رئيس مجلس الإدارة
طارق لطفى
رئيس التحرير
أحمد سليمان
يوميات مهندس مشاكس
الكوبونات
"من مذكراتي مع مراتي"
يرويها: تامر راغب
روحت انا ومراتي هايبر ماركت مشهوره لشراء بعض مستلزمات المنزل
وطبعا غير مسموح ليا امد ايدي علي اي حاجه اجيبها بعد العمله المهببه بتاعه كوبونات كانزات البيبسي .
المهم ومراتي بتشتري الحاجه بتاعت البيت
اذ بالاذاعه الداخليه للهايبر تعلن عن الاتي :
المذيع الداخلي للهايبر : الساده زوار الهايبر الكرام
" يسعدنا اعلان جوائز قيمه بسحب كوبونات عند شراءك علب بامبرز من الحجم الكبير ".
جريت علي مراتي وقولتلها :
انا : سمعتي العرض اللي قالوه ؟
مراتي : سمعت وحعمل نفسي مسمعتش حاجه
انا : ليه بس ؟
ده بيقولوا في عرض وكوبونات وشغل عالي .
مراتي : اسكت ياتامر مش حنعيده تاني .
انا : اسمعي بس المره اللي فاتت كان بجد حظي وحش .
مراتي : ويعني المره دي ايه الفرق ؟.
انا : الفرق المره دي ان انتي معايا وحظي طبعا حيكون عالي قوي .
مراتي : انا مش موافقه .
انا : لا مش حضيع فرصه الفوز من ايدي المره دي .
مراتي : انت حر .
جريت ورحت جايب علبتين بامبرز من الحجم الكبير علشان اخد عدد اتنين كوبون .
وبعد ما حاسبنا عند الكاشير
روحت انا ومراتي علي المكان اللي بيتسلم فيه الريسيت اللي موجود فيه علبتين البامبرز علشان اسحب عدد 2 كوبون .
اخدت عدد اثنين كوبون واديتهم للراجل علشان يخربش ويقولي الجايزه في كل كوبون ايه .
الراجل : مبروك يافندم .
انا بفرحه : ايه
قولي كسبت ايه .
الراجل : حضرتك كسبت صابونتين لوكس .
انا : افندم !!!!!! كسبت صابونه ؟
الراجل : اتنين حضرتك ، صابونتين يافندم .
طبعا وقفت متنح مش عارف ارد
وصوت ضحك مراتي مجلجل جمبي عماله تضحك عليا
والناس اللي حوالينا عمالين يضحكوا علي ضحكها .
مش متنيل رايح الهايبر ده تاني ولا حجيب كوبونات من عندهم
دول مستقصديني ياجماعه
دمتم بخير
اسعد الله اوقاتكم
اترك تعليق