انتشرت أعمالها الفنيه الخاصه بالرسم علي الزلط.، و لاقت إعجاب مئات المهتمين بالفن... كلها من وحي الطبيعه بألوانها الجاذبة علي الزلط. قد تكون هي الأولي التي أبدعت هذا الفن في مصر.

فالرسم علي الأحجار او الزلط غير معروف او منتشر في ألوان الفنون التي نعرفها عموما.. أعمالها توحي بالحياه و الألوان و الأفكار.

إنها شيرين ظريف، فنانة مصرية، تهدف لنشر الجمال عبر احجار الزلط...

متي بدأت الرسم علي الزلط؟

- بداية الرسم على الزلط جات صدفة لما كنا في الحظر مع ظهور فيروس الكورونا كنت بأعمل كذا عمل يدوي و جه فيديو قدامي للرسم على الزلط فكرني قد ايه كنت باحب الرسم ايام ثانوي و الجامعة .. نزلت المكتبة اشتريت فرش و الوان و بدات ارسم حاجات بسيطة خالص.

هل كان سهل الحصول علي الزلط؟

-كان الحصول على الزلط صدفة ايضا لان قدام العمارة اللي ساكنة فيها بيتبني مول فلاقيت زلط كتير مرمي على الارض بدات اختار الاحجام و الاشكال اللي ينفع يترسم عليها و الصراحة مغامرات لم الزلط كانت ممتعة و مضحكة جدا.

هل تختاري زلط بمواصفات معينه؟

- نعم ف الزلطة يفضل ان تكون مسطحة و مساحتها في حدود من ٧-١٠ سم عرض و ٤-٦ سم طول علشان اقدر ارسم عليها و بدات باحجام صغيرة ثم اكبر.

كيف بدأتي تحبي الرسم علي الزلط و احترافه؟

- الموضوع كله كان هواية و حب للفن و الالوان و لما لاقيت الرسم بيفرق مع نفسيتي للاحسن لاقيت اني اقدر اخرج الطاقة السلبية و احولها لطاقة ايجابية بطريقة ممتعة و اللي شجعني اكتر اني لما نشرت الرسومات على الفيسبوك لاقت اعجاب شديد جدا من اصحابي و بقوا بينتظروا الرسمة ( الزلطة ) القادمة كيف كان حظر الكورونا هو السبب؟ كنا في مأساة الكورونا و الكل كان مكتئب فكنت ارسم بعض الزلط و انشره في صفحتي عبر الفيس بوك و كنت أشعر بسعاده من رد فعل اصدقائي الذين كانوا ينتظرونني و ده شئ بسيط بيفرحهم و ينشر شوية بهجة في الاجواء الصعبة اللي كنا فيها لما لاقيت التشجيع ده و اني انا نفسي بافرح بكل رسمة جديدة.

هل حاولتي تطوري من رسوماتك او تضيفي لموهبتك؟

-بالفعل اهتميت و اخدت كورس رسم اتعلمت منه كتير و بحاول على قد ما اقدر اني انمي الموهبة دي بالرسم الكتير و باتفرج على فيديوهات تعليم رسم.

هل فن الرسم معروف في مصر ام نادر؟

- فن الرسم على الزلط معروف جدا في اوروبا و امريكا لكن اندهشت انه مش معروف خالص في مصر و يمكن ده اللي خلاني اتمسكت بيه اكتر لانه متميز ... الرسم على لوحات الكانڤا او الورق معروف و تقليدي و انا بطبيعتي باميل لكل ما هو غير تقليدي.

لماذا اغلب رسوماتك من الطبيعه فقط؟

أنا أعشق الطبيعة و المساحات الواسعة و البحر و الجبال و الخضرة علشان كده ده سر اختياري للمناظر الطبيعة و كمان هي أسهل لحد مبتدئ زيي لاني مش رسامة و لكن هاوية.

هل تنوين أقامه معرض لعرض رسوماتك علي الزلط... و ما هي خطتك لنشر فنك؟

- كتير بيشجعوني اني اعمل معرض للزلط بس متخوفة شوية من غرابة الفكرة في مصر لكن مؤكد هاتفرق كتير اي انجاز لي ف السعاده الحقيقيه هي براي الناس في النهايه.. لان الفنان لا يشبع شيئ في نفسه فقط و انما يحاول ان يبهج و يسعد من يتابعه و يحبه.

و عن تصوري للمرحله القادمه بافكر ابتدي بصفحة على الفيسبوك انشر فيها كل رسوماتي و اتابع معجبين هذا الفن. اذا لاقي استحسان. اكيد ساهتم اكثر بنشره كفن و ساحاول اعلم غيري كيفيه الرسم علي الزلط.