رئيس مجلس الإدارة
طارق لطفى
رئيس التحرير
أحمد سليمان
اخر العنقود
كلمات الشاعر : محمد طلعت
فاكرين انها اول ماتموت
الدنيا هتمشى بطبيعتها
والضحكة هترجع على وشى
بقلمها الجاف
والحزن الخايف م الفرقة
مفرود شفاف
وهانرجع تانى ف حضن البيت
نتلم وتحضن أيدنا العيش
ونسمى ونستني التكبير
على شقة تمر وشوب عصير
ونلاقى اللمة من غير قلب
نتجمع جنبه ونتشاهد
كلها كام يوم
هنخاف على بعض
وتاخدنا الدنيا ف اخر باب
ترمينا ف وسط قوالب هم
ونلاقى نصيبنا من الوحدة
خايف من حضن الايد تتلم
وطبيعى الأيام بتنسى
بس انسى ازاى
انا اخر واحد قفل الباب
على ارض بتزرع ف حروفها
انا لامم كل حنان موجود
انا اخر مرزوق من جوفها
انا اكتر واحد فيكم عاش
متهنى بأحضان الجنه
وهاعيش الباقى من الايام
ها تقلب بين احضان الحلم
واحضن ملامحها ف لحظة شوق
واتحايل لو مره تاخدنى
او تدعى إننا نتقابل فوق
كلكوا هتعيشوا وترتاحوا
وانا وحدى اللى هدوق من نارها
هتقلب وحدى على سريرها
هفتح بدموعي دولاب نومها
انا بس اللى ف وسط هدومها
راح أفتش على اخر انفاس
بعتتها رسالة ف لبس الموت
وهكلم كل حيطان عاشت
علشان تتدفي ف حضن الصوت
على اخر كرسى كانت قاعدة
راح اشيله عشان يبقالى تابوت
وهدارى الأبيض فى هدومى
وأفرد ع الباقى هدومى السود
بس اوعوا تنسيكوا الدنيا
ان الفاضل اخر العنقود
اترك تعليق