عطلت الكاميرات وطعنته 15 طعنة.. وادعت حزنها والمباحث كشفتها
والد القتيل:
منها لله حرمتنى من فلذة كبدى وضيعت بناتها

لم يحرمها من أي شئ حتي ديون أسرتها كان يسددها وسفرها إلى السعودية لأداء العمرة لعلها تهتدى وتعاملة بالحسنى لكنها كانت ناكرة الجميل.. تعاملة معاملة سيئة وتحامل على نفسة من أجل بناته الثلاثة لكنها سرقت امواله وعندما عاتبها تشاجرت معه وتركت المنزل لتعود بعد شهر من نفسها وادعت كذبا انها تحبه وما تقدرش تعيش من غيرة لكنها خلصت عليه بمساعدة ابن شقيقتها.. احنا عاوزين حق ابننا بالقصاص العادل منها وابن شقيقها لتبرد نار قلوبنا من الحزن ويرتاح ابننا في قبرة.

بتلك الكلمات روت اسرة منير فخري عبد اللطيف، 42 سنة، "حداد"، من كفر العمدة مركز كفر صقر بمحافظة الشرقية حكايتة مع زوجتة.

قال والد المجني عليه ابني ما شفش يوم حلو مع مراته من يوم ما تجوزها كانت دائما المشاكل معه وطالبناه بتطليقها ويشوف واحدة تانية بدل من وجع الدماغ لكنه صبر على تصرفاتها معه من اجل بناته الثلاث ولم يكن يعلم ان نهايته ستكون على يديها والى احنا خايفيين منه حصل.

اضاف الاب المكلوم نحن نثق فى القضاء المصرى العادل وحق منير هيرجع.. ابنى منير محبوب من الجميع.. الحكاية بدات من 45 يوماً لما ابنى اخد عربون 7 الاف جنيه من زبون علشان يعمل بوابة ليه وعرفت من ابنى ان مراته سرقت منه 1500 جنيه فذهبت إليهما وهديت الموقف وطلبت منهما فتح صفحة جديدة وطلبت من مرات ابني مش تيجى الورشة تانى وتلتزم بيتها بعزبة الفيران منعا للمشاكل وابنى كان ساعتها بصلح فى الكومبورسر فردت على ببجاحة انها هتيجى الورشة ودى ورشتها وبيتها فقلت ليها  عيب ده مش كان ملك ابوكى فقالت لزوجها انته مش مصدقنى انى مش سرقت الـ1500 جنيه على العموم أنا هبيع الحلق واديك الفلوس بس هربيك فقام ابنى بضربها بالقلم فقامت بضربة بكوز الكومبورسور 4 مرات وأنا انقذته منها وغضبت وتركت البيت وبعد شهر جت عمتها من الدقهلية لاعادتها لمنزلنا وحكيت ليها الحكاية ورغم ذلك اهلها اعادوها لمنزل الزوجية وياريتها ما رجعت.

أشار الأب المكلوم لما المتهمة رجعت قبل 4 أيام من الجربمة اتصلت على ابنى واعتذرت ليه وامطرته بوابل من كلمات الحب والغزل وانها عاوزه تبات معها فى حضنه فى الورشة الموجود بها حجرتان ملحقة لتنفيذ مخططها الشيطانى وبالفعل اتخدع فيها وصدقها علشان ولد طيب مش صايع وركبت وراه المتوسيكل وأحد الجيران شافها راكبه وراه المتوسيكل مع منتصف الليل وقعد ابنى مع الجيران وهيه عملت كوباية قهوة وشربتها ودخلوا ناموا وابنى دخل للاستحمام وأخد حقنة الغضروف والله أعلم حطت لابنى ايه علشان يفقد اتزانه وفتحت باب الحوش الخلفى الموجود به الورشة لابن اختها لتنفيذ الجريمة وابنى عفى وجسمه حلو وضرباه بالعتلة وطعناه 15 طعنة بالسنجة وقاما بجره من الباب الداخلى للورشة ووضعا جثته بالورشة وقلعته هدومة ولبسته هدوم الشغل ووضعت الصاروخ الخاص بالعمل على رأسه ورفع السكينة ليفسر الأول على انه السبب فى وفاته وقامت فتحت الباب الخارجى وصوتت والناس اتملت ولما زوج بنتى كلمنى جريت على الورشة وقبل ما ادخل شفت مرات ابنى وقولت ليها انتى الى قتلتيه فردت على انا يا ظالم ورحت داخل على ابنى لقيته غرقان فى دمه والصاروخ سلك الكهرباء ملفوف والفيشة مش محطوطة فى الكهرباء وربنا عماها وعرفت فى النيابة من خلال المعاينة ان الصاروخ ده بتاع التجليخ ولا يحدث اصابات.

قال السيد علي أنا شغال مع الأسطى منير وكان بينه وبين مراته مشاكل لرب السما وهيه ست مفتريه خلصت عليه بمساعدة ابن اخوها وحسبنا الله ونعم الوكيل فيهما قلت زوجها وضيعت بناتها.

قالت شقيقة المجني عليه لما اخويا مراته سابت البيت ومشيت قولنا خير وبركة ويارب ما ترجع تانى وطلبنا من اخويا مش يرجعها لكنه قال مش ينفع اضيع بناتى والى كنا خايفين منه حصل لما رجعت ليه رحت علشان اشوف اخويا لقيته مرمى فى ورشه الحدادة وغرقان فى دمه ومراته المفترية الى مش متعودة تروح الورشة قاعدة على كرسى وقالت انا مش موت اخوكى واخويا اتقتل على يد مراته وابن اختها فى حجرة ملحقة بالورشة وقامت بنقله للورشه وادعت انه مات بالصاروخ واخويا كان مدبوح من رقبته 15 طعنة.. اخويا طوب الأرض بيحبه.

أضافت زوجة اخويا قامت عقب عودتها بأربعة أيام بتنفيذ الجريمة وفصلت كاميرات المراقبة حتى لا توثق جريمتها واخويا عنده 3 بنات أكبرهم فى ثالثه ثانوى وجدعنه الدنيا كلها فى اخويا.

قال أحد الأهالى ان المتهمة نكدية وان زوجها القتيل عندما فاض الكيل منها هددها بالزواج عليها من أخرى مما استشاطت غضبا ونفذت جريمتها بمساعدة ابن اختها واعتقدت انها ستفلت من الجريمة لكن سرعان ما توصلت تحريات المباحث الى انها وراء الجريمة وطالب باعدامها وابن اختها ليكونا عبرة لكل من يفكر بارتكاب مثل هذه الجريمة البشعة التي تحرم الأسر من فلذات الأكباد والابناء من والدهم.

قام المئات من أهالى القرية والقرى المجاورة بتشيع جنازة الحداد وسط حالة من الحزن.

كانت الأجهزة الأمنية بمديرية أمن الشرقية، تلقت إخطارا يفيد بورود بلاغ بالعثور على منير فخري 42 عاما، حداد، مقيم بمركز كفر صقر، جثة هامدة داخل ورشة حدادة خاصة به بمركز كفر صقر.

وتبين من التحريات الأولية وجود شبهة جنائية فى الوفاة ومقتل المجني عليه داخل ورشته وأن وراء ارتكاب الواقعة "نهي. ن" 40 سنة زوجة المجني عليه ونجل شقيقتها "السيد. م" 19 عامًا.

تم ضبط المتهمين، وبالعرض علي النيابة العامة صرحت بدفن جثة المجني عليه عقب الانتهاء من الإجراءات القانونية اللازمة، وقررت حبس المتهمين لمدة 4 أيام على ذمة التحقيقات جددهما قاضى المعارضات 15 يوما على ذمة التحقيقات.