(الجمهورية أون لاين ) فى أستفتاء لأحسن الأفلام .. الجمهور : تامر وكريم وعز خطفوا العيدية

موسم عيد الأضحى شهد منافسة شديدة بين نجوم كبار بعدما قرروا العودة لدور العرض من جديد وبعيدا عن شباك التذاكر الذي لا يعبر دائما عن جودة العمل قامت المساء باجراء أستفتاء بين الجمهور عن أفضل فيلم خلال موسم عيد الأضحى الذي عبر عن رأيه بتجرد في الأفلام التي سحبت منه العيدية

"مش أنا " فكرة جديدة .. و"العارف".. ممتع

راضى محمد
من المؤكد أن فيلم" مش انا" من أحسن الافلام الكوميدية اللي مفتقدينها من فتره كبيره خاصه ان تامر حسنى نجم فى صناعة الكوميديا والفكرة جديده بالنسبه لي.

اسلام الزعبلاوي
فيلم البعض لا يذهب للمأذون مرتين من وجهة نظري فيلم ممتاز جدا بسبب التحدث عن تجربة الزواج و الاختلافات بين الزوج و الزوجه.. اعتدنا دائما علي افلام مميزة جدا طالما البطل هو كريم عبد العزيز.

شريف عبد الجواد
قصة فيلم العارف من حيث حرب العقول قصة جديدة من نوعها وعجبتني جدا غير أن الفيلم بيضم نجوم كبار زي احمد فهمي وأحمد عز ودا كفيل أن يثبت أن الفيلم مكسر الدنيا
مصطفى خليل
رأيي أن فيلم البعض لا يذهب المأذون مرتين بينافس بقوة هذا الموسم بسبب القاعدة الجماهيرية للنجم كريم عبد العزيز اللى بتستنى أفلامه وأعماله كلها.
أسامة خليل
عن تجربه ياريت الناس تشوف فيلم العارف لانه جميل جدا وخاصة شخصيات احمد فهمي وأحمد عز والفيلم واضح أنه انتاج ضخم وعالمى.
عبد الرحمن عاطف:
فيلم العارف من أنواع القصص المختلفة اللي مشوفنهاش قبل كدا من حيث فكرة سرقة البنوك من خلال الإنترنت وتفاصيل الصراع والدراما والفيلم مشوق جدا من وجهة نظرى.
بسنت شعبان :
فكرة الجمع بين ماجد الكدواني وكريم عبد العزيز وبيومي فؤاد ينجح اي فيلم بسبب قدرتهم على تقديم الكوميديا بشكل بسيط للجمهور.
أحمد طه
موسم افلام العيد السنه دي افضل من السنه اللي فاتت خاصة ان اجواء الكورونا هديت الحمد لله وقاعات السينما يعنى رجعت والسنه دي بقي انا شايف فيلم العارف فكرة جديدة وممتعة لم يتم طرحها من قبل عندنا وكمان انا بحب شخصية احمد فهمى فى التمثيل بشكل عام.

محمد حسين
رأيي ان فيلم العارف هيعمل اعلي ايرادات ولكن ممكن هيكون فى منافسة مع فيلم مش أنا لانه نازل من فترة انا شوفت الاتنين بس العارف الافضل بينهم لانه فى اتنين فنانين كبار.
هدير عبده
مبسوطة جدا بعدد الأفلام التى طرحت فى عيد الأضحى المبارك ، وعودة المنافسة القوية والنظيفة بين النجوم، خاصة تامر حسنى بفيلمه "مش انا" وأحمد عز" العارف وكريم عبد العزيز بفيلم "البعض يذهب للماذون مرتين " أفلام متنوعة فى قصصها ، وأرى أن المنافسة قوية بين تامر حسنى وكريم وعز بخلاف الأفلام الاخرى وأرى أن فيلم "مش أنا" قصة جديدة علينا وأداء تامر كان قويا وأنه نوع فى أختياره للأفلام
محمود نجاح
أفلام بصراحة قوية جدا وصعب أن تقول مين رقم واحد فى المشاهدة ولكن أرى ان افلام تامر حسنى مش أنا وكريم عبد العزيزالبعض لا يذهب للمأذون مرتين ، من أفضل الأفلام .
مصطفي طارق
دخلت فيلم (مش أنا) على أساس إنه فيلم كوميدي كما توقعت لكن الحقيقة قصة قوية جدا واقعية فيها احداث بتحصل معانا في حياتنا العملية وحياتنا الأسرية ، بعيد عن ان الجزء الكوميدي طبعا كان ضحك بجد ،
الفيلم فيه اكتر من رسالة ، (الرضا) وتقول الحمد لله على كل شيئ مهما كان فيك أيه حتى لو أنت الوحيد فى العالم الدنيا دايسه عليك وان ربنا موجود وشايفك ومش هيسيبك وكويس ان فيه افلام بتنتج تقدر توصلك فكرة ممكن تغير بيها من نفسك وتخليك متيأسش.