"بتخاصمنى حبة، وتصالحني حبة، كل شوية تغضب كده من غير مناسبة، إهدا يا حبيبي إهدا، هو الحب لعبة، ولا الحب لعبة؟".. فعلاً الحب لعبة الحياة اللى بيديها الطعم واللون والكلام الرقيق المتعة والإثارة والجمال، وعلشان الحب لعبة لازم يكون فيه صلح حبة، وخصام حبة، وبُعد حبة، وقُرب حبة، وكلة بالمودة والمحبة والاستمتاع بالحب.

ولازم لما نتخاصم نجرى علي بعض علشان نتصالح وبعدين نتعاتب ونكمل اللعبة وفقا لقواعدها، لأن ساعات الخصام بيبقى دلال و العتاب بيبقي رغبة في الصلح وإثبات المحبة حتي البُعد شوية ساعات بيكون للشعور بحلاوة القرب تاني، وعلي فكرة أنا باتكلم هنا عن الحب بشكل عام مش راجل وست لا، الحب كله بكل أنواعه وأشكاله، بين الأهل والأصدقاء والزملاء والأحباب وحتى الأشياء، وده جمال لعبة الحب لكن لما بنبطل ناخد الحب لعبة ونحطة في إطار الجد قوى الناس بتبقي صعبة و بتتحول الحياة إلي صراع وعنف ومشاحنات وتوقعات غير ملباة وبتبقي الناس شايفة الحب غالب ومغلوب معاه الحق أوعليه الحق ويتحول الحب من وجهة نظرهم لتملك وشجن ونكد لأنه بيبقي جد قوى، حاد قوى، جاف قوى في بعض الأحيان وكل حاجة وأي حاجة تبقي بالحسبة الدقيقة قوى ومشغولين قوي بمين غلطان ومين زعلان وبالكلمة والحرف والهمسة واللمحة بحسبة صعبة فاقدة المودة والمسامحة والملاطفة والدعابة، والتربص بيبقي حاضر في كل حاجة ولأي حاجة.

علشان كده الحب بدأ يهرب من حياتنا لأن فعلاً الحب لعبة الحياة، الحب أصله الاستمتاع، الحب لازم يكون فيه دعابة، فيه سعادة، فيه ضحكة، فيه تراضى، فيه تغاضى، فيه تسامح، فيه محبة، فيه هزار، فيه ابتسامة وكلام وأفعال وخصام وخناق وصلح وود وقرب وبعد وعشم وتفاهم وتراحم وتشجيع وتحفيز والشاطر في اللعبة واللي عارف قواعدها كويس هو إللي مستمتع بيها وعارف يدير أدواته صح ويقرأ المفردات ويترجم رموزها بحرفية واحتراف ومهارة، وأول ما يلاقي اللعبة فاقدة المتعة بيحسن الأدوات ويكثف التمرين ويخطط للفوز علشان يعرف يستمتع باللعبة ويسيطر علي حالة الحب علشان تبقي وتعيش رغم المشاكل والمصاعب والحياة بفن ومهارة ومودة ومحبة وبساطة.

والقاعدة الأساسية للعبة .. حبوا الحب، حبوا أنفسكم، حبوا الحياة، حبوا كل إللي حواليكم بمنطق الاستمتاع بالمحبة والسعادة في المودة وبلاش تفلسفوا الحب وبلاش تعقدوا المشاعر وتصعبوا معاني الحب البسيطة في نظرة رضا في كلمة محبة في فرحة لُقا في مساندة ورحمة من غير معاندة أومكابرة أو المبالغة في إثبات جدارة أو انتصار، وإياكم والنكد في الحب، اتعلموا دايما تفرحوا بالحب، تستمتعوا بالأحبة، تراضوا الزعلان و تصالحوا المتخاصم وتفتشوا عن اللى غايب، وتقربوا من اللى يبعد، وتسهلوا الصعب، وتهونوا الأحزان، وتحلوا المشاكل، وتطبطبوا في اللحظة المناسبة بحب، وللحديث بقية إن شاء الله.