غرفة عمليات الجمهورية اونلاين: اولياء الامور يرفضون توقف الامتحانات وتخفيف الحضور في التيرم الثاني

اكد اولياء الامور رفضهم التام للاراء التي تطالب بتوقف الامتحانات بالمدارس وتأجيل ماتبقي منها لما بعد اجازة نصف السنة .. بحجة الخوف علي صحة وسلامة الطلاب والمعلمين ..

اكد اولياء الامور اعضاء غرفة عمليات الجمهورية اونلاين عبر الواتس اب ان التوقيت الحالي لايسمح ابدا بتأجيل الدراسة والامتحانات التي انتهت او قاربت علي الانتهاء لمعظم الطلاب كما ان لجان الامتحانات اصلا يتم فيها اتخاذ الاجراءات الاحترازية وفي مقدمتها تحقيق التباعد بين الطلاب داخل اللجان

قالت نيفين ثابت ولية امر من الفيوم وادمن جروب تعليمي كبير ان

الوضع الان حرج والڤيرس منتشر بشكل صعب وده بناء على كلام المعنيين بالامر مثل مستشار الرئيس للشئون الصحية. ومع ذلك ًانا كأم ضد اى مطالبات او دعوات بتوقف الدراسه او الامتحانات مهما كانت نسبه الاصابه لان اغلب الصفوف منها امتحن ومنها اللى شغال اصلا امتحانات. واكيد مش هتكون امتحانات اولى وتانيه ثانوى هى المشكله …. عايزين نمتحن اولادنا بيذاكروا وتعبانيين ومحتاجين اجازه ومن جهتنا كأولياء امور عاوزين ناخد نفسنا من نزيف تكاليف الدروس الخصوصيه تعبنا حقيقى والوضع الاقتصادى صعب على الكل ورب الاسره بيجاهد علشان يوفر لاولاده المصاريف الاساسيه للمعيشه بالاضافه لاعباء الدروس الخصوصيه .. وايضا لو تم توقف الامتحانات مثلا لا قدر الله وصدر قرار بتكمله الامتحانات بعد الاجازه كما يقترح بعض الاسماء مش هتكون اجازه لاولادنا وهيذاكروا وهياخدوا دروس حرررام كفايا. .. وعلقت علي مايردد البعض من اراء غريبة قائلة كل واحد معنى بامر ما بيفهم فيه يتكلم فى تخصصه التعليم مش ناقص بصراحه مقترحات من س وص .. والاجازه جايه جايه بس نتمنى مانلاقيش رحلات وتجمعات وناخد فتره نبتعد فيها عن الزحام ولا الكورونا مش بتيجى الا فى تجمعات الامتحانات ،. الحقيقه انا باستغرب على الاجيال اللى حقيقى مش عايزه تتعلم وعمالين ينادوا بهشتاجات لوقف الدراسه والامتحانات

ايدتها شيماء علي ماهر ولية امر وادمن جروب تعليمي

وقالت ياريت نرجع تآني يومين في الاسبوع و باقي الاسبوع اون لاين لان أعضاء هيئة التدريس في المدراس كلهم بيقعوا واحد ورا التاني

اما الدكتور تامر عبد الحافظ بمديرية التعليم بالشرقية فيؤكد انه من خلال الخبرة التي مررنا بها العامين السابقين أتوقع استكمال امتحانات التيرم الأول بشكل طبيعي دون تغيير لأنه في الأساس تم وضع جداول الامتحانات لتكون كثافات اللجان لا تتعدى ٢٠ طالبا باللجنة وبالتالي وذلك تماشيًا مع التعليمات المتجددة في هذا الشأن حتى لو حاول البعض (استغلال) مواقع التواصل لخلق بلبلة ولوبي ضغط على الحكومة خصوصا أنه أسابيع قليلة وتنتهي الامتحانات بالفعل.

أما نظام الدراسة في التيرم الثاني فاعتقد أنه لن يكون هناك إلغاء تام للدراسة لسلبياته الكبيرة على الطلاب وإذا تم اللجوء إلى نظام التناوب بين المعلمين وتقليل أيام وساعات الدراسة الأسبوعية فلدى المعلمين وأولياء الأمور والطلاب الوسائل التكنولوجية التي سيتم استثمارها في تعويض الأيام و الحصص المفقودة مع العلم بأن خبرات المعلمين التكنولوجية سواء اتفقنا أو اختلفنا تطورت بشكل ملحوظ لتكون بديل آمن وناجع.

أما بالنسبة للامتحانات التيرم الثاني أتوقع أيضا إنها ستكون شبه طبيعية ولن يتم الرجوع إلى أساليب كنا نعتقد أفضليتها ولكن تم استغلالها بشكل سيء مثل الأبحاث.

قالت امل النجار ولية امر من المنصورة

ياريت من يقترح وقف الامتحانات يخليه في حاله

فهو لايعلم ما يعانيه اولياء الامور ..

تساءلت امتحانات ايه اللى تتأجل للتيرم التاني

كل واحد يتكلم ف تخصصه بقي

كفاية التعليم مش ناقص خرااااب

اوضحت استياء اولياء الامور بسبب الآراء والاقاويل التي تنتشر على صفحات السوشيال ميديا والتي يروج لها البعض

اضافت

ان إرجاء الامتحانات لما بعد اجازة نصف العام يعني ان تستمر الدروس الخصوصية للأسف ف الاجازة وهذا يشكل عبئا وضغطا نفسيا على ولى الأمر والطالب واثبت فشله ف تجربة العام الماضي

فلا داعي لصدور اي قرار يربك الطلاب ف هذا التوقيت وأيد ت ضرورة استكمال الامتحانات لباقي المراحل مع التشديد على الإجراءات الاحترازية ومراعاة المسافات بين الطلاب وتقليل وقت الراحة بين المواد أثناء اليوم لتقليل الاختلاط بين الطلاب

اضاف عبد الحميد المالكي بادارة الشروق أتوقع أنه يتم العودة للحضور الجزئي مع بداية الترم الثاني مثلما حدث في العام الماضي واستكمال الدراسة أونلاين عن طريق منصات التعلم عن بعد

و القنوات التعليمية حتى تستطيع المدارس تطبيق الإجراءات الاحترازية والتباعد الفعلي تطبيقا حقيقيا داخل الفصول وذلك بأن يكون حضور كل صف دراسي يومين فقط في الاسبوع حفاظا على صحة و سلامة الطلاب وأسرهم والمعلمين وجميع العاملين بالتعليم

ورفضت اماني الشريف ولية امر وباحثة علوم سياسية مايتردد في بعض المواقع وصفحات السوشيال ميديا بوقف الامتحانات مؤكدة : مينفعش يحصل الكلام ده أصلا لأن لو حصل يبقى بيضيعز مجهود طلاب وأسر كتير معاه بالشهادة الاعدادية والنقل ثانوي وما ينفعش نبرر ده ونقول خوفا على صحه الطلاب لأن الطلاب بينزلوا دروس وسناتر وبيخالطوا في كل مكان واتبهدلوا طول التيرم يبقى من حقهم يمتحنوا وكفايه تاجيل احنا عانينا السنه اللي فاتت

و مش هيجي على يومين الامتحانات ونقول العدد هيزيد لأن كده كده العدد زيادة وفي كل بيت في مريض أو أكثر يبقى يحضروا الامتحان بتطبيق الإجراءات الاحترازية