رئيس مجلس الإدارة
طارق لطفى
رئيس التحرير
أحمد سليمان
طريق السعادة
الحياة حلوة.. بشروط
د.هاله منصور .. أستاذ علم الاجتماع
"الحياة حلوة بس نفهمها" فعلاً الحياة حلوة بالمحبة بالإخلاص بالود بالعيلة بالصداقة. فعلاً الحياة حلوة بالعمل بالإنجاز بالقدرة علي التغلب علي الصعاب. الحياة حلوة بالإيمان بالحمد والرضا علي النعم مهما كانت بسيطة. كل مانرضي ونشكر ونحمد الرحمن تتعاظم النعم. الحياة حلوة بقلب طيب يسأل علينا ووقت الشدة يطبطب ويساعد ويعين.
الحياة حلوة لما نلاقي اللي يحس بينا ويقرب ويسند من غير مايوجع او يلوم بألم وقت التعب. الحياة حلوة لما نقدر نسامح ونعرف نصالح ونحب. نجامل ونتغاضي ونتجاهل في بعض المواقف والأمور من أجل استمرار المودة والمحبة ماحنا بشر لا ملائكة ولا شياطين. الحياة حلوة مع كل كلمة طيبة ونظرة حنينة واحساس أصيل من الحبايب. الحياة حلوة في المساندة مش المعاندة. الحياة حلوة في التوازن والوسطية في كل حاجة واي حاجة. الحياة حلوة في لمة حلوة. في كلمة حلوة. في مقابلة حلوة. حتي في غنوة كلماتها حلوة نحس بيها ونعيش معاها الذكريات.
الحياة بقت صعبة لما الجشع ملا القلوب. والشكوي والوجع بقت من اقرب الناس. والأنانية بقت هي الأساس. والتكشيرة والهم والشكوي بقت مفردات الحديث. والحسد والانتقام والتعدي والتصدي للأسف بقت لغة حياة بين الناس. ومع كل ده ضاع الرضا. تاهت القلوب. صعبنا علي بعض الحياة. وقال بنشتكي من الظروف. وسيطرت علينا كلمة "بكام". حتي المحبة بقت بكام. والمشاعر بقت بكام.
ومن هنا طفح المرار جوا القلوب وزاد قوي الخوف والجشع حتي بين الأهل. ليه كل ده؟ لأننا نسينا ان في حاجات كتير ماينفعش تتقال بكام. نسينا ان الإيمان الحقيقي في المحبة. "لا يؤمن احدكم حتي يحب لأخيه ما يحب لنفسه".
سلموا المقادير للرحمن. تعاملوا بمحبة لوجه الله. اخلصوا النوايا للكريم. ابحثوا عن الصدقات بالكلمة الطيبة والمودة والمحبة وتفريج الكروب. دوروا علي الرزق في الإخلاص. في النوايا والاعمال والأقوال. عاملوا الرحمن مش الإنسان. اوصلوا الارحام. ثقوا بالرحمن هتبقي الحياة حلوة. تفاءلوا مهما كانت الصعاب. ابتسموا مهما كانت الآلام هتلاقوا الجبر والستر والرزق وهتحلوا الحياة. أصلها بتحلو بالمعاني مش بالغطرسة ولا الغرور ولا التعالي. دوروا علي السعادة في الأمان والمودة والإخلاص والمحبة والكلمة الطيبة وصلة الارحام ماهو ده المدخل الحقيقي لطريق السعادة. وللحديث بقية ان شاء الله.
اترك تعليق