في غرفة عمليات الجمهورية اونلاين: اولياء الامور والمعلمون يرفضون الاسئلة المقالية في امتحانات الثانوية العامة

اجمع اولياء امور طلاب الثانوية العامة والمعلمون وخبراء التعليم اعضاء جروب غرفة عمليات الجمهورية اونلاين عبر الواتس اب علي ضرورة الابقاء علي منظومة امتحانات الثانوية العامة كما كانت عليه في العام الماضي سواء من حيث الشكل او المضمون ..

اعلنوا رفضهم القاطع لاضافة اية اسئلة مقاليه الي امتحانات هذا العام ..

وقالوا ان طلاب الصف الثالث الثانوي العام تلقوا دروسهم وتدربوا علي الطريقة التي جاءت بها اسئلة الامتحان في العام الماضي والتي لم تتضمن اية اسئلة موضوعية وكانت تعتمد علي الفهم والتحليل وتبتعد عن الحفظ والتلقين كما انهم لم يمسكوا ورقة ولا قلم منذ تلات سنوات وليس من المنطقي ان نطالبهم بالكتابة الان ..

قال الدكتور اشرف العربي انني أرى أن نظام البابل شيت هو الأنسب للامتحان هذا العام لاعتبارات كثيرة أهمها الاستعداد النفسي لدى الطلاب ونجاح التجربة لحد كبير العام الماضي

اضافت امل النجار ولي امر طالب بالمنصورة شوفت ان ابناءنا تدربوا علي امتحان العام الماضي

و نوعية الأسئلة

يعني مفيش مقالى اطلاقا

وده من اول السنة

يعني احنا مش نقل علشان يبقي فيه تغيير في اللحظات الأخيرة

والموضوع مختلف تماما في الثانوية العامة عن سنوات النقل ..

اشارت الي انه في اللغة

العربية التعبير والقصة لم تعد اسئلتها مباشرة ولا سرد وخلاص

او ان الطالب حافظ موضوع تعبير يروح ينقشه فالنظام اتغير تماما في أسئلة الاختيار من متعدد

وكذالك باقي مواد اللغات الانجليزي والفرنساوي والألماني

يعني الموضوع مش سهل كدة انه يتغير

ده لازم الطالب يبقي عارف من اول السنة

والا الشهور اللى فاتت دي كلها تبقي ف الفاضي والعيال تضيع

علشام اللى بيقول خليها زي النقل ده اكيد مش عارف انه الموضوع اكبر من رأي وكلمتين وخلاص

من حق الطالب يبقي عارف من اول العام بس

لو عارف بناءا عليه طريقة الشرح والتدريب هتختلف

يعني بقالنا شهور من اخر الصيف بنحل بطريقة ازاي فاجاة تتغير

يبقي الل فات كله ملوش لازمة

طب ده ينفع

و بعدين احنا مشينا على اللى عمله بالضبط مع طلاب الثانوية العامة العام الماضي

يعني ماشيين على نفس طريقة امتحان العام الماضي

لو كان عايز يغير يبقي من بداية العام

انما يجي على باله فاجاة يغير تبقي مصيبة

الموضوع مش عند معانا وانتقام يعني

أنا معنديش مشكلة انه يغير

بس من اول السنة علشان نبقي بدأنا صح٣

اي تغير دلوقت يبقي محتاج شهور تاني من الأول علشان يتدربوا تاني على كل حاجة دروسها بأسئلة مقالية

وده صعب لان مفيش وقت اصلا

حقيقة التعبير ف العربي والترجمة ف الانجلش مبقتش تيجي بطريقة السرد والحفظ خلاص

ياريت الناس اللى متابعة تفتح أي كتاب خارجي انجلش وتشوف الترجمة السؤال فيها اتغير تماما

وعلى فكرة اتغير للصعب وبقي محتاج تركيز اكبر وفهم

والطالب خلاص نسي الطريقة القديمة التقليدية وده اللى المفروض النظام اتغير علشانه

ما ينفعش بقي نرجع الطالب لحاجة اصلا مبقاش يشوفها ف كتب ولا تدريبات مقررة عليه

حقيقة التعبير ف العربي والترجمة ف الانجلش مبقتش تيجي بطريقة السرد والحفظ خلاص

قالت مطلبنا الوحيد اللى عايز يغير حاجة يبقي من بداية العام الدراسي وياريت نراجع مدرسي المواد ونشوف رأيهم لانهم اكثر احتكاكا بالمادة والطلاب

الطالب كدة هيتجنن مبقاش عارف هو بيعمل ايه ورايح على فين

وف الاخر يتفاجئ بقرار عكس تماما اللى صدر قبل كدة .

قال عمرو جاويش معلم عربى لابد من أن يجمع الامتحان بين الموضوعي والمقالي ، الموضوعي فقط ظالم .
يبقى كده نجمع بين التصحيح الإلكتروني للموضوع عبر البابل شيت فهو وسيلة ناجحة جدااا ، وبين العنصر البشري لتصحيح الجانب المقالي
قال عبد الحميد المالكي مسئول تطوير تكنولوجي بالشروق
كون الأسئلة مقالية لا يعني أن إجابتها تحتاج إلى الحفظ فبالنسبة للغة العربية إجابة سؤال مقالي بلاغة أو أدب أو نصوص لا يحتاج إلى الحفظ بل يعتمد على الفهم والطالب الغير فاهم لا يستطيع إجابة سؤال مقالي ولا موضوعي
وكذلك التعبير لا يعتمد على الحفظ لكن يحتاج الفهم وثقافة الطالب ورغم أهمية الأسئلة المقالية أرى أن المشكلة الكبرى في الأسئلة المقالية هي تدخل العنصر البشري في التصحيح مما يؤدي لعدم تكافؤ الفرص وظلم كثير من الطلاب وبخاصة في تصحيح التعبير بسبب تدخل العنصر البشري
لذلك أرى أنه من الأفضل ولمصلحة الطلاب الأسئلة الموضوعية بنظام البابل شيت مثل العام الماضي .
بينما تري دعاء صالح ولي امر من المنوفية ان امتحان البوكليت افضل من البابل شيت وان يكون اجابة الاسئلة الموضوعية بالاختيار من متعدد بنفس الورقه منعا للارتباك و نظرا لتوتر الطلبه أثناء الامتحان

ويعلق الدكتور احمد الجيوشي نائب وزير التعليم الاسبق قائلا هذا النقاش الذي يدور في المجموعة الان يعكس حقيقة ما حذرنا منه منذ ٣ اعوام دون ان يستمع احد .. السياسات التعليمية هي سياسات عميقة الاثر بطبيعتها وبعيدة المدي ايضا .. لذلك اي سياسة تعليمية لا بد ان تدرس وتطبق علي نطاق ضيق ثم تقيم تقييما محايدا قبل ان تعمم او يرجع عنها .. انا حزين وانا اسمع من اولياء الامور ان ولادهم في "ثانوي" ما بيعرفوش يكتبوا سطرين تعبير الان!!
اضاف علي كل حال .. رأيي أسجله للتاريخ مرة جديدة .. انا مع الجمع بين النظامين.. نظام الاسئلة التي تحتاج الاجابات النصية و نظام الاسئلة التي تحتاج لاجابات موضوعية سواء اختيار من متعدد او صح وخطأ .. وباي نسبة بينهما وان كنت انا اميل لتفوق نسبة درجة النظام ذو الاجابات النصية علي نظام الاختيار من متعدد وعندي اسبابي.
ويتمني الجيوشي ان نفصل في المستقبل تماما بين امتحان نهاية المرحلة الثانوية وبين امتحان القبول في الجامعات لان لكل منهما اهداف مختلفة ومن ثم معايير مختلفة ..
اما خالد الظواهري مدرس خبير بالزقازيق فيري انه اذا كانت الجهات المختصة تريد حقا تطوير التعليم فان ذلك يتطلب اولا تضافر كل الجهود للنهوض بالعملية التعليمية فلن ينصلح الحال ولن يكون هناك تطوير الا إذا حضر طالب الشهادة الثانوية العامة لمدرستة فهل يعلم المسئولون أن كل مدارس مصر لا يحضر لها طلاب شهادة الثانوية ولذلك كيف يكون هناك تطوير وكيف تطالبون المدرس أن يقوم بتقييم طالب او تقييم تجربة وهى فى الحقيقة ليست على أرض الواقع ...الكل يطالب بإلغاء الدروس الخصوصية والطالب وولى امره لاحيله لهم إلا اللجوء للمدرس الخصوصى للاطمئنان على أولادهم لأن التابلت باعتراف الوزارة وسيلة لاهدف عام أو خاص له ... وان بنك المعرفة الذي لايفتحه طالب حتى ماجاء به بعيد جدا عن محتوى منهج يدرس من خلال كتب خارجية ومذكرات للمدرسين اما الكتاب فهو غير موجود الا أسما فقط .. أتحدث عما أراه عن تجارب وعلى أرض الواقع.. قالوا مجموعات تقوية فحاربها من يقودون المناصب ..ونفرها الطالب....قالوا تجرم الدروس الخصوصية فظهر أنه لابديل عنها باعتبار أنه لايوجد بالمدارس تدريس للشهادة الثانوية فبلاش نضحك على بعضنا ونؤكد أن طالب الثانوية العامة بيروح مدرسة وقبل الحديث عن وضع امتحان بالنظام الجديد يجب علينا أولا اجبار الطالب على الحضور للمدرسة وان يتم تقييمه وخصوعه لسلسلة من الإختبارات بمدرسته وعن طريق مدرسين فاهمين كيف يمكن وضع سؤال يستهدف التقييم الجيد ووفقاً لتعليمات المركز القومي للامتحانات والمصيبة الكبرى فى إلغاء وضع امتحانات لطلاب الثانوى بمراحلها المختلفة من جانب المدرسة على سبيل تعويد الطالب على نظام الفهم الجديد واذا نادى المدرس لذلك وقام بوضع اختبار لطلابه فى الفصل يحول للشئون القانونية

من العيب جدا أن أكون مدرسا لطالب بمرحلة ولا استطيع تعويد طلابى على الأسئلة وقياس قدراتهم حتى وقت أن قمنا بنشر اختبارات إلكترونية وفقاً لاختبارات التابلت ووفقاً لما نادى به السيد الفاضل وزير التربية والتعليم وجدت هجوما ضاريا وابلاغى من الإدارة التعليمية بعدم النشر دون مراعاة لما أقوم به من جهد وبدلاً من مكافآتى على مجهوداتى بأقل شئ شهادة تقدير كتكريم معنوى لزيادة الحافز عندى كرموا مديرى المدارس ومن ليس لهم دخل بالعملية التعليمية

اضاف أرى ضرورة امتحان الطلاب على التابلت فى الشهادة الثانوية ومراحل التعليم الثانوي وان يكون هناك أسئلة مقالية وفقاً لما أعلن عنه المركز القومي للامتحانات لأن نوعية الأسئلة التى جاءت كمقياس لمن سيضع امتحان اولى وثانية ثانوى رائعة وفعلا تقيس قدرات الطلاب تحليل وتطبيق وفهم وتلك هى الغاية التى ننادى بها وتلك هى الغاية التى يرغبها الوزير من تطوير التعليم لكن غير ذلك تبقي الأمور تدار على غير ما يرام

وقالت عايدة عبد الحميد ولي امر لطالب بالنزهة بالقاهرة

طبعا لازم يكون الامتحان كالعام الماضي بنظام البابل شيت وأسئله اختيارى لأن الاولاد لم يتدربوا على المقالى بقالهم سنتين

وتري عايدة ان اى نظام جديد للثانويه العامه لازم يبدأ من اولى ثانوى ماينفعش اطلاقا اغير اى طريقه مع بدايه الصف الثالث واحنا دلوقتى فى نص العام ما ينفعش اجى واقول فى ولو حتى سؤال واحد لانه للاسف الولاد خلاص نسيوا الكتابه بالورقة والقلم احنا كفايه علينا مشكله الانجليزي اللى مش لاقيين اى حد يرد علينا ويقول لنا المنهج هينزل امتى ده اقل حق لطالب الثانويه انه يعرف منهجه

قال الدكتور تامر عبد الحافظ مديرية التعليم بالشرقية ..

ممكن أي حد يقول رأي ولو من وجهة نظره بسيط ممكن يكون افضل أسلوب

يا ريت مانحجرش على رأي بعض لمجرد اني عاجبني وضع معين

نسمع بعض ونتحاور فنهم بعض افضل ونتعاون

أعرض فكرتك ايا كان مع او ضد ببساطة وهدوء احنا مش في نزاع

التعليم طول عمره وهيفضل زي ما هو علم فيه برضه آراء وخبرات مختلفة

وبعدين الثابت الوحيد ان فيه طالب وفيه منهج وتعليم

الاختلاف دائما في طريقة التعليم وطريقة التقييم مش حاجة جديدة يعني

ودي بتتغير دائما وتتحدد بناء على معطيات كتير

ويري السيد خليل معلم خبير للغة العربية بالزقازيق ضرورة تعميم استمارة للأسئلة الورقي المقالي مثل صفوف النقل حتى ولو كان مكلفا تصحيحه مجاورة للبابل شيت

اما شيرين نور معلمة خبيرة بمدينة السلام بالقاهرة فقالت انه بعدما اتضح ان نظام البابل شيت مينفعش معاه اي إعادة تصحيح ودا ضيع علي الولاد فرص كتيرة جدا وكان ليهم درجات أما البوكليت وخط الايد كان افضل.

اخيرا قال
امام عوضين
معلم لغة فرنسية ..ان
التطوير الحقيقى هو منع الغش و خصوصا فى الثانوية العامة لو حققنا الكلام دة يبقى عملنا حاجة كويسة جدا
اضاف .. بالنسبة لنظام أسئلة الثانوية العامة انا مع عودة السؤال المقالى فمثلا موضوع التعبير فى اللغة العربية نواة لكاتب و مبدع لأنه بيستخدم كل فروع اللغة العربية و لك أن تتخيل أن بعض البلدان العربية التعبير فيها مادة منفصلة لأهميته أما اللغة الفرنسية و الإنجليزية كذلك المقالى مهم لكى يعبر الطالب عن اللغة بطريقة صحيحة و كذلك الترجمة فذلك نواة لمترجم و كاتب. أما بالنسبة للمواد العلمية و الرياضيات لابد من عودة المقالى بها كيف أحاسب الطالب عن ناتج المسأله النهائى.أين الجانب الابداعى و الابتكارى فى حل المسائل و خطوات الحل التى ممكن ألا تخطر على بال أحد.