلله الحمدالله الحمدالله على نعمك الكتير يا رب ،، انا بس نفسي انام».
اترك تعليق