رئيس مجلس الإدارة
طارق لطفى
رئيس التحرير
أحمد سليمان
عارفة عبد الرسول تكشف عن المعاناة التى تعرضت لها بعد مقلب رامز
شاركت الفنانة عارفة عبدالرسول ، جمهورها بـ صورة تجمعها برامز جلال بعد مقلب برنامج "رامز نيفر إند"، بعد ان تعرضت لمقلبه فى رمضان.
وكتبت عارفة عبدالرسول عبر صفحته الشخصية على الفيسبوك قائلة: "اتصلت بيا واحدة وبكل الحب قالتلى إحنا بنفتخر بيكي ونفسنا تحضري معانا إفتتاح محل فى البوليفارد، من فرحتي مسألتش محل إيه لإن كان نفسي أروح السعودية وكل اللى شغلني الوقت وزنقة رمضان".
واضافت عارفة عبدالرسول: "بس البنت كانت شاطرة وعرفت تدبر الميعاد، أخلص تصوير وأطلع ع المطار ألحق آخر طيارة افتتح المحل وأطلع ع المطار، كده يعني صد رد ولكم أن تتخيلوا الإرهاق والتعب".
وتابعت عارفة عبدالرسول : "من أول ماحطيت رجلي في المطار وأنا بأعامل كملكة.. خدمة مرحبا وكبار زوار وحوسة.. وصلت أخدتني عربية فارهة إلى فندق هيلتون الرياض ونزلت في حتة سويت يجري فيه الخيل وكل حاجة تاتش بقيت خايفة ألمس حاجة تفرقع في وشي".
وأشارت عارفة عبدالرسول الى: "الروم سيرفز كل شوية يخبطوا جايبين تحية من مدير الأوتيل وكارت بالإنجليزى معناه إن إدارة الأوتيل في غاية الانكشاح لإستقبالي، أفتح التليفزيون ألاقي صوري بفيديو لطيف وقد إيه إحنا مش مصدقين إنك معانا، تخيلوا معايا بس الحالة اللي أنا فيها، الصبح جم بنات كوافير وماكيير والبنت اللي اتصلت بيا واسمها شريفة، بقت تسألني أسئلة عرفت بعدين إنها بتشوف شغلها".
واستكملت عارفة عبدالرسول: "اطمنت عليا لأني جاية من تصوير وأصرت إني أطلب أكل وآكل قبل ماننزل.. وصلت قابلتني المذيعة الجميلة كارلا المريحة للعين والقلب وخضت تجربة السهم والخيل وأنا فرحانة وقصيت الشريط بمقص تحفة ودخلت ع المطعم اللى كل حاجة فيه بتلمع قوي والشياكة والجمال وأنا بزداد سعادة وفرحة مافرحتهاش عمري، ووصل الشيف الكبير هو أنا فعلا استغربت شكله وقولت لنفسي إنه شبه الإرهابيين أسود في أسود كده، وأنا مشرئبة قوى وحاسة إنى يسرا ولا مرفت أمين ..هوب لبست التورتاية".
واختتمت عارفة عبدالرسول حديثها قائلة: "انتوا متخييلين ؟..طلعت سابع سما ونزلت على جدور رقبتي، مش مهم المقلب، صدمتي النفسية محتاجة علاج فعلا، أنا بحب رامز من زمان وعارفة أنه الواد الشقي بتاع العيلة وفرحانة بيه إنه ماسك في الواد ده ومش بيتغير حتى أفلامه شقية، لكن برضه مش كده يعنى إفرض جرى لى حاجة، أنا طول عمري صريحة معاكم وفعلاً ماكنتش أعرف وده اللي حصل، أما الست شريفة والسيد رامز ليهم روقة بس اتعالج من الصدمة الأول".
اترك تعليق